ພິທີເຊັນສັນຍາຊື້-ຂາຍຮຸ້ນ ແລະ ສັນຍາຮ່ວມຮຸ້ນສ້າງຕັ້ງ ບໍລິສັດ ໄປສະນີລາວ ຈຳກັດ

ໃນວັນທີ 28 ເມສາ 2022 ຜ່ານມານີ້, ທີ່ຫ້ອງປະຊຸມໃຫຍ່ກະຊວງການເງິນ ໄດ້ຈັດພິທີເຊັນສັນຍາຊື້-ຂາຍຮຸ້ນ ຂອງບໍລິສັດ ລັດວິສາຫະກິດ ໄປສະນີລາວ ແລະ ເຊັນສັນຍາຮ່ວມຮຸ້ນສ້າງຕັ້ງບໍລິສັດ ໄປສະນີລາວ ຈຳກັດ, ລະຫວ່າງກະຊວງການເງິນ ຕາງໜ້າໂດຍກົມປະຕິຮູບລັດວິສາຫະກິດ ແລະ ການປະກັນໄພ ກັບ ບໍລິສັດ ໂລຈິສຕິກ ເວັນເຈີ ຈຳກັດ (ບໍລິສັດໃນເຄືອຂອງບໍລິສັດ ເອເຊຍ ລົງທຶນ ແລະ ບໍລິການ ຈຳກັດຜູ້ດຽວ).

       ຕາງໜ້າລົງນາມໃນພິທີເຊັນສັນຍາຄັ້ງນີ້ໂດຍ ທ່ານ ປອ. ສອນເພັດ ອິນທະວົງ, ຫົວໜ້າກົມປະຕິຮູບລັດວິສາຫະກິດ ແລະ ການປະກັນໄພ, ກະຊວງການເງິນ ແລະ ທ່ານ ລັດຕະນະມະນີ ຄູນນີວົງ, ຮອງປະທານອາວຸໂສກຸ່ມບໍລິສັດ ເອເຊຍລົງທຶນ ແລະ ບໍລິການ ຈຳກັດຜູ້ດຽວ ໂດຍການໃຫ້ກຽດເຂົ້າຮ່ວມເປັນສັກຂີພິຍານຂອງ ທ່ານ ບຸນປອນ ວັນນະຈິດ, ຮອງລັດຖະມົນຕີ ກະຊວງການເງິນ ແລະ ທ່ານ ປອ. ສັນຕິສຸກ ສີມມະລາວົງ, ຮອງລັດຖະມົນຕີ ກະຊວງເຕັກໂນໂລຊີ ແລະ ການສື່ສານ, ມີທ່ານຫົວໜ້າຫ້ອງການ ກະຊວງການເງິນ, ຫົວໜ້າກົມໄປສະນີ ກະຊວງເຕັກໂນໂລຊີ ແລະ ການສື່ສານ, ບັນດາທ່ານຫົວໜ້າກົມ, ຮອງຫົວໜ້າກົມ ແລະ ພະແນກການທີ່ກ່ຽວຂ້ອງເຂົ້າຮ່ວມ.

 ໂດຍປະຕິບັດຕາມແຈ້ງການ ຂອງຫ້ອງວ່າການສໍານັກງານນາຍົກລັດຖະມົນຕີ ວ່າດ້ວຍທິດຊີ້ນໍາຜົນການປະມູນຊື້-ຂາຍຮຸ້ນ ບໍລິສັດ ລັດວິສາຫະກິດ ໄປສະນີລາວ ແລະ ມອບໃຫ້ກະຊວງການເງິນ ເຊັນສັນຍາຊື້-ຂາຍຮຸ້ນ ແລະ ສັນຍາຮ່ວມຮຸ້ນ ຮ່ວມກັບ ບໍລິສັດ ໂລຈິສຕິກ ເວັນເຈີ ຈໍາກັດ (AIF) ສະບັບເລກທີ 225/ຫສນຍ, ລົງວັນທີ 18 ກຸມພາ 2002 ແລະ ອີງຕາມຂໍ້ຕົກລົງ ຂອງລັດຖະມົນຕີ ກະຊວງການເງິນ ສະບັບເລກທີ 1091/ກງ, ລົງວັນທີ 22 ເມສາ 2022 ວ່າດ້ວຍການອະນຸມັດເຫັນດີໃຫ້ເຊັນສັນຍາຊື້-ຂາຍຮຸ້ນ ບໍລິສັດ ລັດວິສາຫະກິດ ໄປສະນີລາວ ແລະ ສັນຍາຮ່ວມຮຸ້ນ ບໍລິສັດ ໄປສະນີລາວ ຈໍາກັດ ລະຫວ່າງ ກະຊວງການເງິນ ຕາງໜ້າໂດຍ ກົມປະຕິຮູບລັດວິສາຫະກິດ ແລະ ການປະກັນໄພ ຮ່ວມກັບ ບໍລິສັດ ໂລຈິສຕິກ ເວັນເຈີ ຈໍາກັດ (AIF), ຊຶ່ງລັດຖະບານລາວ ແມ່ນຕາງໜ້າໂດຍກະຊວງການເງິນ ຖືຮຸ້ນ 49% ແລະ ບໍລິສັດ ໂລຈິສຕິກ ເວັ້ນເຈີ ຈໍາກັດ (AIF) ຖືຮຸ້ນ 51%.

        ບໍລິສັດ ໂລຈິສຕິກ ເວັນເຈີ ຈໍາກັດ ເປັນບໍລິສັດໃນເຄືອຂອງກຸ່ມບໍລິສັດ ເອເຊຍ ລົງທຶນ ແລະ ບໍລິການ ຈຳກັດຜູ້ດຽວ ທີ່ດໍາເນີນທຸລະກິດໃນຫຼາຍຂະແໜງການທັງພາຍໃນ ແລະ ຕ່າງປະເທດ ເຊັ່ນ: ທະນາຄານ, ການບໍລິການ, ການຂົນສົ່ງ, ໂທລະຄົມ, ໄອທີ, ການພັດທະນາຊອບແວຣ໌ ແລະ ອື່ນໆ. ພາຍຫຼັງທີ່ບໍລິສັດໄດ້ຮັບການປະມູນຊື້-ຂາຍຮຸ້ນ ຂອງລັດວິສະຫະກິດ ໄປສະນີລາວ, ໂດຍອີງຕາມເອກະສານການປະມູນການຊື້-ຂາຍຮຸ້ນຂອງລັດວິສະຫະກິດ ໄປສະນີລາວກຸ່ມບໍລິສັດ AIF ແມ່ນເປັນຜູ້ຊະນະການປະມູນ, ຄະນະກຳມະການຄົ້ນຄວ້າການຫັນລັດວິສະຫະກິດ ໄປສະນີລາວ ກໍໄດ້ເຫັນດີໃຫ້ບໍລິສັດ AIF ດໍາເນີນການປະເມີນມູນຄ່າຊັບສິນຂອງລັດວິສະຫະກິດ ໄປສະນີລາວ ຄືນໃໝ່. ທາງບໍລິສັດກໍໄດ້ດຳເນີນການຈັດຫາບໍລີສັດທີ່ປຶກສາທາງດ້ານການເງິນ ເພື່ອທຳການປະເມີນຮຸ້ນຄືນຕໍ່ກັບມູນຄ່າຊັບສິນຂອງລັດວິສະຫະກິດ ໄປສະນີລາວ, ຫຼັງຈາກນັ້ນກົມປະຕິຮູບລັດວິສາຫະກິດ ແລະ ການປະກັນໄພ ໄດ້ຄັດເລືອກເອົາ ບໍລິສັດ ຫຼັກຊັບ ລາວ-ຈີນ ເປັນຜູ້ປະເມີນຊັບສິນໃນຄັ້ງນີ້. ທັງນີ້, ກໍເພື່ອສືບຕໍ່ການຫັນວິສະຫະກິດຂອງລັດໃຫ້ເປັນທັນສະໄໝ ພ້ອມທັງເປັນການສະໜອງທຶນໃຫ້ແກ່ງົບປະມານຂອງຊາດອີກດ້ວຍ.

  ບົດຂ່າວ: ກົມໄປສະນີ/10/05/2022