ກອງປະຊຸມສຳມະນາການຄຸ້ມຄອງໂຄງການ ໄອຊີທີ ແລະ ໂຄງສ້າງລະບົບການດຳເນີນງານຂອງລັດຖະບານ

ໃນຕອນເຊົ້າຂອງວັນທີ 21 ຕຸລາ 2022, ທີ່ຫ້ອງປະຊຸມຂອງກະຊວງເຕັກໂນໂລຊີ ແລະ ການສື່ສານ (ກຕສ), ສູນບໍລິຫານລັດດິຈິຕອນ, ກຕສ ໄດ້ຈັດກອງປະຊຸມສຳມະນາການຄຸ້ມຄອງໂຄງການໄອຊີທີ (ICT Project Management) ແລະ ໂຄງສ້າງລະບົບການດຳເນີນງານຂອງລັດຖະບານ (Government Enterprise Architecture (GEA)) ຮ່ວມກັບອົງການສົ່ງເສີມອຸດສາຫະກໍາ ໄອທີ ແຫ່ງຊາດ ຂອງ ສ.ເກົາຫຼີ (ອົງການ NIPA) ປະເທດ ສ.ເກົາຫຼີ ໂດຍການເປັນປະທານ ຂອງ ທ່ານ ນ. ຈິດຕະພອນ ຈັນສີລິລາດ, ຮອງຫົວໜ້າສູນບໍລິຫານລັດດິຈິຕອນ, ກຕສ, ມີຜູ້ຕາງໜ້າເຂົ້າຮ່ວມຈາກຫ້ອງການ ແລະ ບັນດາກົມ/ທຽບເທົ່າ ພາຍໃນ ກຕສ ຈຳນວນ 50 ທ່ານ.

ການສຳມະນາຄັ້ງນີ້ ແມ່ນໜຶ່ງກິດຈະກໍາທີ່ນອນໃນແຜນການຮ່ວມມືກັບອົງການ NIPA, ຊຶ່ງມີຈຸດປະສົງເພື່ອສຶກສາ ແລະ ຮຽນຮູ້ ກ່ຽວກັບການຄຸ້ມຄອງໂຄງການ ICT Project Management ມາໝູນໃຊ້ໃນວຽກງານການບໍລິຫານລັດດິຈິຕອນ ແລະ ເພື່ອສຶກສາໂຄງສ້າງລະບົບການດຳເນີນງານຂອງລັດຖະບານ ຫຼື Government Enterprise Architecture (GEA) ທີ່ເປັນການກຳນົດໂຄງສ້າງ ແລະ ວິທີການດຳເນີນງານທັງໝົດຂອງລັດຖະບານ ເຊັ່ນ: ແຜນແມ່ບົດ (Master plan), GEA ຈະເປັນຄືໂຄງສ້າງ ການເຮັດວຽກຂອງລັດຖະບານດິຈິຕອນ ວ່າຕ້ອງໄດ້ຄຳນຶງເຖິງຈຸດໃດແດ່ ແລະ ການເຊື່ອມຕໍ່ປະສານງານ ເຮັດວຽກນຳກັນ ຕ້ອງແມ່ນແນວໃດ. ປັດຈຸບັນ GEA ແມ່ນນິຍົມໃຊ້ຫຼາຍໃນ ສ.ເກົາຫຼີ ແລະ ບັນດາປະເທດຕ່າງໆ. ຊຶ່ງນັກສຳມະນາກອນແມ່ນໄດ້ຮຽນຮູ້ກ່ຽວກັບ GEA ຂັ້ນພື້ນຖານ ລວມເຖິງການເອົາມານຳໃຊ້ຕົວຈິງຢູ່ ສ.ເກົາຫຼີ ຫຼື Korean GEA (Government-wide EA) ຄືແນວໃດ.

ກອງປະຊຸມຄັ້ງນີ້ ແມ່ນເປັນບົດຮຽນອັນໜຶ່ງທີມີຄວາມໝາຍຄວາມສຳຄັນໃນການແລກປ່ຽນຄວາມຮູ້ ແລະ ປະສົບການຂອງການພັດທະນາເຕັກໂນໂລຊີ ລະຫວ່າງ ສອງປະເທດ ລາວ ແລະ ສ.ເກົາຫຼີ ພ້ອມທັງຖອດຖອນບົດຮຽນ ຈາກ ປະເທດ ສ. ເກົາຫຼີ ທີ່ເປັນຜູ້ນຳການພັດທະນາເຕັກໂນໂລຊີ ໄອຊີທີ  ໃນໂລກເພື່ອມາປະຍຸກນຳໃຊ້ໃນການພັດທະນາ ໄອຊີທີໃນປະເທດລາວ.

ບົດຂ່າວ: ສູນບໍລິຫານລັດດິຈິຕອນ

ພາບ: ນ. ທັດສະນີ ພົງບັນດິດ