ຄຄອຊ ສະຫຼຸບວຽກງານ ປະຈຳປີ 2019 ແລະ ວາງທິດທາງແຜນການໃນປີ 2020.

ໃນຕອນເຊົ້າຂອງວັນທີ 21 ມັງກອນນີ້, ທີ່ຫ້ອງປະຊຸມ ກະຊວງແຜນການ ແລະ ການລົງທຶນ, ຄະນະກຳມະການຄຸ້ມຄອງອິນເຕີເນັດ ແຫ່ງຊາດ (ຄຄອຊ) ໄດ້ຈັດກອງປະຊຸມສະຫຼຸບວຽກງານການເຄື່ອນໄຫວປະຈຳປີ 2019 ແລະ ວາງທິດທາງປະຈໍາປີ 2020 ຂຶ້ນຢ່າງເປັນທາງການ. ໂດຍການເປັນປະທານຂອງ ທ່ານ ສອນໄຊ ສີພັນດອນ, ຮອງນາຍົກລັດຖະມົນຕີ ລັດຖະມົນຕີ ກະຊວງແຜນການ ແລະ ການລົງທຶນ, ປະທານ ຄະນະກຳມະການຄຸ້ມຄອງອິນເຕີເນັດ ແຫ່ງຊາດ, ມີການເຂົ້າຮ່ວມຈາກ ກະຊວງ ໄປສະນີ ໂທລະຄົມມະນາຄົມ ແລະ ການສື່ສານ (ປທສ), ກະຊວງ ປ້ອງກັນປະເທດ, ກະຊວງ ປ້ອງກັນຄວາມສະຫງົບ, ກະຊວງ ຖະແຫຼງຂ່າວ, ວັດທະນະທຳ ແລະ ທ່ອງທ່ຽວ, ກະຊວງ ການຕ່າງປະເທດ, ຫ້ອງວ່າການສຳນັກງານນາຍົກລັດຖະມົນຕີ ແລະ ຄະນະກໍາມະການຈາກພາກສ່ວນທີ່ກ່ຽວຂ້ອງ ເຂົ້າຮ່ວມ.

ໃນໄລຍະ 01 ຜ່ານມາ, ຄຄອຊ ໄດ້ເຄື່ອນໄຫວວຽກງານການຄຸ້ມຄອງອິນເຕີເນັດ ໃນ ສປປ ລາວ ຢ່າງເອົາຈິງເອົາຈັງ, ເຊິ່ງເປັນໄລຍະທີ່ມີຫຼາຍເຫດການເກີດຂຶ້ນ ແລະ ທີ່ພົ້ນເດັ່ນ ກໍ່ແມ່ນບັນຫາຫາງສຽງສັງຄົມ ທີ່ຖືກເຜີຍແຜ່ທາງອິນເຕີເນັດ ທີ່ໄດ້ເຮັດໃຫ້ເຫັນເຖິງຄວາມສຳຄັນໃນການຄຸ້ມຄອງອິນເຕີເນັດ ເວົ້າລວມ, ເວົ້າສະເພາະ ກໍ່ແມ່ນສື່ສັງຄົມອອນລາຍ. ດັ່ງນັ້ນ, ຄຄອຊ ຈຶ່ງໄດ້ຊີ້ນຳຂະແໜງການກ່ຽວຂ້ອງ ໃຫ້ເອົາໃຈໃສ່ແກ້ໄຂບັນດາດ້ວຍຮູບການຕ່າງໆ ຢ່າງມີປະສິດທິພາບ, ເປັນຕົ້ນແມ່ນ ການສ້າງ ແລະ ນຳໃຊ້ບັນດານິຕິກຳ ທີ່ກ່ຽວຂ້ອງກັບການຄຸ້ມຄອງອິນເຕີເນັດ, ໂດຍສະເພາະ ກົດໝາຍວ່າດ້ວຍ ການຕ້ານ ແລະ ສະກັດກັ້ນອາດຊະຍາກໍາທາງຄອມພິວເຕີ ແລະ ດຳລັດ ວ່າດ້ວຍການຄຸ້ມຄອງຂໍ້ມູນຂ່າວສານຜ່ານອິນຕີເນັດ, ທີ່ຖືເປັນປາຍມີດອັນແຫຼມຄົມ, ຖືກນຳໃຊ້ເປັນບ່ອນອີງໃນການຈັດຕັ້ງປະຕິບັດວຽກງານຄວບຄຸມ ແລະ ຈຳກັດ ການນຳໃຊ້ສື່ສັງຄົມອອນລາຍໄປໃນທາງທີ່ຜິດ. ຕະຫຼອດ 01 ປີ ຜ່ານມາ ຄຄອຊ ສາມາດປະຕິບັດວຽກງານທີ່ພົ້ນເດັ່ນໄດ້ຫຼາຍດ້ານເປັນຕົ້ນແມ່ນ: ສໍາເລັດການສ້າງ ດຳລັດ ວ່າດ້ວຍລະບົບສາຍສົ່ງໂທລະຄົມມະນາຄົມ, ການເຜີຍແຜ່ກົດໝາຍ ວ່າດ້ວຍລາຍເຊັນເອເລັກໂຕຣນິກ (Electronic Signature), ການກະກຽມສ້າງແຜນຍຸດທະສາດການຫັນເປັນດິຈິຕອນ, ການສ້າງເສດຖະກິດດິຈິຕອນ ແລະ ການກຽມຄວາມພ້ອມເພື່ອກ້າວເຂົ້າສູ່ຍຸກອຸດສາຫະກໍາ 4.0. ນອກຈາກນີ້ ກໍ່ຍັງມີ ວຽກງານການເຜີຍແຜ່ຕອບຕ້ານ ແລະ ຕິດຕາມກວດກາ ບັນຫາສຽງທີ່ບໍ່ດີໃນສັງຄົມ ໂດຍສະເພາະແມ່ນຜ່ານຊ່ອງທາງ ສື່ສັງຄົມອອນລາຍ, ເຊິ່ງໃນນີ້ ບັນດາ ຂະແໜງການທີ່ກ່ຽວຂ້ອງ ກໍ່ໄດ້ເຄື່ອນໄຫວປູກຈິດສຳນຶກໃຫ້ແກ່ພະນັກງານ – ສັງຄົມໄດ້ຮັບຮູ້ ແລະ ເຂົ້າໃຈ, ສໍາເລັດການຈັດງານວາງສະແດງສິນຄ້າໄອຊີທີ Lao ICT Expo 2019, ສຳເລັດການຈັດກອງປະຊຸມລັດຖະມົນຕີໄອຊີທີອາຊຽນ ຄັ້ງທີ 19 (TELMIN19) ແລະ ກອງປະຊຸມເຈົ້າໜ້າທີ່ອາວຸໂສໄອຊີທີອາຊຽນ ຄັ້ງທີ 20 (TELSOM20) ທີ່ ສປປ ລາວ ເປັນເຈົ້າພາບ ທີ່ນະຄອນຫຼວງວຽງຈັນ ເຊິ່ງໃນກອງປະຊຸມດັ່ງກ່າວ ໄດ້ຕົກລົງປ່ຽນຊື່ເປັນ ກອງປະຊຸມລັດຖະມົນຕີດິຈິຕອນອາຊຽນ. ພ້ອມນັ້ນ ກໍ່ໄດ້ມີການລົງໂຄສະນາເຜີຍແຜ່ ຜົນດີຜົນຮ້າຍຂອງການນຳໃຊ້ ສື່ສັງຄົມອອນລາຍ ຢູ່ໂຮງຮຽນມັດທະຍົມ, ມະຫາວິທະຍາໄລຕ່າງໆ ຜ່ານສື່ ແລະ ເວັບໄຊ້ທາງການຂອງບາງຂະແໜງການ. ພ້ອມທັງ ປັບປຸງຄືນ ການເຂົ້າເຖິງການນຳໃຊ້ລະບົບອີເມວ ທີ່ຕິດຕັ້ງຢູ່ພາຍໃນປະເທດ ເພື່ອນຳສົ່ງ, ແລກປ່ຽນເອກະສານຕ່າງໆທາງເອເລັກໂຕຣນິກ ແລະ ຮັບປະກັນຄວາມປອດໄພ ໃຫ້ຫຼາຍຂຶ້ນ. ນອກນັ້ນ, ຍັງມີວຽກງານເຕັກນິກທີ່ຕິດພັນກັບ ການປ້ອງກັນຊາດ-ປ້ອງກັນຄວາມສະຫງົບ, ວຽກງານກວດກາການນໍາໃຊ້ຄື້ນຄວາມຖີ່ ແລະ ສັນຍານອິນເຕີເນັດທີ່ບໍ່ຖືກລະບຽບ, ວຽກງານການຂຶ້ນທະບຽນຊິມຄາດ ແລະ ວຽກງານການຄຸ້ມຄອງລັດຖະບານເອເລັກໂຕຣນິກ ທີ່ຈະອໍານວຍຄວາມສະດວກໃຫ້ແກ່ການເຮັດວຽກຂອງພາກລັດຖະບານ, ເກັບກໍາຂໍ້ມູນ, ການຕິດຕໍ່ສື່ສານພາຍໃນກົງຈັກລັດໃຫ້ມີປະສິດທິພາບ ແລະ ປະສິດທິຜົນກວ່າເກົ່າ.

         ໃນການນຳໃຊ້ໄອຊີທີ ເຂົ້າໃນວຽກງານການບໍລິຫານລັດຖະບານ, ປະຈຸບັນ ບາງຂະແໜງການກໍ່ໄດ້ນຳໃຊ້ຊ່ອງທາງອອນລາຍ ເພື່ອເຮັດໃຫ້ມີຄວາມສະດວກ, ວ່ອງໄວ ແລະ ທັນສະໄໝຂຶ້ນກວ່າເກົ່າ ເພື່ອກ້າວໄປສູ່ການສ້າງ ລັດຖະບານເອເລັກໂຕຣນິກ ໃນອະນາຄົດ ເປັນຕົ້ນ ກະຊວງ ປທສ ກໍ່ໄດ້ເປັນຫຼັກ ໃນການສະໜອງ ລະບົບອີເມວຂອງລັດຖະບານ, ລະບົບຫ້ອງການທັນສະໄໝ (eOffice), ລະບົບກອງປະຊຸມທາງໄກ (Video Conference), ລະບົບ Government-Web-Platform, ລະບົບ Government-Chat ໃຫ້ບັນດາກະຊວງ ແລະ ອົງການລັດຖະບານ ແຕ່ສູນກາງ ຈົນຮອດທ້ອງຖິ່ນ. ພ້ອມນັ້ນ, ໃນວຽກງານຈັດເກັບລາຍຮັບຂອງຂະແໜງການເງິນ, ການທະນາຄານກໍ່ມີການນໍາໃຊ້ ໄອຊີທີ ແລະ ເລີ່ມມີໜໍ່     ແໜງການນຳໃຊ້ລະບົບການເງິນເອເລັກໂຕຣນິກເທິງໂທລະສັບມືຖື ເພື່ອເຮັດໃຫ້ການຊຳລະສະສາງ ແລະ ການເກັບລາຍຮັບເຂົ້າງົບປະມານ ມີຄວາມໂປ່ງໃສ, ມີຄວາມສະດວກວ່ອງໄວ ແລະ ເກັບລາຍຮັບໄດ້ຫຼາຍຂຶ້ນ.

ສຳລັບທິດທາງແຜນການໃນຕໍ່ໜ້າ, ຄຄອຊ ໄດ້ມອບໃຫ້ກະຊວງ ປທສ ເປັນເຈົ້າການປະສານກັບທຸກພາກສ່ວນ ໃນການສ້າງແຜນຍຸດທະສາດ, ແຜນແມ່ບົດ ໃນການຫັນເປັນທັນສະໄໝທາງດ້ານດິຈິຕອນ ໃນ ສປປ ລາວ. ພ້ອມດຽວກັນນັ້ນ ກໍ່ມອບໃຫ້ ໃຫ້ກະຊວງ ປທສ ແລະ ຄະນະຮັບຜິດຊອບລັດຖະບານເອເລັກໂຕຣນິກ ປະສານສົມທົບກັນລະອຽດ ໃນການສືບຕໍ່ການສ້າງ ລັດຖະບານເອເລັກໂຕຣນິກ, ໂດຍສະເພາະກໍ່ແມ່ນການຂະຫຍາຍ ແລະ ສົ່ງເສີມການນຳໃຊ້ ລະບົບອີເມວຂອງລັດຖະບານ, ລະບົບຫ້ອງການທັນສະໄໝ (eOffice), ລະບົບກອງປະຊຸມທາງໄກ (Video Conference), ລະບົບ Government-Web-Platform, ລະບົບ Government-Chat ແລະ ອື່ນໆ ໃຫ້ກະຊວງ, ອົງການລັດຖະບານ ທັງໃນສູນກາງ ແລະ ທ້ອງຖິ່ນ ໄດ້ນຳໃຊ້ໃຫ້ເກີດປະໂຫຍດ, ສາມາດຮັກສາຄວາມປອດໄພ, ບໍ່ໃຫ້ຂໍ້ມູນຂອງລັດຖະບານ ຮົ່ວໄຫຼອອກນອກປະເທດ. ສືບຕໍ່ສ້າງນິຕິກຳ ດຳລັດລຸ່ມກົດໝາຍ ກ່ຽວກັບວຽກງານຄຸ້ມຄອງໄອຊີທີ ທີ່ຍັງເປັນຊ່ອງວ່າງ, ໂດຍສະເພາະ ນິຕິກຳຄຸ້ມຄອງ ການຄ້າຂາຍອອນລາຍ, ສື່ສັງຄົມອອນລາຍ ເພື່ອໃຫ້ກວມເອົາຊ່ອງທາງ, ວິທີການໃໝ່ ທີ່ເກີດຂຶ້ນ ແລະ ຖືກນຳໃຊ້ຫຼາຍໃນສັງຄົມ ເປັນແຕ່ລະໄລຍະ. ໃຫ້ທຸກພາກສ່ວນປະສານສົມທົບກັນ ໃນການຊຸກຍູ້ ສົ່ງເສີມ ແລະ ຜັກດັນວຽກງານສ້າງຈິດສຳນຶກ, ການເຜີຍແຜ່ຕອບຕ້ານ, ກວດກາຕິດຕາມ ຫາງສຽງສັງຄົມ ຜ່ານສື່ຕ່າງໆ ເພື່ອເຮັດໃຫ້ການຈັດຕັ້ງປະຕິບັດ ມີຄວາມຮັດກຸມ, ລະອຽດ, ຮອບຄອບ ຂຶ້ນກວ່າເກົ່າ. ສືບຕໍ່ວຽກງານການເຄື່ອນໄຫວຖອດຖອນບົດຮຽນ ແລະ ກໍ່ສ້າງບຸກຄະລາກອນ ໃຫ້ມີຄວາມສາມາດສູງຂຶ້ນ ໃນວຽກງານການຄຸ້ມຄອງອິນເຕີເນັດ. ຊຸກຍູ້ ຜັກດັນ ໃຫ້ວຽກງານເຕັກນິກທີ່ຕິດພັນກັບວຽກງານປ້ອງກັນຊາດ-ປ້ອງກັນຄວາມສະຫງົບ ໃຫ້ມີຜົນສຳເລັດ ແລະ ປະກົດຜົນເປັນຈິງ.

             ຂ່າວ: ສອຊ, ປທສ./21/01/2020