“ລາວຊຸບເປີແອັບ” ຈາກ ສະຕາໂທລະຄົມຄວ້າລາງວັນຊະນະເລີດໃນການແຂ່ງຂັນໄອຊີທີ ແລະ ນະວັດຕະກຳ 2022

       ກະຊວງເຕັກໂນໂລຊີ ແລະ ການສື່ສານ ໄດ້ຈັດກິດຈະກຳແຂ່ງຂັນປິ່ນອ້ອມການຈັດງານສັບປະດາດິຈິຕ໋ອນລາວ 2022 ທີ່ໄດ້ໄຂຂຶ້ນໃນລະຫວ່າງວັນທີ 21-25 ທັນວາ ທີ່ຫໍປະຊຸມແຫ່ງຊາດ ຊຶ່ງປະກອບມີການແຂ່ງຂັນ ໄອຊີທີ ແລະ ນະວັດຕະກຳ( Lao ICT and Innovation Award), Lao Cyber Security Hacking Challenge ແລະ ແຂ່ງຂັນໂຕ້ວາທີໃນຫົວຂໍ້ “ຄວາມປອດໄພເຕັກໂນໂລຊີ ດິຈິຕ໋ອນ” ການປະກາດຜົນການແຂ່ງຂັນໄດ້ດັ່ງກ່າວຈັດຂຶ້ນຕອນບ່າຍວັນທີ 25 ທັນວາ 2022 ເປັນກຽດເຂົ້າຮ່ວມໂດຍທ່ານ ບັນດິດ ສຈ. ບໍ່ວຽງຄຳ ວົງດາລາ, ລັດຖະມົົນຕີ ກະຊວງເຕັກໂນໂລຊີ ແລະ ການສື່ສານ, ມີບັນດາທ່ານຮອງລັດຖະມົນຕີ, ຫົວໜ້າຫ້ອງການ, ກົມ, ສະຖາບັນ, ບັນດາຜູ້ໃຫ້ການສະໜັບສະໜູນ ແລະ ພາກສ່ວນກ່ຽວຂ້ອງເຂົ້າຮ່ວມ.

         ທ່ານ ຄຳຫຼ້າ ສູນນະລັດ, ຫົວໜ້າກົມຄວາມປອດໄພໄຊເບີ ທັງເປັນຫົວໜ້າອະນຸກໍາມະການຈັດງານແຂ່ງຂັນ ກ່າວວ່າ: ການແຂ່ງຂັນ Lao ICT and Innovation Award ປະຈຳປີ 2022 ເພື່ອຊຸກຍູ້-ສົ່ງເສີມໃຫ້ບັນດານັກພັດທະນາ, ບໍລິສັດທາງດ້ານໄອຊີທີ, startup ໃນລາວ ສ້າງຊື່ສຽງຜະລິດຈະພັນຂອງຕົນໃຫ້ກັບຄົນລາວ ແລະ ສາມາດບໍລິການອອກສູ່ສາກົນ; ພ້ອມທັງສົ່ງເສີມໃຫ້ຄົນລາວໄດ້ນຳໃຊ້ການບໍລິການໄອຊີທີ, ດິຈິຕ໋ອນ ແລະ ນະວັດຕະກຳຂອງຄົນລາວເອງ. ໂດຍຜູ້ທີ່ມີຜົນງານທີ່ດີເດັ່ນໄດ້ຮັບລາງວັນຊະນະເລີດຈະເປັນຕົວແທນຂອງ ສປປ ລາວ ເຂົ້າຮ່ວມແຂ່ງຂັນງານ ASEAN ICT and Digital Award ໃນຕໍ່ໜ້າ. ໃນການແຂ່ງຂັນປີນີ້ມີຜູ້ສະໝັກເຂົ້າຮ່ວມແຂ່ງຂັນທັງໝົດ 33 ຜະລິດຕະພັນ ແບ່ງຮູບແບບການຄັດເລືອກ 2 ຮອບຄື: ຮອບອອນລາຍ ແລະ ຮອບສຸດທ້າຍ ແບ່ງອອກເປັນໝວດທົ່ວໄປ 22 ຜະລິດຕະພັນ ແລະ ໝົດນັກສຶກສາ 11 ຜະລິດຕະພັນ, ຜ່ານການຄັດເລືອກຮອບອອນລາຍ ມີ 17 ຜະລິດຕະພັນໃນໝວດທົ່ວໄປ ແລະ 8 ຜະລິດຕະພັນໃນໝວດນັກສຶກສາ ທີ່ຜ່ານເຂົ້າແຂ່ງຂັນໃນຮອບສຸດທ້າຍ ໃນຮອບສຸດທ້າຍສາມາດຄັດເລືອກໄດ້ຜູ້ຊະນະເລີດ ໃນໝວດທົ່ວໄປໄດ້ແກ່ລາວຊຸບເປີແອັບ ຈາກ ບໍລິສັດ ສະຕາໂທລະຄົມ ໄດ້ຮັບເງິນ 10 ລ້ານກີບ ພ້ອມໂລ້ລາງວັນ ແລະ ໃບຍ້ອງຍໍ ແລະ ໝວດນັກສຶກສາ ໄດ້ແກ່ “ Happy App ” ທ້າວ ຄຳໄຊ ມົວ ໄດ້ຮັບເງິນ 6 ລ້ານກີບ ພ້ອມໂລ້ລາງວັນ ແລະ ໃບຍ້ອງຍໍ; ຊຶ່ງທັງສອງແມ່ນມີຜົນງານທີ່ດີເດັ່ນ ແລະ ຈະເປັນຕົວແທນຂອງ ສປປ ລາວ ເຂົ້າຮ່ວມແຂ່ງຂັນງານ ASEAN ICT and Digital Award ໃນຕໍ່ໜ້າ.

         ຜົນການແຂ່ງຂັນ Lao ICT and Innovation Award ປະຈຳປີ 2022 ປະເພດໝວດທົ່ວໄປ ລາງວັນຊະນະເລີດຕິດອັນດັບມີ 5 ລາງວັນ ແລະ ສະເພາະລາງວັນຊົມເຊີຍມີ 5 ທີມ ໄດ້ຮັບເງິນທີມລະ 2 ລ້ານກີບ.ໃນນີ້, ຊະນະເລີດຕິດອັນດັບມີ: ລາງວັນຊະນະເລີດ ໄດ້ແກ່ ລາວຊຸບເປີແອັບ ຈາກ ບໍລິສັດ ສະຕາໂທລະຄົມ ໄດ້ຮັບເງິນ 10 ລ້ານກີບ ພ້ອມໂລ້ລາງວັນ ແລະ ໃບຍ້ອງຍໍ; ຮອງຊະນະເລີດອັນດັບ 1 ໄດ້ແກ່ ຂາຍມ່ວນ ຈາກ ແມ່ຂອງ ດິຈິຕ໋ອນ ຈຳກັດ ໄດ້ຮັບເງິນ 8 ລ້ານກີບ ພ້ອມໂລ້ລາງວັນ ແລະ ໃບຍ້ອງຍໍ; ຮອງຊະນະເລີດອັນດັບ 2 ໄດ້ແກ່ ນ້ຳດື່ມສະອາດວາຣີ (Vari Drinking Water) ຈາກບໍລິສັດວາລີ ໄດ້ຮັບເງິນ 5 ລ້ານກີບ ພ້ອມໂລ້ລາງວັນ ແລະ ໃບຍ້ອງຍໍ; ຮອງຊະນະເລີດອັນດັບ 3 ໄດ້ແກ່ ຮຸ່ງອາລຸນ Super App ຈາກບໍລິສັດຮຸ່ງອາລຸນ ໂລຈິດສະຕິກ ໄດ້ຮັບເງິນ 4 ລ້ານກີບ ພ້ອມໂລ້ລາງວັນ ແລະ ໃບຍ້ອງຍໍ; ລາງວັນຮອງຊະນະເລີດອັນດັບ 4 ໄດ້ແກ່ Document Management System ຊີເອັສ ອິນເທເລັກ ( ລາວ ) ໄດ້ຮັບເງິນ 3 ລ້ານກີບ ພ້ອມໂລ້ລາງວັນ ແລະ ໃບຍ້ອງຍໍ.

         ຜົນການແຂ່ງຂັນ Lao ICT and Innovation Award ປະຈຳປີ 2022 ປະເພດໝວດນັກສຶກສາ ລາງວັນຊະນະເລີດຕິດອັນດັບ ມີ 3 ລາງວັນ ແລະ ສະເພາະລາງວັນຊົມເຊີຍມີ 5 ລາງວັນ ໄດ້ຮັບເງິນທີມລະ 5 ແສນກີບ ພ້ອມໃບຊົມເຊີຍ. ໃນນີ້, ຊະນະເລີດຕິດອັນມີ: ລາງວັນຊະນະເລີດ ໄດ້ແກ່ Happy App ທ້າວ ຄຳໄຊ ມົວ ໄດ້ຮັບເງິນ 6 ລ້ານກີບ ພ້ອມໂລ້ລາງວັນ ແລະ ໃບຍ້ອງຍໍ; ລາງວັນຮອງຊະນະເລີດອັນດັບ 1 ໄດ້ແກ່ Lao Sport App ທ້າວ ສູນທອນ ອ່ອນຕາອິນດາລາ ໄດ້ຮັບເງິນສົດ 4 ລ້ານກີບ;ລາງວັນຮອງຊະນະເລີດອັນດັບ 2 ໄດ້ແກ່ Netchaintour ທ້າວ ບຸນພອນ ໂກສະດາ ໄດ້ຮັບເງິນ 2 ລ້ານກີບ ພ້ອມໂລ້ລາງວັນ ແລະ ໃບຍ້ອງຍໍ.

         ສຳລັບການການແຂ່ງຂັນ Lao Cyber Security Hacking Challenge ມີຈຸດປະສົງເພື່ອຊຸກຍູ້ສົ່ງເສີມໃຫ້ນັກຮຽນ, ນັກສຶກສາ, ຜູ້ປະກອບການເຫັນໄດ້ເຖີງຄວາມສຳຄັນກ່ຽວກັບຄວາມປອດໄພທາງໄຊເບີ, ທົດສອບຄວາມຮູ້ຄວາມສາມາດການໂຈລະກຳຂໍ້ມູນຜ່ານລະບົບເຄືອຂ່າຍໃຫ້ຜູ້ບໍລິການ, ສູນຂໍ້ມູນຂ່າວສານ,​ ບັນດາເວັບໄຊຂອງພາກລັດ ແລະ ເອກະຊົນ ພ້ອມທັງເປັນການຄັດເລືອກທີມແຮັກທີ່ດີທີ່ສຸດຂອງ ສປປ ລາວ ເຂົ້າຮ່ວມການແຂ່ງຂັນໃນເວທີພາກພື້ນ ແລະ ສາກົນໃນຕໍ່ໜ້າ. ຜົນການແຂ່ງຂັນ: ລາງວັນທີ 1 ໄດ້ແກ່ທີມ Zonice NayNay ໄດ້ຮັບເງິນ 5 ລ້ານກີບ ພ້ອມໃບຍ້ອງຍໍ; ລາງວັນທີ 2 ໄດ້ແກ່ທີມ Localhost ໄດ້ຮັບເງິນ 4 ລ້ານກີບ ພ້ອມໃບຍ້ອງຍໍ; ລາງວັນທີ 3 ໄດ້ແກ່ທີມ KANTAN ໄດ້ຮັບເງິນ 3 ລ້ານກີບ ພ້ອມໃບຍ້ອງຍໍ.

          ການແຂ່ງຂັນໂຕ້ວາທີໃນຫົວຂໍ້ “ຄວາມປອດໄພ ເຕັກໂນໂລຊີ ດິຈິຕ໋ອນ” ລາງວັນທີ 1 ໄດ້ແກ່ທີມ Cyberthon1 ໄດ້ຮັບເງິນ 5 ລ້ານກີບ ພ້ອມໃບຍ້ອງຍໍ; ລາງວັນທີ 2 ໄດ້ແກ່ທີມ ພິຊິດໄຊ ໄດ້ຮັບເງິນ 3 ລ້ານກີບ; ລາງວັນທີ 3 ໄດ້ແກ່ທີມ Wakanda ແລະ ທີມ Fetus ໄດ້ຮັບເງິນທີມລະ 1 ລ້ານກີບ.

        ພ້ອມດຽວກັນນີ້, ໃນພິທີຍັງໄດ້ມີການມອບໃບຍ້ອງຍໍອາຊຽນໄອຊີທີອາວອດ ປະຈຳປີ 2021 ໃຫ້ແກ່ ບໍລິສັດ ເວຫາເຕັກໂນໂລຊີ ຈໍາກັດ ກັບຜະລິດຕະພັນ Wayha Booking Platform; ບໍລິສັດ Maker box Lao ກັບຜະລິດຕະພັນ The MakerBox Lao ແລະ ຜະລິດຕະພັນ Digital Library Web And App Development; ບໍລິສັດ ລາຍລາວແລັບ ໄອຊີທີ ໂຊລູຊັນ ກັບຜະລິດຕະພັນ LAILAO CF; ບໍລິສັດ ບັນດາ ດິຈິຕ໋ອນ ບິວຊີເນສ ກັບຜະລິດຕະພັນ Digital Legal Aid Platform ແລະ ຜະລິດຕະພັນ COVID-19 Vaccination; ບໍລິສັດ ສະຕາໂທລະຄົມ ກັບຜະລິດຕະພັນ LaosApp Mocha; ບໍລິສັດ 57 Bytes ກັບຜະລິດຕະພັນ ບັນຊີລາວ.

         ພ້ອມນັ້ນ, ຍັງໄດ້ມອບໃບກຽດຕິຄຸນໃຫ້ບໍລິສັດ ໄຊເບີລັດ ແລະ ບໍລິສັດ XM Technovator ທີ່ໃຫ້ການສະໜັບສະໜູນງານແຂ່ງຂັນ ໂຕ້ວາທີ ແລະ Lao Cyber Security Hacking Challenge ແລະ ມອບໃບກຽດຕິຄຸນໃຫ້ຄະນະກຳມະການ ຈຳນວນ 9 ທ່ານ ທີ່ເຂົ້າຮ່ວມເປັນກຳມະການ ລາວໄອຊີທີ ແລະ ນະວັດຕະກຳ ປີ 2022.

ແຫຼ່ງ: ກະ​ຊວງ​ເຕັກ​ໂນ​ໂລ​ຊີ ແລະ ການ​ສື່​ສານ/26/12/2022