ເຈລະຈາປັບປຸງສັນຍາການຄ້າເສລີ ອາຊຽນ-ອົດສະຕາລີ-ນິວຊີແລນ (AANZFTA) ວຽກໂທລະຄົມມະນາຄົມ ຄັ້ງທີ V

 ເມື່ອບໍ່ດົນມານີ້, ອົງການດັດສົມໂທລະຄົມມະນາຄົມ, ກະຊວງເຕັກໂນໂລຊີ ແລະ ການສື່ສານ ໃນນາມຫົວໜ້າຄະນະເຈລະຈາ ຝ່າຍ ສປປ ລາວ ພາກໂທລະຄົມ ໄດ້ສືບຕໍ່ເຂົ້າຮ່ວມກອງປະຊຸມເຈລະຈາ ປັບປຸງສັນຍາການຄ້າເສລີ ອາຊຽນ-ອົດສະຕາລີ-ນິວຊີແລນ (ASEAN-Australia New Zealand Free Trade Agreement-AANZFTA) ວຽກໂທລະຄົມມະນາຄົມ ຄັ້ງທີ V ຜ່ານລະບົບກອງປະຊຸມທາງໄກ, ຕາງໜ້າຫົວໜ້າຄະນະຝ່າຍລາວເຂົ້າຮ່ວມຊຶ່ງນຳພາໂດຍ ທ່ານ ປອ.  ນາງ ໃຈມາລີ ພະກະຊຸມ, ຮອງຫົວໜ້າ ອົງການດັດສົມໂທລະຄົມມະນາຄົມ ພ້ອມດ້ວຍພະນັກງານທີ່ກ່ຽວຂ້ອງພາຍໃນເຂົ້າຮ່ວມ.

ພາຍຫລັງທີ່ໄດ້ປຶກສາຫາລືກັນພາຍໃນປະເທດອາຊຽນ ຫຼື (ASEAN Caucus)ແລ້ວ ກອງປະຊຸມຄັ້ງນີ້ເປັນກອງປະຊຸມຮອບ (ASEAN Plenary) ຊື່ງແມ່ນກອງປະຊູມລະຫວ່າງ ບັນດາປະເທດອາຊຽນ ກັບ ຄູ່ເຈລະຈາ ເນື້ອໃນຂອງກອງປະຊຸມຄັ້ງນີ້ແມ່ນ ໄດ້ພ້ອມກັນພິຈາລະນາ  4 ມາດຕາ​ທີ່​ຍັງຄ້າງໃນກອງປະຊຸມຄັ້ງກ່ອນ ໃນອົງປະກອບທີ່ເອີ້ນວ່າ  RCEP-plus ຊຶ່ງປະເທດອົດສະຕາລີ ແລະ ນິວຊີແລນ ໄດ້ຊີ້ແຈງໃຫ້ບັນດາປະເທດອາຊຽນຕໍ່ກັບການເພີ່ມມາດຕາ:  ສະຖານີສາຍສົ່ງທາງທະເລສາກົນ (International Submarine Cable System),  ຄວາມ​ໂປ່ງ​ໃສ​ (Transparency), ການແຍກສ່ວນຂອງໂຄງປະກອບເຄືອຂ່າຍ​ (Unbundling of Network Elements), ການໃຫ້ບໍລິການໂທລະສັບມືຖືລະຫວ່າງປະເທດ (International Mobile Roaming). ຜ່ານການແລກປ່ຽນຄໍາເຫັນ ບັນດາຂໍ້ສະເໜີໃໝ່ຂອງ ປະເທດອົດສະຕາລີ ແລະ ນິວຊິແລນ ແມ່ນຈະຖືກຊັບຊ້ອນຄືນໃນມາດຕາທີ່ມີແລ້ວ ແລະ ສະໜອງຂໍ້ມູນໃຫ້ທາງອາຊຽນພິຈາລະນາຕື່ມໃນກອງປະຊຸມຄັ້ງທີ VI ໃນກາງເດືອນພຶດສະພາ ແລະ ຄາດຄະເນໃຫ້ ສໍາເລັດການເຈລະຈາຄັ້ງສຸດທ້າຍໃນເດືອນ ມິຖຸນາ ປີ 2022 ນີ້.

  ພາບ ແລະ ຂ່າວ: ພະແນກດັດສົມໂທລະຄົມມະນາຄົມ ແລະ ອິນເຕີເນັດ./29/04/2022