ລົງນາມບົດບັນທຶກຄວາມເຂົ້າໃຈ ສຶກສາການຈັດສັນບັນດາສາຍສົ່ງໂທລະຄົມມະນາຄົມທີ່ເກາະຫ້ອຍທາງອາກາດລົງໃຕ້ດິນ ເພື່ອຄວາມເປັນລະບຽບຮຽບຮ້ອຍ

ກະຊວງເຕັກໂນໂລຊີ ແລະ ການສື່ສານ ຮ່ວມກັບ ບໍລິສັດ ສີສັນ ພັດທະນາສາກົນ ຈຳກັດຜູ້ດຽວ, ບໍລິສັດ ໄຊຍາ ກໍ່ສ້າງ-ສ້ອມແປງ ຄົບວົງຈອນ ຈຳກັດຜູ້ດຽວ ແລະ ບໍລິສັດ ແອວໄອທີໂຊລູຊັນ ຈຳກັດຜູ້ດຽວ ລົງນາມເຊັນບົດບັນທຶກຄວາມເຂົ້າໃຈວ່າດ້ວຍການສຶກສາ ການຈັດສັນບັນດາສາຍສົ່ງໂທລະຄົມມະນາຄົມທີ່ເກາະຫ້ອຍທາງອາກາດລົງໃຕ້ດິນ ເພື່ອຄວາມເປັນລະບຽບຮຽບຮ້ອຍ, ຮັບປະກັນຄວາມຈົບງາມ, ຄວາມປອດໄພ, ຄວາມເປັນເອກະພາບໃນການພັດທະນາ, ການນຳໃຊ້ ແລະ ການບໍລິການພື້ນຖານໂຄງລ່າງສາຍສົ່ງໂທລະຄົມມະນາຄົມຕ່າງໆຕາມເສັ້ນທາງ ແລະ ຕົວເມືອງ ພາຍໃນນະຄອນຫຼວງວຽງຈັນ ແລະ ວາງແຜນຂະຫຍາຍຈັດຕັ້ງປະຕິບັດໃນຂອບເຂດທົ່ວປະເທດໃນອະນາຄົດ.

ພາຍຫຼັງສຳເລັດການເຊັນບົດບັນທຶກຄັ້ງນີ້ແລ້ວ ບັນດາຜູ້ຮ່ວມມືຈະໄດ້ແຕ່ງຕັ້ງຄະນະຮັບຜິດຊອບປະສານງານ ເພື່ອຊຸກຍູ້ສົ່ງເສີມໃຫ້ການຈັດຕັ້ງວຽກງານດັ່ງກ່າວໃຫ້ສຳເລັດຕາມບັນດາເນື້ອໃນກິດຈະກຳທີ່ໄດ້ກຳນົດ ຊຶ່ງຈະໄດ້ດໍາເນີນການສຶກສາຄວາມເປັນໄປໄດ້ຂອງໂຄງການ ແລະ ສ້າງແຜນແມ່ບົດ, ສ້າງແຜນການຈັດຕັ້ງປະຕິບັດ ແລະ ກຳນົດເວລາ. ພ້ອມທັງຈະໄດ້ປະສານງານກັບພາກສ່ວນທີ່ກ່ຽວຂ້ອງ ເປັນຕົ້ນ ພະແນກເຕັກໂນໂລຊີ ແລະ ການສື່ສານ ນະຄອນຫຼວງວຽງຈັນ, ພະແນກໂຍທາທິການ ແລະ ຂົນສົ່ງ ນະຄອນຫຼວງວຽງຈັນ, ພະແນກພະລັງງານ ແລະ ບໍ່ແຮ່ ນະຄອນຫຼວງວຽງຈັນ ແລະ ໄຟຟ້າ ນະຄອນຫຼວງວຽງຈັນ ໃນການສຶກສາ ແລະ ເກັບກຳຂໍ້ມູນ. ພ້ອມນັ້ນ​, ກໍຈະຮ່ວມກັນຄົ້ນຄວ້າເພື່ອສະເໜີປັບປຸງນິຕິກຳທີ່ກ່ຽວຂ້ອງກັບການພັດທະນາ ແລະ ນຳໃຊ້ພື້ນຖານໂຄງລ່າງ, ການໃຫ້ບໍລິການເຊົ່າໃຊ້ຕິດພັນກັບລະບົບສາຍສົ່ງໂທລະຄົມມະນາຄົມຮ່ວມກັນ ແລະ ປະສານກັບພາກສ່ວນທີ່ກ່ຽວຂ້ອງເຊັ່ນ: ກະຊວງແຜນການ ແລະ ການລົງທຶນ,​ ຫ້ອງວ່າການສຳນັກງານນາຍົກລັດຖະມົນຕີ, ສະພາແຫ່ງຊາດ ເພື່ອຄົ້ນຄວ້າການອະນຸຍາດ ສຳປະທານ ການພັດທະນາ, ການຕິດຕັ້ງ ແລະ ສະໜອງການບໍລິການເຊົ່າໃຊ້ ລະບົບສາຍສົ່ງໂທລະຄົມມະນາຄົມໃຕ້ດິນ. ຊຶ່ງການຈັດຕັ້ງປະຕິບັດແມ່ນຈະໄດ້ແບ່ງອອກເປັນ 2 ໄລຍະ ຄື: ໄລຍະທີ 1 ແມ່ນຈະສຶກສາການຈັດສັນບັນດາສາຍສົ່ງໂທລະຄົມມະນາຄົມທີ່ເກາະຫ້ອຍທາງອາກາດລົງໃຕ້ດິນ ໃນຂອບເຂດນະຄອນຫຼວງວຽງຈັນ ແນໃສ່ເພື່ອຄວາມເປັນລະບຽບຮຽບຮ້ອຍ, ຮັບປະກັນຄວາມຈົບງາມ ແລະ ຄວາມປອດໄພໃຫ້ສຳເລັດໂດຍໄວ ທັງນີ້ກໍເພື່ອກະກຽມຄວາມພ້ອມໃຫ້ແກ່ການເຈົ້າພາບຈັດກອງປະຊຸມສຸດຍອດອາຊຽນ ຂອງ ສປປ ລາວ ໃນປີ 2024 ແລະ ໄລຍະທີ 2 ແມ່ນຈະສຶກສາການຈັດສັນບັນດາສາຍສົ່ງໂທລະຄົມມະນາຄົມໃນຂອບເຂດທົ່ວປະເທດ.

ພິທິເຊັນບົດບັນທຶກດັ່ງກ່າວໄດ້ຈັດຂຶ້ນໃນຕອນແລງວັນທີ 9 ກຸມພາ 2023, ທີ່ໂຮງແຮມດອນຈັນພາເລດ, ນະຄອນຫຼວງວຽງຈັນ ຊຶ່ງຕາງໜ້າຝ່າຍກະຊວງເຕັກໂນໂລຊີ ແລະ ການສື່ສານ ຕາງໜ້າລົງນາມໂດຍ ທ່ານ ມີນາໄຊ ພິລາວົງ ຫົວໜ້າສູນອິນເຕີເນັດ ແຫ່ງຊາດ, ທ່ານ ສຸດໃຈ ລໍລອນສີ ຫົວໜ້າອົງການດັດສົມໂທລະຄົມມະນາຄົມ ແລະ ຕາງໜ້າຝ່າຍບໍລິສັດ ລົງນາມໂດຍ ທ່ານ ສັນຕິ ສີທຸມມະລັດ ປະທານ ບໍລິສັດ ສີສັນ ພັດທະນາສາກົນ ຈຳກັດຜູ້ດຽວ ແລະ ທ່ານ ວິລະສັກ ວົງໄຊ ປະທານ ບໍລິສັດ ແອວໄອທີໂຊລູຊັນ ຈຳກັດຜູ້ດຽວ ໂດຍໃຫ້ກຽດເຂົ້າຮ່ວມເປັນສັກຂີພິຍານຂອງພະນະທ່ານ ສະເຫຼີມໄຊ ກົມມະສິດ ຮອງນາຍົກລັດຖະມົນຕີ ແຫ່ງ ສປປ ລາວ, ລັດຖະມົນຕີ ກະຊວງການຕ່າງປະເທດ, ທ່ານ ບັນດິດ ສຈ. ບໍ່ວຽງຄຳ ວົງດາລາ ລັດຖະມົນຕີກະຊວງເຕັກໂນໂລຊີ ແລະ ການສື່ສານ, ທ່ານ ອາດສະພັງທອງ ສີພັນດອນ ເຈົ້າຄອງນະຄອນຫຼວງວຽງຈັນ, ມີຮອງລັດຖະມົນຕີ, ບັນດາຫົວໜ້າກົມ/ທຽບເທົ່າ ແລະ ພາກສ່ວນທີ່ກ່ຽວຂ້ອງ.

ພາບ ແລະ ຂ່າວ: ພະແນກປະຊາສໍາພັນ/ກະ​ຊວງ​ເຕັກ​ໂນ​ໂລ​ຊີ ແລະ ການ​ສື່​ສານ/10/02/2023