ກອງປະຊຸມເຈລະຈາປັບປຸງສັນຍາການຄ້າເສລີ ອາຊຽນ-ອົດສະຕາລີ-ນິວຊີແລນ (AANZFTA)

ອົງການດັດສົມໂທລະຄົມມະນາຄົມ, ກະຊວງເຕັກໂນໂລຊີ ແລະ ການສື່ສານ ໄດ້ເຂົ້າຮ່ວມກອງປະຊຸມ ເຈລະຈາ ປັບປຸງສັນຍາການຄ້າເສລີ ອາຊຽນ-ອົດສະຕາລີ-ນິວຊີແລນ (ASEAN-Australia New Zealand Free Trade Agreement AANZFTA) ວຽກໂທລະຄົມມະນາຄົມ ຄັ້ງທີ 4 ຊຶ່ງເປັນກອງປະຊຸມຕໍ່ເນື່ອງຕາມ ແຜນເຄື່ອນໄຫວຂອງປີ 2022 ໄດ້ຈັດຂື້ນໃນ ວັນທີ 21 ແລະ 25 ກຸມພາ 2022 ຜ່ານມານີ້, ຫົວໜ້າຄະນະຝ່າຍ ລາວເຂົ້າຮ່ວມນຳໂດຍທ່ານ ປອ. ນາງ ໃຈມາລີ ພະກະຊຸມ, ຮອງຫົວຫນ້າອົງການດັດສົມໂທລະຄົມມະນາຄົມ ພ້ອມດ້ວຍ ພະນັກງານທີ່ກ່ຽວຂ້ອງ.

     ຈຸດປະສົງຂອງກອງປະຊຸມດັ່ງກ່າວແມ່ນ ເພື່ອສືບຕໍ່ປຶກສາຫາລື ກ່ຽວກັບການຍົກລະດັບເອກະສານພາກໂທລະ ຄົມມະນາຄົມໃນກອບສັນຍາການຄ້າເສລີດັ່ງກ່າວ ໂດຍໃນຮອບນີ້ແມ່ນໄດ້ລົງເລິກໃສ່ການປະກອບຄຳເຫັນໃນຈຸດທີ່ຍັງຄົງຄ້າງ ຊຶ່ງຜ່ານບົດຄວາມສະເໜີໂດຍ ຂອງ ປະເທດອົດສະຕາລີ ແລະ ນິວຊີແລນ ຕໍ່ກັບເອກະສານຄັດຕິດພາກໂທລະດົມໂດຍມີລາຍລະອຽດປະກອບມີຄື: ການຂາຍຄື້ນ (resale), ຄວາມໂປ່ງໃສ (Transparency), ການແຍກສ່ວນຂອງໂຄງປະກອບເຄືອຂ່າຍ (Unbundling of Network Elements) ແລະ ການບັງຄັບໃຊ້ (Enforcement) ຊື່ງໂດຍລວມ ອາຊຽນ ແລະ ປະເທດຄູ່ເຈລະຈາແມ່ນເຫັນດີຕໍ່ການປັບປຸງບາງຈຸດເພື່ອໃຫ້ສອດຄ່ອງກັນ ກອບສັນຍາຕ່າງໆທີ່ມີຢູ່ແລ້ວ, ແຕ່ຍັງມີບາງຂໍ້ຂ້ອງໃຈທີ່ອາຊຽນໄດ້ສະເໜີຂໍຄວາມກະຈ່າງແຈ້ງຕື່ມກ່ຽວກັບການປະຕິບັດໃນ ການປະຕິບັດພັນທະຈາກອົດສະຕາລີ ແລະ ນິວຊີແລນ ລະອຽດຕື່ມ ຊຶ່ງຈະມີການຈັດກອງປະຊຸມຕໍ່ເນື່ອງໃນກາງປີ 2022 ນີ້.

ພາບ ແລະ ຂ່າວ: ພະແນກດັດສົມໂທລະຄົມມະນາຄົມ ແລະ ອິນເຕີເນັດ/ 07/03/2022