ລັດຖະມົນຕີ ກະຊວງ ຕສ ເຂົ້າຮ່ວມກອງປະຊຸມລັດຖະມົນຕີ ດິຈິຕອນ ອາຊຽນ ຄັ້ງທີ 2 ແລະ ກອງປະຊຸມປິ່ນອ້ອມ.

ທ່ານ ບັນດິດ, ສຈ. ບໍ່ວຽງຄຳ ວົງດາລາ, ລັດຖະມົນຕີ ກະຊວງເຕັກໂນໂລຊີ ແລະ ການສື່ສານ (ກຕ​ສ) ພ້ອມດ້ວຍຄະນະໄດ້ເຂົ້້າຮ່ວມກອງ​ປະ​ຊຸມລັດຖະມົນຕີ ດິຈິຕອນອາຊຽນ (ADGMIN) ຄັ້ງທີ 2 ແລະ ກອງປະຊຸມປິ່ນອ້ອມ (The 2^nd ASEAN Digital Ministers Meeting and Related Meetings), ໃນລະຫວ່າງວັນທີ 24-28 ມັງກອນ 2022 ນີ້, ຜ່ານລະບົບກອງປະຊຸມທາງໄກ. ຊຶ່ງເປັນເຈົ້າພາບຈັດໂດຍ ປະເທດມຽນມາ, ພາຍໃຕ້ຄຳຂວັນ ‘‘ການຫັນເປັນດິຈິຕອນ ເພື່ອຂັບເຄື່ອນການຟື້ນຟູເສດຖະກິດອາຊຽນ ຫຼັງຈາກການແຜ່ລະບາດຂອງພະຍາດໂຄວິດ-19 (Digital Transformation – Engine for ASEAN Economic Recovery from COVID-19)’’ ໂດຍການເປັນປະທານຂອງ ທ່ານ ພົນ​ເຮືອ​ເອກ ຕິນ ອອງ ຊານ (Tin Aung San), ລັດ​ຖະ​ມົນ​ຕີ​ ກະ​ຊວງ​ຄົມມະນາຄົມຂົນ​ສົ່ງ ແລະ ການ​ສື່​ສານ​ ປະ​ເທດມຽນ​ມາ, ທ່ານ ອາ​ລັນ ເອ ຊິວ​ລໍ (Alan A. Silor), ຮອງລັດຖະມົນຕີ ອົງການເຕັກໂນໂລຊີຂໍ້ມູນຂ່າວສານ ແລະ ການສື່ສານ ຂອງ ຟີລິບປິນ ເປັນຮອງປະທານ. ມີບັນດາ​ລັດຖະມົນຕີ​ ດິຈິຕອນ ອາຊຽນ, ບັນດາຫົວໜ້າຫ້ອງການ, ຫົວໜ້າກົມ/ທຽບເທົ່າ ແລະ ວິຊາການທີ່ຮັບຜິດຊອບວຽກງານ ໄອຊີທີ ແລະ ດິ​ຈິ​ຕອນ ຈາກບັນດາປະເທດສະມາຊິກເຂົ້າຮ່ວມ.

ໃນໂອກາດນີ້, ທ່ານ  ບັນດິດ, ສຈ. ບໍ່ວຽງຄຳ ວົງດາລາ ໄດ້ກ່າວມີຄຳເຫັນ ແລະ ຊົມເຊີຍຕໍ່ປະ​ເທດມຽນມາ ໃນຖານະ​ປະ​ທານກອງປະຊຸມ ແລະ ພ້ອມມີ​ສ່ວນ​ຮ່ວມ​ຢ່າງ​ແຂງ​ຂັນ ທີ່​ຈະ​ຊຸກ​ຍູ້​ການ​ຫັນ​ເປັນ​ດິ​ຈິ​ຕອນ​ໃນ​ບັນ​ດາປະເທດ​ອາ​ຊຽນ ແລະ​ ປະ​ຕິ​ບັດ ແຜນແມ່ບົດດິຈິຕອນອາຊຽນ 2025 (ADM 2025) ຢ່າງ​ມີ​ໝາກ​ຜົນ. ພ້ອມນີ້, ທ່ານໄດ້ກ່າວວ່າ: ປີນີ້ເປັນປີທຳອິດຂອງການຈັດຕັ້ງປະຕິບັດ ADM 2025, ໃນໄລຍະທີ່ທຸກປະເທດກຳລັງສູ້ຊົນກັບການປ້ອງກັນ ແລະ ຟື້ນຟູຈາກການແຜ່ລະບາດຂອງພະຍາດ COVID-19 ​ເຖິງ​ວ່າ​ຈະ​ປະສົບ​ກັບ​ຄວາມ​ຫຍຸ້ງຍາກ​ ​ຂະ​ແໜງການ​ດິຈິ​ຕອນ ຂອງ​ອາ​ຊຽນ ກໍ່ປະຕິບັດໄດ້ຫຼາຍກິດຈະກໍາຕາມຄາດໝາຍ ກໍ່ຄື ລັດຖະບານ​ລາວ​ ໄດ້​ຮັບຮອງເອົາແຜນ​ວິ​ໄສ​ທັດ​ພັດທະນາ​ເສດຖະກິດ​ດິຈິ​ຕອນ 20 ປີ (2021-2040), ຍຸດ​ທະ​ສາດ 10 ປີ (2021-2030), ແຜນພັດທະນາເສດຖະກິດດິຈິຕອນແຫ່ງຊາດ ໄລຍະ 05 ປີ (2021-2025) ເພື່ອສ້າງພື້ນຖານເສດຖະກິດໃຫ້ເຂັ້ມແຂງ ແລະ ສາມາດກຸ້ມຕົນເອງທາງດ້ານເສດຖະກິດ ໂດຍຖືເອົາກາລະໂອກາດຂອງເຕັກໂນໂລຊີດິຈິຕອນ ໄປຄຽງຄູ່ກັບການພັດທະນາຊັບພະຍາກອນມະນຸດ ທີ່ມີຄຸນນະພາບ ເປັນປັດໃຈຫຼັກໃນການພັດທະນາເສດຖະກິດ-ສັງຄົມ ທີ່ສອດຄ່ອງກັບທິດທາງ ແຜນແມ່ບົດດິຈິຕອນອາຊຽນ 2025 ກໍຄື ທິດທາງລວມຂອງ ບັນດາລັດ​ຖະ​ມົນ​ຕີ ດິ​ຈິ​ຕອນ ຂອງອາຊຽນ ໄດ້ວາງໄວ້. ສຳລັບປີ 2021 ທີ່ຜ່ານມາ ສປປ ລາວ ກໍ່ຄືກະຊວງ ຕສ ໄດ້ປະກອບສ່ວນ ຜັນຂະຫຍາຍ ADM 2025 ພາຍໃນປະເທດ ແລະ ພາກພື້ນ ໄດ້ຫຼາຍກິດຈະກຳເປັນຕົ້ນ: ການແປ, ຈັດ​ພິມ, ແຈກ​ຢາຍ ແລະ ​ເຜີຍ​ແຜ່ກິດ​ຈະ​ກຳ ADM 2025 ແລະ ສືກສາ ການພັດທະນາ ເຕັກໂນໂລຊີບລັອກເຊນ ໃນວຽກງານບໍລິຫານລັດ ອາຊຽນ (Block Chain For The Digital Government-ASEAN Ways). ​ພ້ອມ​ທັງ ສ້າງ, ປັບ​ປຸງ​ນິ​ຕິ​ກຳ ແລະ ກົດ​ໝາຍ​ເຕັກ​ໂນ​ໂລ​ຊີ ລະ​ດັບ​ສູງ. ພ້ອມນີ້, ກະຊວງ ຕສ ໄດ້ຕາງໜ້າດຳເນີນ 2 ກິດຈະກຳ ໃນສົກປີ 2022 ຄື:   ❶ ການດັດປັບນະໂຍບາຍດິຈິຕອນ ສຳລັບການຟື້ນຟູ ເສດຖະກິດ ຈາກການລະບາດຂອງ ພະຍາດ COVID-19 ແລະ  ❷ ການສ້າງມາດຕະຖານຂໍ້ມູນຂ່າວສານ ແລະ ການແລກປ່ຽນຂໍ້ມູນໄພພິບັດໃນພາກພື້ນອາຊຽນ.

 ກອງປະຊຸມໄດ້ຍົກເອົາຫຼາຍຫົວຂໍ້ຂຶ້ນມາປຶກສາຫາລືຮ່ວມກັນ ໂດຍສະເພາະ ໝາກຜົນຂອງການຮ່ວມມືອາຊຽນ ກັບບັນດາປະເທດຄູ່ຮ່ວມມື ໃນໄລຍະຜ່ານມາ ແລະ ແລກປ່ຽນຄຳຄິດເຫັນ ເພື່ອວາງທິດທາງການຮ່ວມມືໃນຕໍ່ໜ້າ ໃນການຮ່ວມມື ຟື້ນຟູ ແລະ ພັດທະນາເສດຖະກິດ-ສັງຄົມ ໂດຍການນໍາໃຊ້ເຕັກໂນໂລຊີດິຈິຕອນ ຫຼັງຈາກການແຜ່ລະບາດຂອງເຊື້ອພະຍາດ ໂຄວິດ-19 ໃນອາຊຽນ ເພື່ອປັບປຸງຊີວິດການເປັນຢູ່ຂອງປະຊາຊົນໃຫ້ດີຂຶ້ນ ແລະ ສາມາດປັບຕົວໄຫ້ເຂົ້າກັບສະພາບວິຖີຊີວິດແບບໃໝ່ໄດ້ຢ່າງມີປະສິດທິຜົນ. ກອງປະຊຸມຄັ້ງນີ້ ແມ່ນເປັນກອງປະຊຸມຄັ້ງທີ 2 ພາຍຫຼັງໄດ້ປ່ຽນຊື່ ຈາກກອງປະຊຸມລັດຖະມົນຕີໄອຊີທີ ອາຊຽນ (TELMIN) ມາເປັນກອງປະຊຸມລັດຖະມົນຕີດິຈິຕອນອາ​ຊຽນ (ADGMIN), ບັນ​ດາລັດຖະມົນຕີດິຈິຕອນ ອາຊຽນ ໄດ້ມີການປຶກສາຫາລື ແລະ ປ່ຽນສະພາບການພັດທະນາດິຈິຕອນ ລວມເຖີງລາຍງານຄວາມຄືບໜ້າການພັດທະນາດ້ານນະໂຍບາຍ ແລະ ລະບຽບການຂອງແຕ່ລະປະເທດ, ພ້ອມທັງທົບທວນຄືນການຈັດຕັ້ງປະຕິບັດວຽກງານ ຄວາມປອດໄພທາງໄຊເບີການຫັນເປັນດິຈິຕອນ, ເສດຖະກິດດິຈິຕອນ, ພື້ນຖານໂຄງລ່າງຂໍ້ມູນຂ່າວສານທີ່ສຳຄັນ, ນະວັດຕະກຳດິຈິຕອນ, ການບໍລິຫານຂໍ້ມູນພາກລັດ  ແລະ ບັນດາແຜນງານທີ່ໄດ້ຈັດຕັ້ງປະຕິບັດ ຮ່ວມກັບປະເທດຄູ່ຮ່ວມພັດທະນາ ແລະ ຜູ້ປະກອບການພາກເອກະຊົນ ເພື່ອສ່ົງເສີມໃຫ້ວຽກງານດິຈິຕອນຂັບເຄື່ອນເສດຖະກິດ-ສັງຄົມ ໃຫ້ຂະຫຍາຍຕົວ ແລະ ຮັບປະ ກັນຄວາມສອດຄ່ອງກັບເປົ້າໝາຍປະຊາຄົມອາຊຽນ.  ໃນໂອກາດດຽວກັນນີ້, ກອງປະຊຸມກໍ່ໄດ້ປືກສາຫາລື ແລະ ພິຈາລະນາຮັບຮອງເອົາບັນດາເອກະສານທີ່ສໍາຄັນເຊັ່ນ:❶ ຍຸດທະສາດການຮ່ວມມືດ້ານວຽກງານຄວາມປອດໄພທາງໄຊເບີຂອງອາຊຽນ  2025, ❷ ບົດແນະນໍາຍຸດທະສາດອາຊຽນດ້ານປັນຍາປະດິດ ແລະ ແຮງງານດິຈິຕອນ, ❸ ແນວທາງນະໂຍບາຍອາຊຽນ ໃນການນຳໃຊ້ ລະບົບເຕັກໂນໂລຊີກຸ່ມຂໍ້ມູນຜູກພັນ (Blockchain) ສໍາລັບພາກລັດ, ❹ ບົດແນະຂອງອາຊຽນສໍາລັບການພັດທະນາລະບົບ 5G,  ❺ ນະໂຍບາຍກ່ຽວກັບການປັບອັດຕາບໍລິການໂທຂ້າມແດນ (IMR) ແລະ ‘ ຖະແຫຼງການ ເນປີດໍ. ​ຄຽງ​ຄູ່​ກັບ​ການ​ດຳ​ເນີນ ກອງປະຊຸມລັດຖະມົນຕີ ດິ​ຈິ​ຕອນ ອາຊຽນ ຄັ້ງທີ 2 ຍັງ​ມີ​ກອງ​ປະ​ຊຸມ ເຈົ້າ​ໜ້າ​ທີ່​ອາ​ວຸ​ໂສ ດິ​ຈິ​ຕອນ ອາ​ຊຽນ ຄັ້ງ​ທີ 2 (The 2^nd ADGSOM) ​ເຊີ່ງ​ໄດ້​ດຳ​ເນີນ ແລະ ສຳ​ເລັດ​ລົງ ໃນ​ລະ​ຫວ່າງ ວັນ​ທີ 24-26 ມັງ​ກອນ 2022 ຜ່ານມານີ້.   

     ຂ່າວ​ໂດຍ: ພະ​ແນກ​ອາ​ຊຽນ, ຫ້ອງການກະຊວງ.

     ກວດແກ້+ພາບ​ໂດຍ: ປະຊາສຳພັນ, ຫ້ອງການກະຊວງ./28/01/2022