ຄະນະຜູ້ແທນກະຊວງເຕັກໂນໂລຊີ ແລະ ການສື່ສານ ສປປ ລາວ ເຂົ້າຮ່ວມກອງປະຊຸມລັດຖະມົນຕີ ດິຈິຕອນ ອາຊຽນ ຄັ້ງທີ 3 ແລະ ກອງປະຊຸມປິ່ນອ້ອມ ທີ່ປະເທດ ຟີລິບປີນ

ໃນລະຫວ່າງວັນທີ 06-10 ກຸມພາ 2023 ຜ່ານມານີ້, ທ່ານ ແກ້ວວິສຸກ ໂສລະພົມ, ຮອງລັດຖະມົນຕີ ກະຊວງເຕັກໂນໂລຊີ ແລະ ການສື່ສານ ໄດ້ນໍາພາຄະນະຜູ້ແທນ ສປປ ລາວ ເຂົ້້າຮ່ວມກອງ​ປະ​ຊຸມ ລັດຖະມົນຕີ ດິຈິຕອນອາຊຽນ (ADGMIN) ຄັ້ງທີ 3 ແລະ ກອງປະຊຸມປິ່ນອ້ອມ (The 3^rd  ASEAN Digital Ministers Meeting and Related Meetings), ເປັນເຈົ້າພາບໂດຍ ຟິລິບປີນ ພາຍໃຕ້ຄຳຂວັນ: ‘‘ການເຮັດວຽກຮ່ວມກັນເພື່ອອະນາຄົດດິຈິຕອນທີ່ຍືນຍົງ” (Synergy Towards a Sustainable Digital Future).

   ກອງປະຊຸມຄັ້ງນີ້ ໄດ້ຈັດຂຶ້ນແບບເຊິ່ງໜ້າ ໂດຍການເປັນປະທານຂອງ ທ່ານ ອີວານ ຈອນ ອີ ອຸຍ (Ivan John E. Uy), ລັດ​ຖະ​ມົນ​ຕີ​ກະ​ຊວງເຕັກໂນໂລຊີຂໍ້ມູນຂ່າວສານ ແລະ ການສື່ສານ​, ຟິລິບປີນ​ ແລະ ທ່ານ ຈານິນ ອາລູຊາ ປຸທຸເຊອາຣີ (Janil Arusha Puthucheary), ລັດຖະມົນຕີ ອາວຸໂສ ກະ​ຊວງ ການ​ສື່​ສານ ​ແລະ ​ຂໍ້​ມູນ​ຂ່າວ​ສານ, ​ສິງ​ກະ​ໂປ ເປັນຮອງປະທານ, ພ້ອມດ້ວຍບັນດາ​ລັດຖະມົນຕີ ແລະ ຮອງລັດຖະມົນຕີ​ ດິຈິຕອນ ອາຊຽນ, ເຈົ້າໜ້າທີ່ອາວຸໂສ ດິຈິຕອນ ອາຊຽນ ພ້ອມກັບ ບັນດາປະເທດ​ຄູ່​ຮ່ວມ​ມື​ ແລະ ທ່ານ ເລຂາທິການໃຫຍ່ອາຊຽນ ເຂົ້າຮ່ວມ.  

ໂອກາດນີ້, ທ່ານ ແກ້ວວີສຸກ ໂສລະພົມ ໄດ້ກ່າວມີຄຳເຫັນ ແລະ ຊົມເຊີຍ ຟິລິບປີນ ໃນຖານະ​ປະ​ທານກອງປະຊຸມ ແລະ ພ້ອມມີ​ສ່ວນ​ຮ່ວມ​ຢ່າງຕັ້ງຫນ້າ ໃນການ​ຊຸກ​ຍູ້​ການ​ຫັນ​ເປັນ​ດິ​ຈິ​ຕອນ​ໃນ​ບັນ​ດາປະເທດ​ອາ​ຊຽນ ແລະ​ ປະ​ຕິ​ບັດແຜນແມ່ບົດດິຈິຕອນອາຊຽນ 2025 (ADM2025) ຢ່າງ​ມີ​ໝາກ​ຜົນ ໂດຍໄດ້ເນັ້ນວ່າ: ພວກເຮົາມາຮອດປີທີສອງຂອງການຈັດຕັ້ງປະຕິບັດແຜນແມ່ບົດດ້ານດິຈິຕອນອາຊຽນ 2025, ໃນໄລຍະທີ່ ທຸກປະເທດພວມສູ້ຊົນ ແລະ ຟື້ນຟູຈາກການແຜ່ລະບາດຂອງພະຍາດ COVID-19 ​ເຖິງ​ວ່າ​ຈະ​ປະສົບ​ກັບ​ຄວາມ​ຫຍຸ້ງຍາກ​ກໍ່ຕາມ, ​ແຕ່​ພວກ​ເຮົາຍັງສາມາດ​ປະຕິບັດ​ຫຼາຍ​ກິດຈະກຳ​ພາຍ​ໃຕ້​ຂະ​ແໜງ​ດິຈິ​ຕອນຂອງ​ອາ​ຊຽນໄດ້ຕາມຄາດໝາຍໄປຄຽງຄູ່ກັບການພັດທະນາພາຍໃນຂອງຕົນ. ສຳລັບ ສປປ ລາວ ທາງ ກະຊວງ ເຕັກໂນໂລຊີ ແລະ ການສື່ສານ ສາມາດຍາດມາໄດ້ຫຼາຍຜົນງານທີ່ພົ້ນເດັ່ນເພື່ອສ້າງການຫັນປ່ຽນທາງດ້ານດິຈິຕອນແຫ່ງຊາດ ໂດຍສາມເສົາຄໍ້າ ຄື: 1. ລັດຖະບານດິຈິຕອນ; 2. ເສດຖະກິດດິຈິຕອນ; 3. ສັງຄົມດິຈິຕອນ ເພື່ອຜັນຂະຫຍາຍແຜນ​ພັດທະນາເສດຖະກິດດິຈິຕອນແຫ່ງຊາດ ໄລຍະ 05 ປີ (2021-2025) ເປົ້າໝາຍລວມຂອງຄວາມພະຍາຍາມຂອງພວກເຮົາແມ່ນການສ້າງພື້ນຖານເສດຖະກິດໃຫ້ເຂັ້ມແຂງ ແລະ ສາມາດກຸ້ມຕົນເອງທາງດ້ານເສດຖະກິດ ເພື່ອປະກອບສ່ວນໃນພາລະກິດລະດັບຊາດ ທີ່ໄດ້ຮັບການມອບໝາຍຈາກລັດຖະບານ ໂດຍຖືເອົາກາລະໂອກາດຂອງເຕັກໂນໂລຊີດິຈິຕອນ ໄປຄຽງຄູ່ກັບການພັດທະນາຊັບພະຍາກອນມະນຸດທີ່ມີຄຸນນະພາບ ເປັນປັດໄຈຫຼັກໃນການພັດທະນາເສດຖະກິດ-ສັງຄົມ ທີ່ສອດຄ່ອງກັບທິດທາງແຜນແມ່ບົດດິຈິຕອນອາຊຽນ 2025 ກໍຄືທິດທາງລວມທີ່ວາງໄວ້.

ກອງປະຊຸມໄດ້ດຳເນີນໄປດ້ວຍບັນຍາກາດທີ່ມີຄວາມໝາຍ ໂດຍໄດ້ຍົກເອົາຫຼາຍຫົວຂໍ້ຂຶ້ນມາປຶກສາຫາລືຮ່ວມກັນ ໂດຍສະເພາະ ໝາກຜົນຂອງການຮ່ວມມືອາຊຽນ ກັບປະເທດຄູ່ຮ່ວມມື ແລະ ພາຍໃນອາຊຽນດ້ວຍກັນ ໃນໄລຍະຜ່ານມາ. ພ້ອມນັ້ນ, ກອງປະຊຸມຍັງໄດ້ປຶກສາຫາລື ແລະ ແລກປ່ຽນຄຳຄິດເຫັນ ເພື່ອວາງທິດທາງການຮ່ວມມືໃນຕໍ່ໜ້າ ໂດຍສະເພາະການຮ່ວມມືໃນການຟື້ນຟູ ແລະ ພັດທະນາເສດຖະກິດ-ສັງຄົມ ໂດຍການນໍາໃຊ້ເຕັກໂນໂລຊີດິຈິຕອນ ພາຍຫຼັງການແຜ່ລະບາດຂອງເຊື້ອພະຍາດ ໂຄວິດ-19 ເພື່ອປັບປຸງຊີວິດການເປັນຢູ່ຂອງປະຊາຊົນໃຫ້ດີຂຶ້ນ ແລະ ສາມາດປັບໂຕໄດ້ເຂົ້າກັບສະພາບວິຖີຊີວິດແບບໃໝ່ ໃນການຜັນຂະຫຍາຍບັນດາຄາດໝາຍດັ່ງກ່າວ ສປປ ລາວ ກໍຄື ກະຊວງ ເຕັກໂນໂລຊີ ແລະ ການສື່ສານ ຈະໄດ້ຕາງໜ້າດຳເນີນ 02 ກິດຈະກຳ ໃນສົກປີ 2023 ຄື:  ການກໍານົດທາງເລືອກທາງດ້ານນະໂຍບາຍເພື່ອປັບປຸງການດຶງດູດການລົງທຶນ  ແລະ ການສຶກສາ ກ່ຽວກັບການກໍານົດຕົວຕົນດິຈິຕອນໃນອາຊຽນ, ການວິເຄາະ ແລະ ແນະນໍາການເຊື່ອມຕໍ່ ID ດິຈິຕອນຂອງອາຊຽນ;

ນອກຈາກນີ້, ຄະນະຜູ້ແທນຍັງໄດ້ພົບປະສອງຝ່າຍນຳບັນດາປະເທດ ສະມາຊິກໃນອາຊຽນ ແລະ ຄູ່ຮ່ວມເຈລະຈາ ຕາມຮຽນເຊີນ ເຊັ່ນ: ຟີລິບປິນ,​ ສິງກະໂປ, ມາເລເຊຍ, ສປ.ຈີນ,​ ຍີ່ປຸ່ນ, ສະຫະພາບ ໂທລະຄົມມະນາຄົມ ສາກົນ ຫຼື ITU ແລະ ສະຫະລັດ ອາເມລິກາ ທີ່ສະແດງໃຫ້ເຫັນ ເຖິງບົດບາດ ແລະ ການຮ່ວມມືຢ່າງໃກ້ສິດ ລະຫວ່າງ ສປປ ລາວ ແລະ ບັນດາປະເທດ ໃນພາກພື້ນອາຊຽນ ແລະ ບັນດາຄູ່ຮ່ວມເຈລະຈາ.

ກອງປະຊຸມຍັງໄດ້ປຶກສາຫາລືກ່ຽວກັບສະພາບການພັດທະນາດິຈິຕອນລວມເຖິງລາຍງານຄວາມຄືບໜ້າການພັດທະນາດ້ານນະໂຍບາຍ ແລະ ລະບຽບການຂອງແຕ່ລະປະເທດ, ໄດ້ທົບທວນຄືນການຈັດຕັ້ງປະຕິບັດວຽກງານຄວາມປອດໄພທາງໄຊເບີ, ການຫັນເປັນດິຈິຕອນ, ເສດຖະກິດດິຈິຕອນ, ພື້ນຖານໂຄງລ່າງຂໍ້ມູນຂ່າວສານທີ່ສຳຄັນ, ນະວັດຕະກຳດິຈິຕອນ, ການບໍລິຫານຂໍ້ມູນພາກລັດ  ແລະ ບັນດາແຜນງານທີ່ໄດ້ຈັດຕັ້ງປະຕິບັດຮ່ວມກັນປະເທດຄູ່ຮ່ວມພັດທະນາ ແລະ ຜູ້ປະກອບການພາກເອກະຊົນ ເພື່ອສ່ົງເສີມໃຫ້ວຽກງານດິຈິຕອນຂັບເຄື່ອນເສດຖະກິດ-ສັງຄົມ ໃຫ້ຂະຫຍາຍຕົວ ແລະ ຮັບປະກັນຄວາມສອດຄ່ອງກັບເປົ້າໝາຍປະຊາຄົມອາຊຽນ.  

ກອງປະຊຸມຮັບຮອງເອກະສານສໍາຄັນຕ່າງໆ ເຊັ່ນ: ຍຸດທະສາດການຮ່ວມມືດ້ານວຽກງານຄວາມປອດໄພທາງໄຊເບີຂອງອາຊຽນ 2025; ບົດແນະນໍາຍຸດທະສາດອາຊຽນດ້ານປັນຍາປະດິດ ແລະ ແຮງງານ ດິຈິຕອນ; ແນວທາງນະໂຍບາຍອາຊຽນ ໃນການນຳໃຊ້ເຕັກໂນໂລຊີ Blockchain ສໍາລັບພາກລັດ; ບົດແນະນຳຂອງອາຊຽນສໍາລັບການພັດທະນາລະບົບ 5G; ນະໂຍບາຍກ່ຽວກັບການປັບອັດຕາບໍລິການໂທຂ້າມແດນ (IMR); ແຜນປະຕິບັດງານລະດັບພາກພື້ນ UN-Norm ຂອງຄະນະ ASEAN Cyber-CC;  ຮ່າງຖະແຫລງການບູລາເຄອາກັນ (Boracay Aklan); ຮ່າງຖະແຫຼງຂ່າວກອງປະຊຸມລັດຖະມົນຕີ ດິຈິຕອນອາຊຽນຄັ້ງທີ 03.

ຂ່າວ​ໂດຍ:    ພະ​ແນກ​ອາ​ຊຽນ, ຫ້ອງການກະຊວງເຕັກ​ໂນ​ໂລ​ຊີ ແລະ ການ​ສື່​ສານ/17/02/2023