ກອງປະຊຸມ ຄະນະຜູ້ແທນອາວຸໂສ ອາຊຽນ ໃນດ້ານເຕັກໂນໂລຊີສື່ສານຂໍ້ມູນຂ່າວສານ

ທ່ານ ພູຂົງ ຈິດຮູບໂລກ ຫົວໜ້າກົມແຜນການ ແລະ ການຮ່ວມມື ກະຊວງ ໄປສະນີ ໂທລະຄົມມະນາຄົມ ແລະ ການສື່ສານ (ປທສ) ພ້ອມດ້ວຍຄະນະ ໄດ້ເດີນທາງໄປເຂົ້້າຮ່ວມ ກອງປະຊຸມ ຄະນະຜູ້ແທນອາວຸໂສ ອາຊຽນ ໃນດ້ານເຕັກໂນໂລຊີສື່ສານຂໍ້ມູນຂ່າວສານ ຄັ້ງທີ່ 18, ທີ່ເມືອງ ຊຽມລຽບ ປະເທດ ກໍາປູເຈຍ, ໃນລະຫວ່າງ ວັນທີ່ 28-29 ພະຈິກ 2017 ນີ້. ໂດຍກອງປະຊຸມໃນຄັ້ງນີ້ ຈັດຂື້ນພາຍໃຕ້ ຫົວຂໍ້ “ພ້ອມກັນກ້າວໄປສູ່ ການເຊື່ອມໂຍງ ດີຈີຕອນ ໃຫ້ແກ່ຊຸມຊົນ (Towards a Digitally Integrated Communities)”,

      ໃນກອງປະຊຸມຄັ້ງນີ້ ແມ່ນປືກສາຫາລືກ່ຽວກັບ (1)ການຄົ້ນຄ້ວາ ຂອບການການຮ່ວມມື ໃນດ້ານວຽກງານໂທລະສັບລະຫວ່າງປະເທດ ຂອງບັນດາປະເທດສະມາຊີກ ອາຊຽນ (International Mobile Roaming for ASEAN), ຊຶ່ງໄດ້ກໍານົດ ຫລັກການ ການສ້າງຄວາມໂປ່ງໃສທາງດ້ານອັດຕາຄ່າໂທຂອງແຕ່ລະປະເທດ ແລະ ແຜນຫລຸດຜ່ອນລາຄາການບໍລິການລະຫວ່າງປະເທດສະມາຊີກດ້ວຍກັນ, (2) ຄົ້ນຄ້ວາແຜນງານ ເພື່ອສ້າງຂອບການຮ່ວມມື ໃນການພັດທະນາການຄຸ້ມຄອງ ຂໍ້ມູນດິຈິຕອນ (ASEAN Framework on Digital Data Government) ພາຍໃນປີ 2019 ເພື່ອເປັນບ່ອນອີງ ໃນການກໍານົດຫລັກການ, ມາດຖານ ແລະ ຂັ້ນຕອນ ຂອງການແລກປ່ຽນຂໍ້ມູນຂ່າວສານ ດີຈີຕອນຂອງພາກລັດ ເພື່ອໃຫ້ຮັບປະກັນ ຄວາມປອດໄພໃນການແລກປ່ຽນຂໍ້ມູນໃນອານາຄົດ, (3)ຮັບຮອງເອົາບົດລາຍງານ ການປະເມີນຄຸນະພາບຂອງຜູ້ຊົມໃຊ້ (Quality of Experience) ແລະ ຂອງຜູ້ບໍລິການ (Quality of Service), ຊຶ່ງປະຈຸບັນ ບັນດາປະເທດ ສະມາຊີກ ຍັງບໍ່ມີມາດຕະຖານລວມ ໃນການກໍານົດຄຸນນະພາບ ຂອງການຊົມໃຊ້ ແລະ ການບໍລິການ, (4)ໄດ້ຮັບຮອງບົດລາຍງານຄວາມຄືບໜ້າ ການສ້າງຂອບການຮ່ວມມື ໃນການຄຸ້ມຄອງຄື້ນຄວາມຖີ່ຂອງອາຊຽນ (ASEAN Spectrum Management) ໂດຍສະເພາະການກໍານົດຄື້ນຄວາມຖີ່ 700Mhz ເປັນຄື້ນວາມຖີ່ເອກກະພາບ ຂອງບັນດາປະເທດສະມາຊີກ ໃນການຫັນປ່ຽນຈາກລະບົບ ອານາລອກໄປສູ່ລະບົບດີຈີຕອນ ແລະ ການສ້າງການເຊື່ອມໂຍງໃຫ້ແກ່ ເຂດຊົນນະບົດ, (5)ຮັບຮູ້ບັນຫາ, ຜົນກະທົບ ແລະ ການແຂ່ງຂັນ ລະຫວ່າງ ຜູ້ປະກອບການ ໂທລະຄົມມະນາຄົມ ແລະ ບັນດາບໍລິສັດທີ່ໃຫ້ບໍລິການລະບົບເຄື່ອຂ່າຍໂທລະຄົມ (Operator vs OTT), ໂດຍມີການຄົ້ນຄ້ວາ ເພື່ອສ້າງສະພາບແວດລ້ອມຂອງການຮ່ວມມືແບບຍືນຍົງ ແລະຄວນຫາວິທີໃຫ້ການບໍລິການຂອງ OTT ເຂົ້້າມາສະໜັບສະໜູນ ແຜນແມ່ບົດດ້ານເຕັກໂນໂລຊີສື່ສານຂໍ້ມູນຂ່າວສານ ແລະ ເຄົາລົບບັນດາລະບຽບຫລັກການຂອງບັນດາປະເທດສະມາຊີກອາຽນ, (6) ກໍານົດຕົວຊີ້ວັດທີ່ສໍາຄັນ ໃນການ ຕິດຕາມຄວາມກ້າວໜ້າຂອງການຈັດຕັ້ງປະຕິບັດ ແຜນແມ່ນບົດດ້ານເຕັກໂນໂລຊີສື່ສານຂໍ້ມູນຂ່າວສານຂອງອາຊຽນ ເພື່ອຊຸກຍູ້ແລະຕິດຕາມບັນດາປະເທດສະມາຊີ ໃນການຈັດຕັ້ງປະຕິບັດ ບັນລຸຕາມເປົ້້າໝາຍ, (7)ໄດ້ຮັບຟັງການລາຍງານຜົນຂອງການຈັດຕັ້ງປະຕິບັດ 16​ໂຄງການ ທີ່ໄດ້ຮັບຮອງໃນປີ 2017, ພ້ອມນັ້ນ ກໍ່ໄດ້ອະນຸມັດ ການຈັດຕັ້ງປະຈິບັດໂຄງການ 2018 ​ຈໍານວນ 15 ໂຄງການ, ຊຶ່ງ ສປປ ລາວ ຂອງພວກເຮົາແມ່ນໄດ້ຮັບ 2​ໂຄງການ ຄືໂຄງການ e-Service Gap Analyze ແລະ ໂຄງການ Cloud computing

ພ້ອມນັ້ນ, ຍັງໄດ້ພົບປະ ແລະ ປຶກສາການຮ່ວມມື ກັບບັນດາປະເທດຄູ່ຮ່ວມເຈລະຈາ ເຊັ່ນ ສປ ຈີນ, ຍີ່ປຸ່ນ, ສ. ເກົາຫລີ, ອີເດຍ, ອາເມລີກາ, ສະຫະພາບເອີລົບ ແລະ ອົງການສະພາບຫະພາບໂທລະຄົມມະນາຄົມສາກົນ. ຊຶ່ງບັນດາຄູ່ຮ່ວມເຈລະຈາແມ່ນໄດ້ສະໜັບສະໜູນການຈັດຕັ້ງປະຕິບັດແຜນແມ່ບົດຂອງອາຊຽນ ແລະ ຍີນດີໃຫ້ ການຮ່ວມມື ແລະ ທືນສະໜັບສະໜູນ ໃນຫລາຍໂຄງການ. ທຸກປະເທດສະມາຊີອາຊຽນ ກໍ່ເຫັນໄດ້ວ່າ ມີຜົນສໍາເລັດໃນການພັດທະນາເຕັກໂນໂລຊີສື່ສານຂໍ້ມູນຂ່າວສານ ຢູ່ໃນປະເທດຂອງຕົນ ແລະ ກໍ່ໄດ້ມີການຮ່ວມມືກັນ ແລະ ຊ່ວຍເຫລືອຊຶ່ງກັນແລະກັນ ໃນການຈັດຕັ້ງປະຕິບັດແຜນແມ່ບົດຂອງອາຊຽນ ເພື່ອການສ້າງ ຂອບການຮ່ວມມືໃນປີ 2020. 

ແຫ່ງ: ກະ​ຊວງ​ເຕັກ​ໂນ​ໂລ​ຊີ ແລະ ການ​ສື່​ສານ/29/11/2017