ກອງປະຊຸມລັດຖະມົນຕີອາຊຽນ ດ້ານຄວາມປອດໄພທາງໄຊເບີ ປະຈຳປີ 2017 ທີ່ ປະເທດ ສິງກະໂປ

ທ່ານ ບຸນສະເຫຼີມໄຊ ເຄນນາວົງ, ຮອງລັດຖະມົນຕີ ກະຊວງ ໄປສະນີ, ໂທລະຄົມມະນາຄົມ ແລະ ການສື່ສານ (ປທສ) ໄດ້ນໍາພາຄະນະ ເຂົ້າຮ່ວມກອງປະຊຸມລັດຖະມົນຕີອາຊຽນ ດ້ານຄວາມປອດໄພທາງໄຊເບີ 2017 (ASEAN Ministerial Conference on Cyber Security 2017), ທີ່ຈັດຂື້ນໃນວັນທີ 18 ກັນຍາ 2017 ທີ່ຜ່ານມານີ້ ຢູ່ທີ່ປະເທດສິງກະໂປ ພາຍໃຕ້ການເປັນປະທານຂອງ ທ່ານ Dr. Yaacob Ibrahim, ລັດຖະມົນຕີກະຊວງ ຂໍ້ມູນຂ່າວສານ, ຜູ້ຮັບຜິດຊອບວຽກງານດ້ານຄວາມປອດໄພທາງໄຊເບີ ຂອງສິງກະໂປ, ມີລັດຖະມົນຕີ ແລະ ຄະນະວິຊາການ ດ້ານຄວາມປອດໄພທາງໄຊເບີ ທີ່ກ່ຽວຂ້ອງ ຂອງບັນດາປະເທດສະມາຊິກອາຊຽນເຂົ້າຮ່ວມຢ່າງພ້ອມພຽງ. ຈຸດປະສົງຂອງກອງປະຊຸມຄັ້ງນີ້ ແມ່ນເພື່ອເສີມສ້າງການຮ່ວມມືໃນກອບຂອງອາຊຽນ ດ້ານວຽກງານການປ້ອງກັນຄວາມປອດໄພທາງໄຊເບີ ຊຶ່ງໄດ້ມີການປຶກສາຫາລືກ່ຽວກັບສິ່ງທີ່ສາມາດເຮັດຮ່ວມກັນໄດ້ ເພື່ອກ້າວໄປເຖິງການສ້າງຂີດຄວາມສາມາດ ແລະ ສ້າງຄວາມເຂັ້ມແຂງດ້ານການປ້ອງກັນໄພທາງໄຊເບີໃນເຂດພາກພື້ນ ແລະ ໃນອາຊຽນ.

            ກອງປະຊຸມໃນຄັ້ງນີ້ ຍັງໄດ້ປຶກສາຫາລືວຽກງານທີ່ສໍາຄັນເຊັ່ນ: ທິດທາງໃນຕໍ່ໜ້າສໍາລັບອາຊຽນ ໃນການຊອກຫາວິທີທາງແກ້ໄຂການຮ່ວມມື, ການສ້າງກົນໄກ, ການສ້າງຂີດຄວາມສາມາດການວາງຍຸດທະສາດ ແລະ ແຜນນະໂຍບາຍປ້ອງກັນໄພທາງໄຊເບີ ເພື່ອໃຫ້ສາມາດເຊື່ອມໂຍງ ແລະ ຮັບມືກັບໄພຄຸກຄາມຕ່າງໆ ທີ່ອາດຈະເກີດຂຶ້ນໃນຕໍ່ໜ້າ ໂດຍສະເພາະແມ່ນແນ່ໃສ່ປົກປ້ອງພື້ນຖານໂຄງລ່າງຂໍ້ມູນຂ່າວສານ ດ້ານ ICT ໃຫ້ມີຄວາມປອດໄພ ລັດຖະບານ ສປປ ລາວ ແມ່ນມີເຈດຈໍານົງທີ່ຈະພັດທະນາປະເທດ ແລະ ປັບປຸງມາດຕະຖານການນໍາໃຊ້ຂໍ້ມູນຂ່າວສານໃຫ້ມີຄວາມມປອດໄພ ແລະ ເກີດປະໂຫຍດສູງສຸດ ໃນການສ້າງມາດຖານ ການເຊື່ອມໂຍງຂໍ້ມູນຂ່າວສານ ລວມໄປເຖີງການສ້າງນະໂຍບາຍດ້ານຄວາມປອດໄພ ເພື່ອສ້າງຂີດຄວາມສາມາດໃນການຮັບມືກັບໄພຄຸກຄາມທາງໄຊເບີ ທີ່ເປັນເອກະພາບກັນຢູ່ໃນພາກພື້ນ ແລະ ສາກົນ.

           ໃນໂອກາດດັ່ງກ່າວນີ້ ຍັງໄດ້ຮັບຟັງການນໍາສະເໜີ ການສ້າງນະໂຍບາຍ, ກົດໝາຍສາກົນ, ແຜນຍຸດທະສາດ, ການສ້າງກົນໄກການຮັບມືກັບໄພຄຸກຄາມທາງໄຊເບີ, ການສ້າງບຸກຄະລາກອນ, ການຮ່ວມມືສາກົນ ໂດຍສະເພາະແມ່ນລະຫວ່າງປະເທດທີ່ພັດທະນາແລ້ວ ແລະ ປະເທດທີ່ກຳລັງພັດທະນາເພື່ອສ້າງຂີດຄວາມສາມາດໃນການຄຸ້ມຄອງ ແລະ ການປ້ອງກັນຄວາມປອດໄພທາງໄຊເບີ ໃນລະດັບມາດຕະຖານສາກົນ,  ການ​ວາງ​ແຜນ​ສ້າງແຜນຍຸດທະສາດ ແລະ ​ການ​ກອບກູ້ລະບົບທີ່ໄດ້ຮັບຜົນເສຍຫາຍໃຫ້ກັບຄືນມາສູ່ສະພາບເດີມ​. ນອກຈາກນີ້ທາງເຈົ້າພາບໄດ້​ຊີ້​ແຈງ​ໃຫ້​ເຫັນ​ເຖິງ 3 ບັນ​ຫາ​ຫຼັກ​ທີ່​ຈະ​ຊ່ວຍ​ພັກ​ດັນ​ວຽກ​ງານ​ດ້ານ​ການ​ຮັກ​ສາ​ຄວາມ​ປອດ​ໄພ​ທາງ​ໄຊ​ເບີ​ ເປັນຕົ້ນແມ່ນ: ລະ​ບົບ​ການ​ບໍ​ລິ​ຫານ​ຂອງ​ລັດ​ຖະ​ບານ​ໃຫ້​ເຂັ້​ມ​ແຂງ, ຄວາມ​ສາ​ມາດ​ໃນ​ການ​ປະ​ຕິ​ບັດ​ງານ ແລະ ການ​ພັດ​ທະ​ນາ​ລະ​ບົບ​ເສດ​ຖະ​ກິດ​ແບບ​ຢືນ​ຍົງ ຊຶ່ງ ທາງເຈົ້າພາບໄດ້​​ເນັ້ນ​ເຖິງການປ້ອງກັນພື້ນຖານໂຄງລ່າງຂໍ້ມູນຂ່າວສານໃຫ້ເຂັ້ມແຂງ (CIIP).

          ສຳລັບ ສປປ ລາວ ໂດຍສະເພາະ ກະຊວງ ໄປສະນີ ໂທລະຄົມມະນາຄົມ ແລະ ການສື່ສານ, ໄດ້ມອບໜາຍໃຫ້ ສູນລາວເຊີດ ດຳເນີນການຄົ້ນຄ້ວາຮ່າງນະໂຍບາຍດ້ານຄວາມປອດໄພທາງ ໄຊເບີ,  ຊຶ່ງຈະລົງເລິກ ທາງດ້ານການສົ່ງເສີມການສ້າງບຸກຄະລາກອນ, ການສ້າງຂີດຄວາມສາມາດຂອງອົງກອນ ແລະ ບັນດາຂະແໜງການຕ່າງໆ ທາງ ພາກລັດ ແລະ ເອກະຊົນ ມີຄວາມຮັບຮູ້ ແລະ ເຫັນເຖິງຄວາມສຳຄັນຕໍ່ວຽກງານປ້ອງກັນພື້ນຖານໂຄງລ່າງຂໍ້ມູນຂ່າວສານທີ່ສຳຄັນ (CIIP) ຂອງປະເທດ ເພື່ອບັນລຸເປົ້າໝາຍການພັດທະນາເສດຖະກິດສັງຄົມຂອງຊາດໃຫ້ມີຄວາມເຂັ້ມແຂງ. ປະຕິບັດໄດ້ແຜນການຮັບປະກັນຄວາມປອດໄພເຄືອຂ່າຍຄອມພີວເຕີ ແລະ ການປົກປອ້ງຂໍ້ມູນຂ່າວສານໃຫ້ມີຄວາມປອດໄພຕາມແຜນແມ່ບົດ ການພັດທະນາວຽກງານດ້ານ ໄອຊີທີ ຂອງອາຊຽນແຕ່ນີ້ຮອດ 2020.

ໂດຍ: ສູນ LaoCERT, ປທສ.