ພິທີເຊັນສັນຍາ ວ່າດ້ວຍການທົດລອງດຳເນີນທຸລະກຳຊັບສິນດິຈິຕອນ

 ໃນຕອນແລງ ວັນທີ 27 ມັງກອນ 2022 ນີ້, ທີ່ ກະຊວງ ເຕັກໂນໂລຊີ ແລະ ການສື່ສານ (ກຕສ) ໄດ້ຈັດພິເຊັນສັນຍາ ວ່າດ້ວຍການທົດລອງດຳເນີນທຸລະກິດຊັບສິນດິຈິຕອນ ລະຫວ່າງ ກະຊວງເຕັກໂນໂລຊີ ແລະ ການສື່ສານ ແລະ ບໍລິສັດ ລາວ ວີໄອພີ ພັດທະນາການລົງທຶນ ຈໍາກັດຜູ້ດຽວ. ໃຫ້ກຽດເຂົ້າຮ່ວມເປັນສັກຂີພິຍານ ໂດຍ  ທ່ານ ບັນດິດ ສາດສະດາຈານ ບໍ່ວຽງຄຳ ວົງດາລາ ລັດຖະມົນຕີ ກະຊວງ ຕສ, ທ່ານຮອງລັດຖະມົນຕີ, ບັນດາຫົວໜ້າກົມ/ທຽບເທົ່າ, ຄະນະອໍານວຍການບໍລິສັດ, ຫົວໜ້າ/ຮອງພະແນກ ແລະ ພະນັກງານວິຊາການທັງສອງຝ່າຍ.

         ການເຊັນສັນຍາໃນຄັ້ງນີ້ ກໍ່ເພື່ອຜັນຂະຫຍາຍຕາມທິດຊີ້ນໍາຂອງທ່ານນາຍົກລັດຖະມົນຕີ ກ່ຽວກັບການທົດລອງຂຸດຄົ້ນຊັບສິນດິຈິຕອນ ຢູ່ ສປປ ລາວ ກໍຄືການຈັດຕັ້ງຜັນຂະຫຍາຍແຜນວິໄສທັດ, ແຜນຍຸດທະສາດ ແລະ ແຜນພັດທະນາເສດຖະກິດດິຈິຕອນແຫ່ງຊາດ ທີ່ສະພາແຫ່ງຊາດໄດ້ຮັບຮອງເມື່ອບໍ່ດົນມານີ້.

ທ່ານ ແກ້ວນະຄອນ ໄຊສຸລຽນ, ຫົວໜ້າກົມເຕັກໂນໂລຊີດິຈິຕ໋ອນ, ກະຊວງ ຕສ ໄດ້ກ່າວວ່າ: ປະຈຸບັນນີ້ ການປະຕິວັດອຸດສາຫະກຳຄັ້ງທີ 4 ພວມເປັນທ່າອ່ຽງລວມ ແລະ ເປັນກະແສຟອງພັດຜ່ານໄປທົ່ວໂລກ ກໍຄືBlockchain ຫຼື ກຸ່ມຂໍ້ມູນຜູກພັນ ເປັນເຕັກໂນໂລຊີໜຶ່ງທີ່ພົ້ນເດັ່ນໃນຍຸກອຸດສາຫະກໍາ 4.0 ທີ່ທົ່ວໂລກກໍາລັງເອົາໃຈໃສ່ ຄົ້ນຄວ້າພັດທະນາ ແລະ ນໍາໃຊ້ເຂົ້າໃນຫຼາຍຂົງເຂດ ໂດຍສະເພາະໃນຂະແໜງການເງິນ. ດ້ວຍຄຸນລັກສະນະພິເສດ ຂອງ Blockchain ຈຶ່ງເຮັດໃຫ້ການແລກປ່ຽນມູນຄ່າ ໃນຮູບແບບເອເລັກໂຕຣນິກ ສາມາດດໍາເນີນການ ໄດ້ໂດຍຜ່ານລະບົບເຄືອຂ່າຍຄອມພີວເຕີ, ຈຶ່ງເກີດໃຫ້ມີທຸລະກໍາຊັບສິນດິຈິຕອນມີການສ້າງເງິນຄຣິບໂຕ ແລະ ຫຼຽນໂທເຄັນດິຈິຕອນ ຂຶ້ນມາຢ່າງຫຼວງຫຼາຍ ເພື່ອໃຊ້ໃນການຊື້-ຂາຍ ຫຼື ແລກປ່ຽນມູນຄ່ານໍາກັນ. ສຳລັບ ສປປ ລາວ ແມ່ນມີທ່າແຮງທາງດ້ານພະລັງງານໄຟຟ້າ ຊຶ່ງປະຈຸບັນໄຟຟ້າຢູ່ປະເທດເຮົາ ກໍໄດ້ຜະລິດອອກແລ້ວ ແຕ່ຍັງມີພະລັງງານໄຟຟ້າຈໍານວນໜຶ່ງທີ່ຍັງບໍ່ສາມາດສົ່ງຂາຍອອກນອກປະເທດໄດ້. ສະນັ້ນ, ຈຶ່ງເຫັນໄດ້ການນໍາໃຊ້ພະລັງງານໄຟຟ້າທີ່ຜະລິດອອກມານັ້ນ ໃຫ້ມີປະສີດທິຜົນ ເພື່ອສ້າງລາຍຮັບໃຫ້ປະເທດ ທັງສາມາດສ້າງຖານລາຍຮັບໃໝ່, ໝັ້ນຄົງ, ເປັນແຫຼ່ງລາຍຮັບທີ່ເປັນເງິນຕາ ທີ່ສາມາດເພີ່ມຄັງແຮເງິນຕາຂອງລັດຖະບານ ແລະ ການດໍາເນີນທຸລະກິດດັ່ງກ່າວ ລັດຖະບານເຮົາ ກໍ່ຄືກະຊວງ, ຂະແໜງການທີ່ກ່ຽວຂ້ອງ ຈຶ່ງໄດ້ອອກລະບຽບການຄຸ້ມຄອງ, ຊຸກຍູ້ສົ່ງເສີມ, ໃຫ້ຮັດກຸມ, ຖືກຕ້ອງຕາມກົດໝາຍ ເພື່ອອໍານວຍຄວາມສະດວກໃຫ້ຜູ້ປະກອບການພາຍໃນປະເທດ.

          ພ້ອມດຽວກັນນັ້ນ, ທ່ານ ນາງ ວິພາພອນ ກອນສິນ ປະທານບໍລິສັດ ບໍລິສັດ ລາວ ວີໄອພີ ພັດທະນາການລົງທຶນ ຈໍາກັດຜູ້ດຽວ ຍັງໄດ້ກ່າວວ່າ: ການເຊັນສັນຍາໃນຄັ້ງນີ້ຈະເປັນຜົນດີໃນການສົ່ງເສີມໃຫ້ພາກທຸລະກິດມີຄວາມເຂັ້ມແຂງ ແລະ ສ້າງວຽກເຮັດງານທຳໃຫ້ຄົນລາວ ພ້ອມທັ້ງເປັນຊ່ອງທາງໃນການເພີ່ມລາຍຮັບໃຫ້ແກ່ງົບປະມານຂອງລັດໄດ້ຫຼາຍຂື້ນ ແລະ ເປັນການສົ່ງອອກໄຟຟ້າກັບທີ່.

ໃນພິທີເຊັນສັນຍາຄັ້ງນີ້ຮ່ວມລົງນາມ ໂດຍ ທ່ານ ແກ້ວນະຄອນ ໄຊສຸລຽນ, ຫົວໜ້າກົມເຕັກໂນໂລຊີດິຈິຕ໋ອນ, ກຕສ ແລະ ທ່ານ ນາງ ວິພາພອນ ກອນສິນ ປະທານບໍລິສັດ ບໍລິສັດ ລາວ ວີໄອພີ ພັດທະນາການລົງທຶນ ຈໍາກັດຜູ້ດຽວ. ໃນພິທີດັ່ງກ່າວ ບໍລິສັດ ລາວ ວີໄອພີ ພັດທະນາການລົງທຶນ ຈໍາກັດຜູ້ດຽວ ໄດ້ມອບພັນທະຄ່າລິຂະສິດໃບອະນຸຍາດດຳເນີນທຸລະກຳຂຸດຄົ້ນຊັບສິນດິຈິຕ໋ອນ ຈໍານວນ 500.000 $ (ຫ້າແສນໂດລາສະຫະລັດ) ໃຫ້ແກ່ລັດຖະບານ. ພ້ອມນີ້, ບໍລິສັດ ໄດ້ມີນໍ້າໃຈປະກອບສ່ວນມອບເງິນສະໜັບສະ ໜູນໃຫ້ແກ່ກະຊວງເຕັກໂນໂລຊີ ແລະ ການສື່ສານ ຈໍານວນ 500.000.000 ກີບ (ຫ້າຮ້ອຍລ້ານກີບ) ເພື່ອຮັບໃຊ້ເຂົ້າໃນການເຄື່ອນໄຫວວຽກງານຄຸ້ມຄອງການເຮັດທົດລອງຊັບສິນດິຈິຕ໋ອນ ຢູ່ ສປປ ລາວ.

            ຂ່າວໂດຍ: ກົມເຕັກໂນໂລຊີດິຈິຕອນ

            ຮຽບຮຽງ+ພາບ: ພະແນກປະຊາສໍາພັນ, ຫ້ອງການກະຊວງ.