ສຳມະນາ ສະຕາດອັບໃນຍຸກການຫັນເປັນດິຈິຕ໋ອນແກ່ໄວໜຸ່ມຍຸກໃໝ່

      ກອງປະຊຸມສຳມະນາສະຕາດອັບ ໃນຍຸກການຫັນເປັນດິຈິຕ໋ອນ (Startup Seminar) ໃຫ້ແກ່ໄວໜຸ່ມຍຸກໃໝ່ ໂດຍເນັ້ນ 3 ຫົວຂໍ້ຫຼັກຄື: ສົນທະນາກັບສະຕາດອັບແຖວໜ້າຂອງລາວ ແລະ ສາກົນ, ສົນທະນາການເຂົ້າເຖິງແຫຼ່ງທຶນສໍາລັບ SME ແລະ STARTUP ແລະ ສົນທະນາກ່ຽວກັບການຫັນເປັນດິຈິຕ໋ອນຂອງໂລກ ເພື່ອສົ່ງເສີມວຽກງານສະຕາດອັບໃຫ້ມີການຂະຫຍາຍຕົວ, ກ້າວໜ້າ, ທັນສະໄໝ ແລະ ຍືນຍົງ.

       ກອງປະຊຸມສຳມະນາດັ່ງກ່າວໄດ້ຈັດຂຶ້ນໃນວັນທີ 23 ທັນວາ 2022, ຜ່ານມານີ້, ທີ່ຫໍປະຊຸມແຫ່ງຊາດໂດຍການເຂົ້າຮ່ວມຂອງທ່ານ ຄຳຫຼ້າ ສູນນະລັດ, ຫົວໜ້າກົມຄວາມປອດໄພໄຊເບີ້, ທ່ານ ນ. ເກສອນ ສຸລິວົງ, ຮັກສາການຫົວໜ້າສູນສົ່ງເສີມ ແລະ ຖ່າຍທອດເຕັກໂນໂລຊີ, ທ່ານ ນ. ຄຳຍອງ ສີຈັນທະວົງ, ຮອງຫົວໜ້າກົມເຕັກໂນໂລຊີ ແລະ ນະວັດຕະກຳ, ທ່ານ ລິດທິເດດ ຄຳຮຸ່ງ, ຫົວໜ້າພະແນກພັດທະນາຜູ້ປະກອບການ, ກົມສົ່ງເສີມວິສາຫະກິດຂະໜາດນ້ອຍ ແລະ ກາງ, ກະຊວງອຸດສາຫະກຳ ແລະ ການຄ້າ, ທ່ານ PIL SEONG KIM ປະທານສະມາຄົມ Kotra ພ້ອມພາກສ່ວນກ່ຽວຂ້ອງ ແລະ ນັກສຶກສາ-ໄວໜຸ່ມເຂົ້າຮ່ວມ.

     ໂອກາດດັ່ງກ່າວ, ທ່ານ ຄຳຫຼ້າ ສູນນະລັດ ກ່າວວ່າ: ດັ່ງທີ່ຊາບກັນແລ້ວວ່າ ໃນໄລຍະຜ່ານມາ ວຽກງານການສົ່ງເສີມສະຕາດອັບ ແມ່ນກໍາລັງໄດ້ຮັບການຈັດຕັ້ງປະຕິບັດຢ່າງຕັ້ງໜ້າ ໂດຍກະຊວງເຕັກໂນໂລຊີ ແລະ ການສື່ສານ ໄດ້ສ້າງວິໄສທັດພັດທະນາເສດຖະກິດດິຈິຕ໋ອນແຫ່ງຊາດ 20 ປີ (2021-2040), ຍຸດທະສາດພັດທະນາເສດຖະກິດດິຈິຕ໋ອນແຫ່ງຊາດ 10 ປີ (2021–2030) ແລະ ແຜນພັດທະນາເສດຖະກິດດິຈິຕ໋ອນ 5 ປີ (2021-2025) ໃນນັ້ນປະກອບດ້ວຍ 14 ແຜນວຽກ ແລະ ແຜນວຽກທີ 7 ໄດ້ລະບຸເຖິງການສົ່ງເສີມທຸລະກິດ SME ແລະ STARTUP ໂດຍການນໍາໃຊ້ເຕັກໂນໂລຊີດິຈິຕ໋ອນ ແລະ ສະພາແຫ່ງຊາດໄດ້ຮັບຮອງເອົາແຜນດັ່ງກ່າວ ໃນວັນທີ 16 ພະຈິກ 2021 ທີ່ຜ່ານມາ.

       ຈຸດປະສົງຂອງກອງປະຊຸມສໍາມະນາໃນຄັ້ງນີ້ ກໍເພື່ອເປັນການສ້າງຄວາມເຂົ້າໃຈ ແລະ ເຫັນໄດ້ເຖິງຄວາມສຳຄັນ ໃນວຽກງານການສົ່ງເສີມສະຕາດອັບ ຊຶ່ງເປັນໜຶ່ງໃນແຜນຍຸດທະສາດການພັດທະນາເສດຖະກິດ-ສັງຄົມ. ພ້ອມນັ້ນ, ຜູ້ເຂົ້າຮ່ວມໃນງານຍັງໄດ້ຮັບຟັງການແລກປ່ຽນຄວາມຮູ້, ປະສົບການ ແລະ ຄວາມຄິດເຫັນ ຈາກຕາງໜ້າ ຜູ້ກໍ່ຕັ້ງຊຽງໝ້ຽງ ເທັກໂນເວເຕີ; ຕົວແທນຈາກຕົວແທນ ໂກ້ຕ້າ kotra; ຈາກຟູດແພນດ້າ; ຕົວແທນຈາກ ກອງທຶນສົມທົບທຸລະກິດ, ຈາກສະພາການຄ້າ ແລະ ອຸດສາຫະກຳແຫ່ງຊາດລາວ ແລະ ອີກຫຼາຍພາກສ່ວນ.