ກອງປະຊຸມສັບປະດາສາກົນດ້ານໄຊເບີຂອງສີງກະໂປ (SICW) ຄັ້ງທີ 07 ແລະ ກອງປະຊຸມ ລັດຖະມົນຕີອາຊຽນດ້ານຄວາມປອດໄພໄຊເບີ (AMCC) ຄັ້ງທີ 07

ກະຊວງເຕັກໂນໂລຊີ ແລະ ການສື່ສານ (ກຕສ) ຊຶ່ງນຳໂດຍ ທ່ານ ປອ. ສັນຕິສຸກ ສິມມາລາວົງ, ຮອງລັດຖະມົນຕີ ກະຊວງເຕັກໂນໂລຊີ ແລະ ການສື່ສານ ພ້ອມດ້ວຍຄະນະ ໄດ້ເຂົ້າຮ່ວມກອງປະຊຸມ ສັບປະດາສາກົນດ້ານໄຊເບີ ຂອງ ສິງກະໂປ (SICW) ຄັ້ງທີ 07 ແລະ ກອງປະຊຸມສຳມະນາ ລັດຖະມົນຕີອາຊຽນດ້ານຄວາມປອດໄພໄຊເບີ (AMCC) ຄັ້ງທີ 07 ທີ່ປະເທດ ສິງກະໂປ ໃນລະຫວ່າງວັນທີ 18-20 ຕຸລາ 2022 ນີ້, ຈັດຂຶ້ນໂດຍ ອົງການຄວາມປອດໄພທາງໄຊເບີຂອງ ສິງກະໂປ(Cyber Security Agency of Singapore) ຊຶ່ງເປັນປະທານໂດຍ ທ່ານ ນາງ JOSEPHINE TEO, ລັດຖະມົນຕີ ກະຊວງຂໍ້ມູນຂ່າວສານ ແລະ ການສື່ສານ ແລະ ລັດຖະມົນຕີຮັບຜິດຊອບດ້ານຄວາມປອດໄພທາງໄຊເບີ ຂອງ ປະເທດ ສິງກະໂປ, ມີບັນດາລັດຖະມົນຕີດ້ານໄອຊີທີອາຊຽນ ລວມທັງເລຂາທິການໃຫຍ່ອາຊຽນ, ອົງການຈັດຕັ້ງສາກົນ, ຜູ້ນຳຈາກບັນດາອຸດສາຫະກຳ, ສະຖາບັນການສຶກສາ ແລະ ອົງການຈັດຕັ້ງທີ່ບໍ່ຂຶ້ນກັບລັດຖະບານເຂົ້າຮ່ວມ

ກອງປະຊຸມດັ່ງກ່າວຈັດຂຶ້ນພາຍໃຕ້ຄຳຂວັນ: “ຮັກສາຄວາມປອດໄພໃນໂລກດິຈິຕອນ: ການມີຄວາມຮັບຜິດຊອບຮ່ວມກັນ” (Digital Security: A shared responsibility) ຊຶ່ງກອງປະຊຸມດັ່ງກ່າວ ໄດ້ປຶກສາຫາລື ແນວທາງ ແລະ ວິທີການຮັບມືຮ່ວມກັບຫຼາຍພາກສ່ວນ ເປັນຕົ້ນແມ່ນ ຂະແໜງອຸດສາຫະກຳ, ອົງການຈັດຕັ້ງສາກົນ ແລະ ວິສາຫະກິດຕ່າງໆ ທີ່ນຳໃຊ້ປະໂຫຍດຈາກການຫັນເປັນ ດິຈິຕອນ ເພື່ອກຽມພ້ອມ ຮັບມືກັບໄພຄຸກຄາມທາງໄຊເບີທີ່ນັບມື້ນັບເພີ່ມຂຶ້ນເລື້ອຍໆ ໂດຍສະເພາະແມ່ນ ຄວາມສັບຊ້ອນທີ່ເພີ່ມຂຶ້ນຂອງການນຳໃຊ້ລະຫັດດິຈິຕອນ(digital domain), ການແກ້ໄຂຂໍ້ຂັດແຍ່ງລະຫວ່າງເຂດພູມສັນຖານໃຫ້ມີຄວາມ ຫົດຢືດ, ປອດໄພ ແລະ ຮັບປະກັນໃຫ້ສາມາດຂັບເຄື່ອນປະເທດຊາດກ້າວເຂົ້າສູ່ຍຸກເສດຖະກິດຈິຕອນທີ່ທັນສະໄໝ ແລະ ສະຫງົບສຸກ.

       ບັນຫາພົ້ນເດັ່ນທີ່ຍົກເປັນຫົວຂໍ້ບູລິມະສິດໃນການສົນທະນາຮ່ວມກັນຄື: ການເສີມສ້າງຄວາມເຂັ້ມແຂງດ້ານ ການຮ່ວມມືກັບບັນດາຄູ່ຮ່ວມຫຼາຍຝ່າຍ ທີ່ແນ່ໃສ່ການເຮັດວຽກຮ່ວມກັນເພື່ອຈັດການກັບໄພຄຸກຄາມທາງໄຊເບີ ລວມເຖິງບັນຫາທີ່ຕິດພັນເປັນຕົ້ນແມ່ນ: 1) ການແລກປ່ຽນທັດສະນະ ແລະ ມຸມມອງດ້ານຄວາມປອດໄພທາງໄຊເບີໃນຍຸກ ປັດຈຸບັນ; 2) ປຶກສາຫາລື ກ່ຽວກັບ ການນໍາໃຊ້ ICTs ໃຫ້ມີຄວາມປອດໄພ ທີ່ລວມເຖິງ ການພັດທະນາບັນດາລະບຽບການ, ນະໂຍບາຍ ແລະ ບັນຖັດຖານ ໃນການຄຸ້ມຄອງໃຫ້ມີຄວາມເຂັ້ມແຂງ; ແລະ 3) ອັບເດດຂໍ້ມູນຂ່າວສານ ກ່ຽວກັບ ການຈັດຕັ້ງປະຕິບັດບັນດາກິດຈະກຳທີ່ເຮັດຮ່ວມກັນຂອງບັນດາປະເທດສະມາຊິກອາຊຽນ ໂດຍສະເພາະການເຂົ້າຮ່ວມໂຄງການຝຶກອົບຮົມ ASCCE ແລະ AJCCBC ທີ່ແນ່ໃສ່ສົ່ງເສີມການສ້າງຂີດຄວາມສາມາດໃນການປ້ອງກັນການໂຈມຕີທາງໄຊເບີ, ແລກປ່ຽນຂໍ້ມູນຂ່າວສານ ດ້ານວິຊາການ, ຊອກຫາແນວທາງໃນການແກ້ໄຂບັນຫາຮວ່ມກັນ, ປ້ອງກັນ ແລະ ຮັບມືກັບໄພຄຸກຄາມທາງໄຊເບີ ທີ່ອາດຈະເກີດຂື້ນທັງໃນປັດຈຸບັນ ແລະ ໃນຕໍ່ໜ້າ. ນອກນີ້, ທີ່ປະຊຸມຍັງໄດ້ໂອ້ລົມ ແລະ ລາຍງານຄວາມຄືບໜ້າຂອງການຈັດຕັ້ງປະຕິບັດວຽກໃນໄລຍະຜ່ານມາໃຫ້ທີ່ປະຊຸມຮັບຊາບ ເພື່ອລາຍງານຕໍ່ໃນກອງປະຊຸມຂັ້ນ ADGMIN ທີ່ຈະຈັດຂຶ້ນເປັນປະຈຳໃນທຸກໆປີ.