ໄອທີລາວ
ກອງປະຊຸມເວທີສົນທະນາ ການເຊື່ອມໂຍງທາງດ້ານເຕັກໂນໂລຊີ, ສະຕາດອັບ ແລະ ນະວັດຕະກຳ
Jun
ໃນຕອນເຊົ້າຂອງວັນທີ 05 ເມສາ 2023ນີ້, ທີ່ຫ້ອງປະຊຸມໃຫຍ່ ສູນຮ່ວມມືສາກົນ ແລະ ການຝືກອົບຮົມ (ICTC), ນະຄອນຫຼວງວຽງຈັນ ໄດ້ມີເວທີສົນທະນາ ການເຊື່ອມໂຍງທາງດ້ານເຕັກໂນໂລຊີ, ສະຕາດອັບ ແລະ ນະວັດຕະກຳ ຊຶ່ງຈັດໂດຍ ກະຊວງເຕັກໂນໂລຊີ ແລະ ການສື່ສານ (ກຕສ), ສປປ ລາວ ຮ່ວມກັບ ກະຊວງວິທະຍາສາດ ແລະ ເຕັກໂນໂລຊີ, ສສ ຫວຽດນາມ. ໃຫ້ກຽດເຂົ້າຮ່ວມໂດຍ ທ່ານ ປອ. ສັນຕິສຸກ ສີມມາລາວົງ, ຮອງລັດຖະມົນຕີກະຊວງເຕັກໂນໂລຊີ ແລະ ການສື່ສານ, ທ່ານ ແກ້ວວິສຸກ ໂສລະພົມ, ຮອງລັດຖະມົນຕີກະຊວງເຕັກໂນໂລຊີ ແລະ ການສື່ສານ, ທ່ານ ເຈິນ ວັນ ຕຸ່ງ, ຮອງລັດຖະມົນຕີ ກະຊວງວິທະຍາສາດ ແລະ ເຕັກໂນໂລຊີ, ສສ ຫວຽດນາມ, ມີບັນດາທ່ານຫົວໜ້າກົມ/ທຽບເທົ່າ ຈາກກະຊວງເຕັກໂນໂລຊີ ແລະ ການສື່ສານ, ສປປ ລາວ ແລະ ຈາກກະຊວງວິທະຍາສາດ ແລະ ເຕັກໂນໂລຊີ ສສ ຫວຽດນາມ, ຜູ້ຕາງໜ້າຈາກພາກລັດ ແລະ ເອກະຊົນ ຫຼາຍກວ່າ 100 ຄົນ.
ກອງປະຊຸມເວທີສົນທະນາ ການເຊື່ອມໂຍງທາງດ້ານເຕັກໂນໂລຊີ, ສະຕາດອັບ ແລະ ນະວັດຕະກຳ ໃນຄັ້ງນີ້, ຖືເປັນໂອກາດທີ່ດີ ແລະ ໄດ້ມີການເຊື້ອເຊີນບັນດາສະຖາບັນການຄົ້ນຄວ້າ, ສະຖາບັນການສຶກສາ, ພາກສ່ວນທຸລະກິດ ແລະ ຜູ້ປະກອບກິດຈະການ ທຸລະກິດສະຕາດອັບ ທີ່ມີຊື່ສຽງ ຂອງ ລາວ-ຫວຽດນາມ ເຂົ້າຮ່ວມສົນທະນາແລກປ່ຽນບົດຮຽນ, ຊຶ່ງໄດ້ມີການນຳສະເໜີຫຼາຍຫົວ ເປັນຕົ້ນເຊັ່ນ: ການນຳສະເໜີນະໂຍບາຍສະໜັບສະໜູນ ການເລືອກເຟັ້ນການຖ່າຍທອດ ແລະ ການເປັນເຈົ້າຂອງນະວັດຕະກຳ, ກອບການຮ່ວມມື ລະຫວ່າງນັກວິທະຍາສາດ ແລະ ຫົວໜ່ວຍທຸລະກິດ, ວິທີແກ້ໄຂ ແລະ ສະໜັບສະໜູນໃຫ້ແກ່ຫົວໜ່ວຍວິສະຫາກິດ ເພື່ອຄົ້ນຫາ ແລະ ຮັບຮອງ ໃຫ້ເປັນເຈົ້້າຂອງເຕັກໂນໂລຊີ ແລະ ວິທີການພັດທະນາ ນະວັດຕະກຳ ໃຫ້ແກ່ລະບົບນິເວດ ສະຕາດອັບ.
ກອງປະຊຸມເວທີສົນທະນາຄັ້ງນີ້, ຖືເປັນໂອກາດອັນດີໃຫ້ແກ່ການນຳກະຊວງເຕັກໂນໂລຊີ ແລະ ການສື່ສານ, ສປປ ລາວ ແລະ ກະຊວງ ວິທະຍາສາດ ແລະ ເຕັກໂນໂລຊີ, ສສ ຫວຽດນາມ ໂດຍສະເພາະແມ່ນບັນດານັກວິທະຍາສາດ, ນັກຄົ້ນຄວ້າ, ນັກຊ່ຽວຊານ, ຜູ້ປະກອບການ ນັກທຸລະກິດ ແລະ ນັກລົງທຶນຈະໄດ້ແລກປ່ຽນບົດຮຽນເຊິ່ງກັນ ແລະ ກັນ ໃນການສ້າງນະໂຍບາຍ ແລະ ການຈັດຕັ້ງປະຕິບັດການເລືອກເຟັ້ນ, ການຖ່າຍທອດ, ສະຕາດອັບ ແລະ ນະວັດຕະກຳ ແລກປ່ຽນບັນດາຂໍ້ຫຍຸ້ງຍາກ ແລະ ສິ່ງທ້າທາຍໃນການຮ່ວມມືສາກົນດ້ານວິທະຍາສາດ ແລະ ເຕັກໂນໂລຊີ ແລະ ການເປີດກວ້າງຕະຫຼາດຢູ່ພາຍໃນ ແລະ ຕ່າງປະເທດ.
ແຫຼ່ງ: ກະຊວງເຕັກໂນໂລຊີ ແລະ ການສື່ສານ