ເຊັນສັນຍາໂຄງການກໍ່ສ້າງສະຖາບັນເຕັກໂນໂລຊີການສື່ສານຂໍ້ມູນຂ່າວສານ

ໂຄງການກໍ່ສ້າງສູນຝຶກອົບຮົມດ້ານໄອຊີທີ ເພື່ອຍົກລະດັບສະຖາບັນເຕັກໂນໂລຊີການສື່ສານຂໍ້ມູນຂ່າວສານ ໃຫ້ກາຍເປັນສະຖາບັນໜຶ່ງທີ່ຊ່ວຍສ້າງ ແລະ ພັດທະນາບຸກຄະລາກອນໃນຂະແໜງເຕັກໂນໂລຊີ ແລະ ການສື່ສານ ເພື່ອຕອບສະໜອງໃຫ້ແກ່ແຜນພັດທະນາເສດຖະກິດດິຈິຕອນ ແຫ່ງຊາດຂອງ ສປປ ລາວ ໂດຍໄດ້ຮັບການຊ່ວຍເຫຼືອລ້າຈາກລັດຖະບານແຫ່ງ ສປ. ຈີນ ໃນມູນຄ່າລວມຂອງການກໍ່ສ້າງປະມານ 85,72 ລ້ານຢວນ.

       ທ່ານ ປອ. ປະດັບໄຊ ໄຊຍະໂຄດ, ຮອງຫົວໜ້າສະຖາບັນເຕັກໂນໂລຊີການສື່ສານຂໍ້ມູນຂ່າວສານ, ກະຊວງ ເຕັກໂນໂລຊີ ແລະ ການສື່ສານ ທັງເປັນຫົວໜ້າຄະນະຄຸ້ມຄອງໂຄງການກ່າວວ່າ: ໂຄງການກໍ່ສ້າງສະຖາບັນເຕັກໂນໂລຊີການສື່ສານຂໍ້ມູນຂ່າວສານ ແມ່ນໂຄງການອອກແບບກໍ່ສ້າງສູນຝຶກອົບຮົມດ້ານໄອຊີທີ ເປັນອາຄານ 5 ຊັ້ນ ຈຳນວນ 1 ຫຼັງ ໂດຍມີເນື້ອທີ່ທັງໝົດ 5,524.56 ຕາແມັດ ປະກອບດ້ວຍຫ້ອງຮຽນທຳມະດາ, ຫ້ອງຮຽນທັນສະໄໝ, ຫ້ອງທົດລອງ, ຫ້ອງການ, ຫ້ອງສະໝຸດ, ຫ້ອງປະຊຸມໃຫຍ່ ເປັນຕົ້ນ. ໃນອາຄານປະກອບດ້ວຍອຸປະກອນການຮຽນ-ການສອນ ທີ່ຈຳເປັນ, ອຸປະກອນຫ້ອງທົດລອງ ແລະ ສິ່ງອຳນວຍຄວາມສະດວກຕ່າງໆ ພາຍຫຼັງໂຄງການລິເລີ່ມການກໍ່ສ້າງ ຄູ-ອາຈານ ແລະ ນັກສຶກສາຈໍານວນໜຶ່ງ ຈະໄດ້ຮັບການຝຶກອົບຮົມ ແລະ ສອບເສັງວັດລະດັບ ເພື່ອກຽມພ້ອມຮອງຮັບໃນການເປີດສູນ.

ທ່ານ ຍັງໄດ້ໃຫ້ຮູ້ວ່າ: ໂຄງການດັ່ງກ່າວ, ເປັນໂຄງການທຳອິດທີ່ໄດ້ດຳເນີນການ ແລະ ຄຸ້ມຄອງໃນຮູບແບບຝ່າຍລາວຈັດຕັ້ງປະຕິບັດເອງ ດ້ວຍຜ່ານຮູບແບບການປະມູນເພື່ອຄັດເລືອກເອົາບໍລິສັດທີ່ຈະມາຮັບຜິດຊອບ ອອກແບບ-ກໍ່ສ້າງ, ຜ່ານການຄັດບໍລິສັດທີ່ມີຄວາມພ້ອມທາງດ້ານເຕັກນິກ ແລະ ຖືກຕ້ອງຕາມເງື່ອນໄຂທີ່ກຳນົດໄວ້ ໂດຍໄດ້ເລືອກເອົາ ກຸ່ມບໍລິສັດ ກໍ່ສ້າງທາງລົດໄຟ ແຫ່ງປະເທດຈີນຈໍາກັດ (China Railway Construction Group Co., Ltd) ເປັນຜູ້ຊະນະການປະມູນໂຄງການ ຊຶ່ງຄາດຄະເນວ່າຈະສາມາດເລີ່ມການກໍ່ສ້າງໃນທ້າຍເດືອນມີນາ ປີ 2022 ແລະ ຈະສຳເລັດການກໍ່ສ້າງ ສົ່ງມອບໂຄງການໃນທ້າຍເດືອນ ພະຈິກ ປີ 2023.

ພິທີເຊັນສັນຍາໂຄງການກໍ່ສ້າງດັ່ງກ່າວໄດ້ຈັດຂຶ້ນໃນວັນທີ 11 ມີນາ 2022 ຜ່ານມານີ້, ທີ່ໂຮງແຮມ ດອນຈັນ ພາເລດ, ນະຄອນຫຼວງວຽງຈັນ ລົງນາມໂດຍທ່ານ ປອ. ປະດັບໄຊ ໄຊຍະໂຄດ, ຮອງຫົວໜ້າສະຖາບັນເຕັກໂນໂລຊີການສື່ສານຂໍ້ມູນຂ່າວສານ ແລະ ທ່ານ ນ. ປາລິດາ (Li Yan) ຜູ້ຈັດການການຂາຍ ຕາງໜ້າ ກຸ່ມບໍລິສັດກໍ່ສ້າງທາງລົດໄຟແຫ່ງປະເທດຈີນ ໂດຍໃຫ້ກຽດເຂົ້າຮ່ວມເປັນສັກຂີພະຍານຂອງທ່ານ ປອ. ສັນຕິສຸກ ສິມມາລາວົງ, ຮອງເລຂາຄະນະພັກກະຊວງ, ຮອງລັດຖະມົນຕີ ກະຊວງ ເຕັກໂນໂລຊີ  ແລະ ການສື່ສານ, ທ່ານ ຈ້າວ ເວີນຢູ (ZHAO WENYU) ທີ່ປຶກສາເສດຖະກິດການຄ້າ ສະຖານທູດຈີນປະຈໍາລາວ ພ້ອມດ້ວຍ ບັນດາທ່ານແຂກທີ່ຖືກເຊີນ.

ແຫຼ່ງ:ກະ​ຊວງ​ເຕັກ​ໂນ​ໂລ​ຊີ ແລະ ການ​ສື່​ສານ/14/03/2022