ໄອທີລາວ
ເຊັນສັນຍາຮ່ວມມືພັດທະນາ ແລະ ບໍລິການພລັດຟອມ ເພື່ອການສະໜອງຂໍ້ມູນຂ່າວສານ ແລະ ການບໍລິການພາກລັດ
ກະຊວງເຕັກໂນໂລຊີ ແລະ ການສື່ສານ(ກຕສ) ແລະ ກຸ່ມບໍລິສັດ ໂຄລາວ(ບໍລິສັດ ກ໊ອກກ໊ອກແຊັດ ຈໍາກັດຜູ້ດຽວ ຮ່ວມກັນລົງນາມເຊັນສັນຍາຮ່ວມມື ພັດທະນາ ແລະ ບໍລິການ ພລັດຟອມ (Platform) ເພື່ອການສະໜອງຂໍ້ມູນຂ່າວສານ ແລະ ການບໍລິຫານພາກລັດ ເພື່ອໃຫ້ບໍລິການຕ່າງໆແກ່ປະຊາຊົນຜູ້ນຳໃຊ້ໄດ້ຢ່າງສະດວກສະບາຍ ໂດຍຮ່ວມ ກັນສຶກສາ ແລະ ຄົ້ນຄ້ວາຄວາມເປັນໄປໄດ້ໃນການທີ່ຈະສ້າງສູນລວມຂອງທຸກການບໍລິການຂອງພາກລັດ ເຂົ້າໃນ ພລັດຟອມດຽວ, ສ້າງລະບົບຖານຂໍ້ມູນ ແລະ ເຊື່ອມໂຍງກັບບັນດາຖານຂໍ້ມູນຂ່າວສານຂອງບັນດາກະຊວງ ແລະ ຂະ ແໜງການກ່ຽວຂ້ອງທີ່ມີຢູ່ແລ້ວ ເພື່ອກຽມພ້ອມໃນການພັດທະນາອອກແບບ ແລະ ພັດທະນາລະບົບ ພລັດຟອມ (ລະບົບໂປຣແກຣມທີ່ເຮັດການບໍລິການຜ່ານປະຕູດຽວ (One Stop Service Application)) ໃນການສະຫນອງການບໍລິການ ເປັນຕົ້ນເຊັ່ນ: ສະໜອງຂໍ້ມູນຂ່າວສານ ເຊື່ອມຕໍ່ໜ້າຂ່າວສານຈາກບັນດາສຳນັກຂ່າວຕ່າງໆຂອງພາກລັດ(News), ເນື້ອໃນ(Contents) ທີ່ທາງລັດຖະບານຕ້ອງການສື່ສານ ແລະ ສົ່ງເສີມ, ແຈ້ງການຈາກລັດຖະບານ(Notifications), ລະບຽບ ແລະ ກົດໝາຍ ລວມເຖິງການບໍລິການຂອງພາກລັດຜ່ານລະບົບດິຈິຕ໋ອນ ເຊັ່ນ: ການບໍລິການບັດປະຈຳຕົວ, ສຳມະໂນຄົວ, ໜັງສືຜ່ານແດນ ແລະ ການຂໍວີຊ້າ, ປະກັນສັງຄົມ ແລະ ເງິນອຸດໜຸນຕ່າງໆ, ຈ່າຍຄ່າທາງ, ພາສີທີ່ດິນ, ພາສີ, ອາກອນ ແລະ ຄ່າປັບໃໝຕ່າງໆ, ການຂື້ນທະບຽນ, ການຂໍອະນຸຍາດໃນການດຳເນີນທຸລະກິດ ແລະ ການບໍລິການອື່ນໆທີ່ຈຳເປັນ ແລະ ພ້ອມການຊໍາລະສະສາງທາງດິຈິຕອນ. ພ້ອມນັ້ນ, ທັງຈະເປັນການຊຸກຍູ້ສົ່ງເສີມ ແລະ ຂະຫຍາຍການນໍາໃຊ້ ພລັດຟອມ ໃຫ້ກ້ວາງຂວາງຜ່ານຂະບວນການຕະຫລາດ, ການໂຄສະນາປະຊາສໍາພັນ, ການຊຸກຍູ້ ແລະ ເຊື່ອມໂຍງ ລະບົບເຂົ້້າກັບບັນດາລະບົບຕ່າງໆທີ່ມີການນໍາໃຊ້ໃນ ສປປ ລາວ ຕາມການອະນຸຍາດ ແລະ ເຫັນດີຂອງທຸກຝ່າຍທີ່ກ່ຽວຂ້ອງ ແລະ ຈັດຕັ້ງໜ່ວຍງານໃນການຄຸ້ມຄອງ, ບໍລິການ, ກວດກາຕິດຕາມ ການນໍາໃຊ້ ພລັດຟອມ ຮັບປະກັນຄວາມໝັ້້ນຄົງ, ຄວາມປອດໄພ ລວມທັງການຝຶກອົບຮົມ-ສໍາມະນາແນະນໍາກ່ຽວກັບການນໍາໃຊ້ລະບົບຄຽງຄູ່ກັບການສ້າງລາຍຮັບ ແລະ ຜົນປະໂຫຍດຈາກການບໍລິການ ແລະ ການນໍາໃຊ້ພລັດຟອມຕາມລະບຽບກົດໝາຍ ຂອງ ສປປລາວ.
ຊຶ່ງການເຊັນສັນຍາໃນຄັ້ງນີ້, ກໍແມ່ນເພື່ອເປັນການຈັດຕັ້ງຜັນຂະຫຍາຍແຜນວິໄສທັດ, ແຜນຍຸດທະສາດ ແລະ ແຜນພັດທະນາເສດຖະກິດດິຈິຕອນແຫ່ງຊາດ ທີ່ສະພາແຫ່ງຊາດໄດ້ມີການຮັບຮອງເມື່ອບໍ່ດົນມານີ້ ບັນດາກະຊວງ ແລະ ອົງການຈັດຕັ້ງຕ່າງໆ ກໍໄດ້ມີແນວຄວາມຄິດ, ມີແຜນການ ຫຼື ມີໂຄງການ ໃນການປັບປຸງການຄຸ້ມຄອງບໍລິຫານຕົນໃຫ້ເປັນທັນສະໄໝ ບົນພື້ນຖານຂອງການນໍາໃຊ້ເຕັກໂນໂລຊີ ດິຈິຕອນ ເພື່ອສ້າງກາລະໂອກາດໃໝ່ໃນການບໍລິການແກ່ພາກທຸລະກິດ ແລະ ປະຊາຊົນ ໃຫ້ມີຄວາມສະດວກວ່ອງໄວ ແລະ ປະທັບໃຈຫລາຍຂຶ້ນ.
ພິທີລົງນາມເຊັນສັນຍາດັ່ງກ່າວໄດ້ຈັດຂຶ້ນໃນວັນທີ 19 ຕຸລາ 2022 ນີ້, ທີ່ໂຮງແຮມ ແລນມາກ, ນະຄອນຫຼວງວຽງຈັນ ຮ່ວມລົງນາມຄັ້ງນີ້ຝ່າຍ ກຕສ ມີທ່ານ ພູຂົງ ຈິດຮູບໂລກ, ຫົວໜ້າຫ້ອງການ, ທ່ານ ປອ. ທະວິສັກ ມະໂນທຳ, ຫົວໜ້າ ສູນບໍລິຫານລັດ ດິຈິຕອນ ແລະ ຝ່າຍກຸ່ມບໍລິສັດ ໂຄລາວ ມີທ່ານ ປອ. ຄໍາຂັນ ນະພາວົງ, ຮອງປະທານໃຫຍ່ບໍລິສັດ, ທ່ານ ອານຸສິດ ກຸນລະວົງ, ຜູ້ອຳນວຍການ ບໍລິສັດ ກ໊ອກກ໊ອກ ຈຳກັດຜູ້ດຽວ ໂດຍມີທ່ານ ບັນດິດ ສຈ. ບໍ່ວຽງຄຳ ວົງດາລາ, ລັດຖະມົນຕີ ກຕສ, ຄະນະປະທານ ແລະ ອໍານວຍການບໍລິສັດ, ພ້ອມດ້ວຍບັນດາຫົວໜ້າກົມ/ທຽບເທົ່າ, , ຫົວໜ້າ/ຮອງພະແນກ ແລະ ພະນັກງານວິຊາການທັງສອງຝ່າຍ ເຂົ້າຮ່ວມເປັນສັກຂີພິຍານ.
ພາບ+ຂ່າວ: ເລັກເຊ່ຍ ສຸດທິວົງ, ພະແນກປະຊາສໍາພັນ.
ກວດແກ້: ບຸນທັນ ນັນທະວົງ