ສຳມະນາປຶກສາຫາລືສະພາບການພັດທະນາ ແລະ ກາລະໂອກາດ ດ້ານດິຈິຕອນ ຢູ່ ສປປ ລາວ

ໃນຕອນເຊົ້າຂອງວັນທີ 13 ຕຸລາ 2022, ທີ່ໂຮງແຮມ ລາວພລາຊ່າ, ນະຄອນຫຼວງວຽງຈັນ, ກະຊວງເຕັກໂນໂລຊີ ແລະ ການສື່ສານ(ກຕສ) ຮ່ວມກັບ ທະນາຄານໂລກ (World Bank) ປະຈໍາລາວ ໄດ້ຈັດກອງປະຊຸມສຳມະນາປຶກສາຫາລື ສະພາບການພັດທະນາ ແລະ ກາລະໂອກາດ ດ້ານດິຈິຕອນ ຢູ່ ສປປ ລາວ (Positioning Lao PDR for a Digital Future)  ໂດຍໃຫ້ກຽດເປັນປະທານຮ່ວມຂອງທ່ານ ປອ. ສັນຕິສຸກ ສິມມາລາວົງ, ຮອງລັດຖະມົນຕີ ກຕສ ແລະ ທ່ານ Alexander Kremer, ຫົວໜ້າຫ້ອງການທະນາຄານໂລກ ປະຈໍາ ສປປ ລາວ, ຊຶ່ງມີຜູ້ເຂົ້າຮ່ວມຈາກກະຊວງ/ອົງການທຽບເທົ່າ ແລະ ພາກເອກະຊົນ ກ່ຽວຂ້ອງ ຈຳນວນ 60 ທ່ານ.

ໃນການຮ່ວມມືກັບທະນາຄານໂລກຈັດກອງປະຊຸມສຳມະນາຄັ້ງນີ້ ກໍ່ແມ່ນໜຶ່ງໃນກິດຈະກຳ ເພື່ອຊຸກຍູ້ສົ່ງເສີມການຫັນເປັນດິຈິຕອນ ຂອງ ສປປ ລາວ ຊຶ່ງເປັນການສ້າງກະລະໂອກາດໃຫ້ມີການປຶກສາຫາລືຮ່ວມກັນຂອງພາກລັດ ແລະ ເອກະຊົນທີ່ກ່ຽວຂ້ອງໂດຍສະເພາະໃນວຽກງານການກຽມຄວາມພ້ອມ ດ້ານການເຊື່ອມໂຍງດິຈິຕອນ, ການຊຳລະສະສາງແບບດິຈິຕອນ ແລະ ລັດຖະບານດິຈິຕອນ ຊຶ່ງຈະຊ່ວຍໃຫ້ລັດຖະບານ ກໍຄື ກະຊວງແຜນການ ແລະ ການລົງທຶນ ແລະ ກະຊວງເຕັກໂນໂລຊີ ແລະ ການສື່ສານ ຈັດບຸລິມະສິດ ແລະ ລົງເລິກ ການດຳເນີນການຕາມທີ່ໄດ້ລະບຸໄວ້ໃນ ຍຸດທະສາດເສດຖະກິດດິຈິຕອນ.

  ໂອກາດດັງກ່າວ, ທ່ານ ປອ. ສັນຕິສຸກ ສິມມາລາວົງ ໄດ້ກ່າວວ່າ: ການຫັນເປັນເສດຖະກິດດິຈິຕອນຢູ່ ສປປ ລາວ ມີທັງກາລະໂອກາດ ແລະ ສິ່ງທ້າທາຍຫຼາຍຢ່າງ ການຈັດສຳມະນາໃນມື້ນີ້ມີຫຼາຍຫົວຂໍ້ ທີ່ພວກເຮົາຈະໄດ້ມາສົນທະນາປຶກສາຫາລືກັນໃນມື້ນີ້. ໃນປັດຈຸບັນ, ລັດຖະບານໃຫ້ຄວາມສຳຄັນຕໍ່ການພັດທະນາໄອຊີທີ ແລະ ການຫັນເປັນດິຈິຕອນ ຂອງພາກລັດ ພາກທຸລະກິດ ແລະ ທົ່ວສັງຄົມ ໂດຍໄດ້ວາງນະໂຍບາຍສົ່ງເສີມວຽກງານດັ່ງກ່າວ ໃນຮູບແບບການຮ່ວມມື ພາຍໃນ ແລະ ຕ່າງປະເທດ ນອກຈາກນີ້, ລັດຖະບານ ຍັງໄດ້ສ້າງເງື່ອນໄຂໃຫ້ ສະຕາດອັບ ແລະ MSMEs ສາມາດເຂົ້າເຖິງແຫຼ່ງທຶນ ໄດ້ສະດວກຫຼາຍຂຶ້ນ ໃຫ້ບັນດາຜູ້ປະກອບການພາຍໃນປະເທດ ສາມາດສ້າງຜະລິດຕະພັນ ແລະ ການບໍລິການດ້ວຍເຕັກໂນໂລຊີດິຈິຕອນໃຫ້ຫຼາຍຂຶ້ນ. ບັນດາຫົວຂໍ້ທີ່ຊ່ຽວຊານ ແລະ ຜູ້ຕາງໜ້າ ຈາກທະນາຄານໂລກຈະໄດ້ນຳສະເໜີເພື່ອເປັນຂໍ້ມູນເບື້ອງຕົ້ນໃຫ້ແກ່ການສົນທະນາທີ່ລວມມີບັນດາຂໍ້ສະຫຼຸບຂອງບົດລາຍງານວຽກງານການເຊື່ອມໂຍງເຊື່ອມຈອດ ແລະ ພື້ນຖານໂຄງລ່າງ, ການຊຳລະດ້ວຍລະບົບດິຈິຕອນ, ທັກສະດິຈິຕອນ, ຖານລະບົບເສດຖະກິດ ແລະ ລັດຖະບານ ດິຈິຕອນ. ນອກນັ້ນ,​ ເນື່ອງຈາກວ່າຕະຫຼາດຂອງ ສປປ ລາວ ແມ່ນເປັນຕະຫຼາດທີ່ນ້ອຍທຽບໃສ່ຈຳນວນພົນລະເມືອງໄປພ້ອມໆກັບ ທົ່ວສັງຄົມກຳລັງສຸມໃສ່ການຟື້ນຟູຈາກການແຜ່ລະບາດຂອງພະຍາດ COVID-19 ແລະ ເປັນປະເທດທີ່ບໍ່ມີຊາຍແດນຕິດກັບທະເລ ສະນັ້ນ, ໃນນາມ ກຕສ ແລະ ໃນນາມສ່ວນຕົວຂ້າພະເຈົ້າແມ່ນມີຄວາມສົນໃຈໃນຫົວຂໍ້ທີ່ຊ່ຽວຊານ ແລະ ຜູ້ຕາງໜ້າ ຈາກທະນາຄານໂລກຈະໄດ້ສົນທະນາກັນໃນມື້ນີ້ ເພື່ອຈະເຫັນໄດ້ເຖິງບັນດາຈຸດສຳຄັນຕ່າງໆທີ່ພວກເຮົາຈະຊ່ວຍກັນຍາດແຍ່ງ ແລະ ຊຸກຍູ້ໃຫ້ເກີດດອກອອກຜົນໃນສະພາບການປະຈຸບັນ.

  ໃນກອງປະຊຸມສຳມະນາຄັ້ງນີ້ຈະໄດ້ຮັບຟັງ ແລະ ແລກປ່ຽນຄໍາຄິດເຫັນນໍາກັນ ກ່ຽວກັບການພັດທະນາ ແລະ ນຳໃຊ້ເຕັກໂນໂລຊີດິຈິຕອນ ໂດຍສະເພາະໃນວຽກງານການກຽມຄວາມພ້ອມດ້ານການເຊື່ອມໂຍງດິຈິຕອນ ໃນການຫັນເປັນດິຈິຕອນຂອງພາກລັດ ໃຫ້ສາມາດເຊື່ອມສານເຂົ້າໃນທຸກກະຊວງ, ທຸກຂະແໜງການ ແລະ ອົງການຈັດຕັ້ງອືີ່ນໆ ຂອງລັດຖະບານ.  ຜູ້ເຂົ້າຮ່ວມໄດ້ຮັບຟັງການນໍາສະເໜີຈາກພາກສ່ວນທະນາຄານໂລກ ທັງແບບອອນລາຍ ແລະ ແບບເຊິ່ງໜ້າ ຈໍານວນ 3 ຫົວຂໍ້ ຄື: 1) ນໍາສະເໜີກ່ຽວກັບ “ໂຄງສ້າງພື້ນຖານ/ການເຊື່ອມໂຍງດິຈິຕອນ” ; 2) ນໍາສະເໜີກ່ຽວກັບ“ການຊຳລະເງິນດິຈິຕອນ”  ແລະ 3) ນໍາສະເໜີກ່ຽວກັບ “ລັດຖະບານດິຈິຕອນ”. ນອກນັ້ນ, ຍັງໄດ້ເປີດໂອກາດໃຫ້ຜູ້ເຂົ້າຮ່ວມ ຖາມ-ຕອບ ແລະ ປະກອບຄຳເຫັນຕໍ່ວຽກງານດັ່ງກ່າວ ຊຶ່ງເຕັມໄປດ້ວຍບັນຍາກາດຟົດຟື້ນ, ກົງໄປກົງມາ ແລະ ເປັນປະໂຫຍດ ເພື່ອລະດົມແນວຄວາມຄິດ ໃນການພັດທະນາວຽກງານດັ່ງກ່າວໃຫ້ສົມບູນ ແລະ ມີປະສິດທິພາບສູງ.

ແຫຼ່ງ: ກະ​ຊວງ​ເຕັກ​ໂນ​ໂລ​ຊີ ແລະ ການ​ສື່​ສານ/13/10/2022