ພິທີວາງສີລາລືກ ໂຄງການກໍ່ສ້າງສະຖາບັນເຕັກໂນໂລຊີການສື່ສານຂໍ້ມູນຂ່າວສານ

ໃນຕອນເຊົ້າຂອງວັນທີ 25 ເມສາ 2022 ເປັນວັນທີ່ມີຄວາມໝາຍ-ຄວາມສໍາຄັນ ກົງກັບວັນສ້າງຕັ້ງສາຍພົວພັນການທູດລາວ-ຈີນ ຄົບຮອບ 61 ປີ (25 ເມສາ 1961 – 25 ເມສາ 2022) ທີ່ສະຖາບັນເຕັກໂນໂລຊີການສື່ສານຂໍ້ມູນຂ່າວສານ, ກະຊວງເຕັກໂນໂລຊີ ແລະ ການສື່ສານ ໄດ້ມີພິທີວາງສີລາລືກ ໂຄງການກໍ່ສ້າງສະຖາບັນເຕັກໂນໂລຊີການສື່ສານຂໍ້ມູນຂ່າວສານ ດ້ວຍທຶນຊ່ວຍເຫຼືອລ້າຈາກລັດຖະບານ ສປ ຈີນ ໂດຍໃຫ້ກຽດເຂົ້າຮ່ວມຂອງ ທ່ານ ບັນດິດ. ສາດສະດາຈານ ບໍ່ວຽງຄໍາ ວົງດາລາ, ລັດຖະມົນຕີ ກະຊວງເຕັກໂນໂລຊີ ແລະ ການສື່ສານ, ທ່ານ ຈຽງ ຈ່າຍຕົງ (Jiang Zai Dong) ເອກອັກຄະລັດຖະທູດ ສປ ຈີນ ປະຈຳ ສປປ ລາວ, ທ່ານ ໄຊຊະນະ ສິດທິພອນ, ຮອງປະທານຄະນະກຳມະການຮ່ວມມື ລາວ-ຈີນ, ບັນດາຄະນະນຳກະຊວງເຕັກໂນໂລຊີ ແລະ ການສື່ສານ,​ ບໍລິສັດຜູ້ຮັບເໝົາໂຄງການ ແລະ ພາກສ່ວນຕ່າງໆທີ່ກ່ຽວຂ້ອງເຂົ້າຮ່ວມ.

 ທ່ານ ປະລິນຍາເອກ ປະດັບໄຊ ໄຊຍະໂຄດ, ຮອງຫົວໜ້າ ສະຖາບັນເຕັກໂນໂລຊີການສື່ສານຂໍ້ມູນຂ່າວສານ, ກະຊວງເຕັກໂນໂລຊີ ແລະ ການສື່ສານ ກ່າວວ່າ: ເພື່ອຜັນຂະຫຍາຍ ແລະ ການໂຄສະນາ ສາຍສຳພັນການພັດທະນາເສດຖະກິດ ແລະ ການຄ້າ ລະຫ່ວາງສອງປະເທດລາວຈີນ-ຈີນລາວ ທັງເປັນການຈັດຕັ້ງປະຕິບັດຕາມແນວຄິດລິເລີ່ມຂອງແນວທາງ “ໜຶ່ງແລວໜຶ່ງເສັ້ນທາງ” ແຫ່ງ ສປ ຈີນ. ໂຄງການດັ່ງກ່າວໄດ້ອອກແບບກໍ່ສ້າງສູນຝຶກອົບຮົມດ້ານໄອຊີທີ 5 ຊັ້ນ ຈຳນວນ 1 ຫຼັງ ໂດຍມີເນື້ອທີ່ໃຊ້ສອຍທັງໝົດ 5,524.56 ຕາແມັດ ປະກອບດ້ວຍຫ້ອງຮຽນທຳມະດາ, ຫ້ອງຮຽນທັນສະໄໝ, ຫ້ອງທົດລອງ, ຫ້ອງການ, ຫ້ອງສະໝຸດ, ຫ້ອງປະຊຸມໃຫຍ່ ເປັນຕົ້ນ. ໃນອາຄານແມ່ນຈະປະກອບດ້ວຍອຸປະກອນການຮຽນ-ການສອນ ທີ່ຈຳເປັນ, ອຸປະກອນຫ້ອງທົດລອງ ແລະ ສິ່ງອຳນວຍຄວາມສະດວກໃນການສອບເສັງ. ພາຍຫຼັງໂຄງການລິເລີ່ມການ ກໍ່ສ້າງ, ຄູອາຈານ ແລະ ນັກສຶກສາ ຈໍານວນ 312 ຄົນ ຈະໄດ້ຮັບການຝຶກອົບຮົມ ແລະ ສອບເສັງວັດລະດັບໃນ 4 ຫຼັກສູດ ເພື່ອກຽມພ້ອມຮອງຮັບໃນການເປີດສູນ. ໃນນັ້ນ, ຜູ້ບໍລິຫານລະດັບສູງ ຈຳນວນ 20 ທ່ານ ແມ່ນຈະໄດ້ຮັບເຊີນເຂົ້າຮ່ວມການຝຶກອົບຮົມ ‘ຜູ້ບໍລິຫານຂັ້ນສູງ’ ທີ່ ສປ ຈີນ ເປັນເວລາ 5 ວັນ ອີກດ້ວຍ.

           ທ່ານກ່າວຕື່ມວ່າ: ໂຄງການກໍ່ສ້າງສະຖາບັນເຕັກໂນໂລຊີການສື່ສານຂໍ້ມູນຂ່າວສານ ແມ່ນໂຄງການຊ່ວຍເຫຼືອລ້າຈາກລັດຖະບານ  ສປ ຈີນ ດ້ວຍມູນຄ່າສູງສຸດເຖິງ 85.72 ລ້ານຢວນ (ປະມານ 150 ຕື້ກວ່າກີບ) ຊຶ່ງໄດ້ມີການລິເລີ່ມເກັບກໍາຂໍ້ມູນ ແລະ ສໍາຫຼວດສຶກສາຄວາມເປັນໄປໄດ້ໂດຍ ສະຖາບັນອອກແບບວິສະວະກໍາເອເລັກໂຕຣນິກ ສປ ຈີນ ໃນປີ 2019. ໂຄງການດັ່ງກ່າວ, ເປັນໂຄງການທຳອິດ ທີ່ດຳເນີນການໃນຮູບແບບ ຝ່າຍລາວຈັດຕັ້ງປະຕິບັດເອງຄື: ຝ່າຍລາວມີໜ້າທີ່ຮັບຜິດຊອບໃນການສໍາຫຼວດອອກແບບ ແລະ ຄັດເລືອກເອົາຜູ້ຮັບເໝົາລວມໂຄງການຈາກບັນຊີບໍລິສັດຈີນ. ຄະນະຈັດຕັ້ງປະຕິບັດໂຄງການໄດ້ຄັດເລືອກບໍລິສັດທີ່ມີຄວາມພ້ອມທາງດ້ານເຕັກນິກ ແລະ ຖືກຕ້ອງຕາມເງື່ອນໄຂທີ່ກຳນົດໄວ້ ໂດຍແມ່ນ ກຸ່ມບໍລິສັດກໍ່ສ້າງທາງລົດໄຟ ແຫ່ງ ສປ ຈີນ ຈໍາກັດ (China Railway Construction Group Co., Ltd) ໄດ້ຖືກຄັດເລືອກໃຫ້ເປັນຜູ້ຊະນະການປະມູນໂຄງການ, ໂດຍຄາດຄະເນວ່າ ຈະສຳເລັດການກໍ່ສ້າງ ແລະ ສົ່ງມອບໂຄງການໃນເວລາ 20 ເດືອນ. ຊຶ່ງໂຄງການດັ່ງກ່າວນີ້, ຈະເປັນພື້ນຖານໂຄງລ່າງທີ່ສຳຄັນສຳລັບສະຖາບັນເຕັກໂນໂລຊີການສື່ສານຂໍ້ມູນຂ່າວສານ ກໍ່ຄື ຂະແໜງການເຕັກໂນໂລຊີ ແລະ ການສື່ສານຂອງ ສປປ ລາວ ທີ່ຈະການກໍ່ສ້າງ ແລະ ພັດທະນາບຸກຄະລາກອນ ໃຫ້ມີຄວາມຮູ້-ຄວາມສາມາດດ້ານໄອຊີທີ ເພື່ອປະກອບສ່ວນເຂົ້າໃນວຽກງານການຫັນເປັນເສດຖະກິດ ດິຈິຕ໋ອນ ແລະ ປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງ ສປປ ລາວ.

          ໃນພິທີດັ່ງກ່າວ, ທ່ານ ຈຽງ ຈ່າຍຕົງ (Jiang Zai Dong) ເອກອັກຄະລັດຖະທູດ ສປ ຈີນ ປະຈຳ ສປປ ລາວ ໄດ້ຕາງໜ້າໃຫ້ລັດຖະບານ ກໍຄືປະຊາຊົນ ຈີນ ກ່າວມອບໂຄງການ ແລະ ທ່ານ ບັນດິດ ສາດສະດາຈານ ບໍ່ວຽງຄຳ ວົງດາລາ, ລັດຖະມົນຕີ ກະຊວງເຕັກໂນໂລຊີ ແລະ ການສື່ສານ ໄດ້ຕາງໜ້າໃຫ້ແກ່ລັດຖະບານ ກໍຄືປະຊາຊົນລາວ ກ່າວຮັບເອົາໂຄງການຊ່ວຍເຫຼືອໃນຄັ້ງນີ້ ແລະ ໄດ້ຖືໂອກາດດັ່ງກ່າວສະແດງຄວາມຂອບໃຈໄປຍັງ ລັດຖະບານ ແລະ ປະຊາຊົນ ສປ ຈີນ ທີ່ໄດ້ໃຫ້ການຊ່ວຍເຫຼືອໃນໂຄງການດັ່ງກ່າວ. ພ້ອມທັງໄດ້ຮ່ວມກັນຊວ້ານດິນໃສ່ສີລາລຶກເພື່ອປະກາດການກໍ່ສ້າງໂຄງການຢ່າງເປັນທາງການ.