ພິທີເຊັນສັນຍາ MOU ລະຫວ່າງ ລລທ ແລະ ກະຊວງ ປທສ.

ໃນຕອນບ່າຍ ຂອງວັນທີ່ 18 ມີນາ 2021 ນີ້, ທີ່ສຳນັກງານໃຫຍ່ ບໍລິສັດ ລາວໂທລະຄົມມະນາຄົມ ມະຫາຊົນ (ລລທ) ໄດ້ມີພິທີເຊັນບົດບັນທຶກຄວາມເຂົ້້າໃຈການຮ່ວມມືກັນລະຫວ່າງ ບໍລິສັດ ລາວໂທລະຄົມມະນາຄົມ ມະຫາຊົນ ແລະ ກະຊວງໄປສະນີ, ໂທລະຄົມມະນາຄົມ ແລະ ການສື່ສານ (ປທສ). ໃຫ້ກຽດເຂົ້າຮ່ວມໂດຍ ທ່ານ ປອ ທັນສະໄໝ ກົມມະສິດ ລັດຖະມົນຕີກະຊວງ ປທສ, ທ່ານ ສຸພົນ ຈັນທະວີໄຊ ຜູ້ອຳນວຍການໃຫຍ່ ລລທ ພ້ອມດ້ວຍຄະນະກົມ, ຄະນະສູນ, ອົງການ, ຫ້ອງການ ອ້ອມຂ້າງກະຊວງ ປທສ, ຄະນະຜູ້ບໍລິຫານ ລລທ ແລະ ບໍລິສັດໃນເຄື່ອ.

           ເປັນກຽດລົງນາມພິທີເຊັນສັນຍາ MOU ຄັ້ງນີ້ໂດຍ: ທ່ານ ປອ ທະວີສັກ ມະໂນທັມ ຫົວໜ້າ ສູນບໍລິຫານລັດດ້ວຍເອເລັກໂຕນິກ ກະຊວງໄປສະນີ ໂທລະຄົມມະນາຄົມ ແລະ ການສື່ສານ ແລະ ທ່ານ ສຸພົນ ຈັນທະວີໄຊ ຜູ້ອຳນວຍການໃຫຍ່ ບໍລິສັດ ລາວໂທລະຄົມມະນາຄົມ ມະຫາຊົນ ເພື່ອຕົກລົງຮ່ວມມື ຈັດງານແຂ່ງຂັນ Makerthon  Lao, ຮ່ວມມືພັດທະນາລະບົບບໍລິຫານ ແລະ ບໍລິການລັດແບບ Digital  ເຊິ່ງ ລລທ ຈະເປັນແມ່ງານໃນການຈັດງານ.  ການຮ່ວມມືໃນການຈັດງານ Makerthone Lao ໃນຄັ້ງນີ້ ກໍ່ແມ່ນເພື່ອກ້າວໄປສູ່ການເຂົ້າຮ່ວມການແຂ່ງຂັນລະດັບ ASEAN  ແລະ ຄໍາວ່າ Makerthon ເປັນການນຳເອົາ ຄຳສອງຄຳ ມາລວມກັນຄື Maker ແລະ Marathon.
ຊຶ່ງງານ Makerthon  ຄືງານແຂ່ງຂັນ ທີ່ເປີດໂອກາດໃຫ້ນັກປະດິດ ສາຍໄອທີ ໃນປະເທດລາວໄດ້ມີພື້ນທີ່ສະແດງຄວາມຄິດສ້າງສັນໃນການຄິດຄົ້ນ ແລະ ພັດທະນານະວັດຕະກຳໃໝ່ໆອອກມາຮັບໃຊ້ສັງຄົມ ໂດຍທີ່ຫົວໃຈຫຼັກຂອງງານຄືການຮຽນຮູ້ ຫຼາຍກວ່າຜົນຂອງການແຂ່ງຂັນ.

        ພາບ+ຂ່າວ: ຫ້ອງການກະຊວງເຕັກ​ໂນ​ໂລ​ຊີ ແລະ ການ​ສື​່​ສານ/19/03/2021