ເປີດຢ່າງເປັນທາງການ ງານວາງສະແດງ ແລະ ຈັບຄູ່ຮ່ວມມື ດ້ານເຕັກໂນໂລຊີ ນະວັດຕະກຳ ລາວ-ຫວຽດນາມ (Tech Innovation Laos-Vietnam) 2023

ງານວາງສະແດງ ແລະ ຈັບຄູ່ຮ່ວມມື ດ້ານເຕັກໂນໂລຊີ ນະວັດຕະກຳ ລາວ-ຫວຽດນາມ (Tech Innovation Laos-Vietnam) 2023 ໄດ້ຈັດຂຶ້ນຢ່າງເປັນທາງການໃນຕອນບ່າຍຂອງວັນທີ 4 ເມສາ 2023, ທີ່ຫ້ອງປະຊຸມໃຫຍ່ ສູນຮ່ວມມືສາກົນ ແລະ ການຝືກອົບຮົມ (ICTC) ນະຄອນຫຼວງວຽງຈັນ ຊຶ່ງຈັດໂດຍ ກະຊວງເຕັກໂນໂລຊີ ແລະ ການສື່ສານ, ສປປ ລາວ ຮ່ວມກັບ ກະຊວງວິທະຍາສາດ ແລະ ເຕັກໂນໂລຊີ, ສສ ຫວຽດນາມ. ໃຫ້ກຽດເຂົ້າຮ່ວມໃນພິທີໂດຍ ທ່ານ ບັນດິດ ສຈ. ບໍ່ວຽງຄຳ ວົງດາລາ, ລັດຖະມົນຕີ ກະຊວງເຕັກໂນໂລຊີ ແລະ ການສື່ສານ, ສປປ ລາວ, ທ່ານ ເຈີນ ວັນ ຕຸງ, ຮອງລັດຖະມົນຕີ ກະຊວງວິທະຍາສາດ ແລະ ເຕັກໂນໂລຊີ, ສສ ຫວຽດນາມ, ມີບັນດາທ່ານຮອງລັດຖະມົນຕີ, ບັນດາແຂກທີ່ຖືກເຊີນ, ບັນດາສະຖາບັນການຄົ້ນຄວ້າ, ສະຖາບັນການສຶກສາ, ພາກສ່ວນທຸລະກິດ ແລະ ຜູ້ປະກອບກິດຈະການທຸລະກິດ ເຂົ້າຮ່ວມ 300 ກວ່າຄົນ.

ການຈັດງານຄັ້ງນີ້ ແມ່ນເພື່ອເປັນການຈັດຕັ້ງຜັນຂະຫຍາຍ ມະຕິຂອງກອງປະຊຸມໃຫຍ່ ຄັ້ງທີ XI ຂອງພັກ ແລະ ແຜນພັດທະນາເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ IX ຢ່າງເປັນຂະບວນຫ້າວຫັນຟົດຟື້ນ, ລັດຖະບານ ແຫ່ງ ສປປ ລາວ ສຸມໃສ່ການສ້າງຂໍ້ລິເລີ່ມໃນການພັດທະນາ ຫັນສູ່ດິຈິຕອນ ໂດຍຖືເອົາວຽກງານ ເຕັກໂນໂລຊີ ແລະ ການສື່ສານ ເປັນວຽກງານປາຍແຫຼມສຳຄັນ ເພື່ອປະກອບສ່ວນໃນການພັດທະນາເສດຖະກິດ-ສັງຄົມ ແຫ່ງຊາດ. ເພື່ອເປັນການຜັນຂະຫຍາຍ ວິໄສທັດການພັດທະນາເສດຖະກິດດິຈິຕ໋ອນແຫ່ງຊາດ ໄລຍະ 20 ປີ (2021-2040), ຍຸດທະສາດການພັດທະນາ ເສດຖະກິດດິຈິຕ໋ອນ ແຫ່ງຊາດ ໄລຍະ 10 ປີ (2021-2030) ແລະ ແຜນພັດທະນາ ເສດຖະກິດດິຈິຕ໋ອນ ແຫ່ງຊາດ ໄລຍະ 5 ປີ (2021-2025) ຊຶ່ງເປັນປັດໄຈສໍາຄັນເພື່ອກະຕຸກຊຸກຍູ້ໃຫ້ເສດຖະກິດ-ສັງຄົມ ຂອງ ສປປ ລາວ ຂະຫຍາຍຕົວຢ່າງມີປະສິດທິພາບ ແລະ ມີປະສິດທິຜົນ ແລະ ເພື່ອເປັນບ່ອນອີງໃຫ້ແກ່ທຸກຂະແໜງການ ຈັດຕັ້ງຜັນຂະຫຍາຍ ໂດຍການນຳໃຊ້ເຕັກໂນໂລຊີດິຈິຕ໋ອນ ເປັນເຄື່ອງມືສຳຄັນໃນການຂັບເຄື່ອນທຸກຂະແໜງການ ເພື່ອສ້າງເສດຖະກິດດິຈິຕອນ.

ຈຸດປະສົງຂອງການຈັດງານຄັ້ງນີ້ແມ່ນເພື່ອຊຸກຍູ້ການຮ່ວມມືດ້ານການນຳໃຊ້, ຖ່າຍທອດເຕັກໂນໂລຊີ ນະວັດຕະກຳ ແລະ ຊອກຄູ່ຮ່ວມມື ລະຫວ່າງ ໜ່ວຍງານຄົ້ນຄວ້າວິໄຈ ແລະ ບັນດາວິສາຫະກິດຂອງສອງປະເທດ, ເພີ່ມທະວີການພົວພັນຮ່ວມມືຮອບດ້ານບົນພື້ນຖານນ້ຳໃຈມິດຕະພາບອັນຍິ່ງໃຫຍ່ ແລະ ຄວາມສາມັກຄີພິເສດ ທີ່ເປັນມູນເຊື້ອອັນຍາວນານ ລະຫວ່າງ ລາວ-ຫວຽດນາມ; ເພື່ອເຊື່ອມໂຍງບັນດານັກຄົ້ນຄວ້າວິໄຈ ແລະ ນັກພັດທະນາເຕັກໂນໂລຊີ ນະວັດຕະກຳ ຂອງຫວຽດນາມ ກັບບັນດາອົງການຂອງລັດ ແລະ ບັນດາຫົວໜ່ວຍທຸລະກິດລາວ ເພື່ອຊຸກຍູ້ສົ່ງເສີມດ້ານການຄ້າ ແລະ ການລົງທຶນດ້ານເຕັກໂນໂລຊີ ນະວັດຕະກຳ ໃນຂົງເຂດທີ່ສຳຄັນຂອງລາວ ແລະ ເພື່ອສົ່ງເສີມການຖ່າຍທອດເຕັກໂນໂລຊີ, ການນຳໃຊ້ນະວັດຕະກຳ ສ້າງ ແລະ ຊອກກາລະໂອກາດໃນການຮ່ວມມື, ການລົງທຶນ ແລະ ການຖ່າຍທອດເຕັກໂນໂລຊີ ລະຫວ່າງບັນດາອົງການຈັດຕັ້ງ, ບັນດາວິສະຫະກິດ ລາວ-ຫວຽດນາມ.

ໃນງານຄັ້ງນີ້ ໄດ້ເຊື້ອເຊີນບັນດາສະຖາບັນການຄົ້ນຄວ້າ, ສະຖາບັນການສຶກສາ, ພາກສ່ວນທຸລະກິດ ແລະ ຜູ້ປະກອບກິດຈະການທຸລະກິດ Startup ທີ່ມີຊື່ສຽງ ຈາກ 2 ປະເທດເຂົ້າຮ່ວມ, ຊຶ່ງໄດ້ຈັດໃຫ້ມີຫຼາຍກິດຈະກໍາຢ່າງເປັນຂະບວນຟົດຟື້ນ ໂດຍກວມເອົາເຕັກໂນໂລຊີການສື່ສານຂໍ້ມູນຂ່າວສານ, ເຕັກໂນໂລຊີດິຈິຕ໋ອນ, ພະລັງງານທົດແທນ, ການບຳບັດສິ່ງແວດລ້ອມ, ການເກັບຮັກສາອາຫານ-ເຕັກໂນໂລຊີປຸງແຕ່ງ, ຂົງເຂດການທ່ອງທ່ຽວ, ການຄ້າເອເລັກໂຕຣນິກ (E-commerce), ເຕັກໂນໂລຊີນະວັດຕະກຳໃໝ່, ຜົນງານການຄົ້ນຄ້ວາ ແລະ ຜະລິດຕະພັນຈາກຫົວຄິດປະດິດສ້າງ ຂອງທຸລະກິດ Startup ຈາກ ສປປ ລາວ ແລະ ສສ ຫວຽດນາມເຂົ້າຮ່ວມ 60 ກວ່າບູດວາງສະແດງ.

ໃນງານຄັ້ງນີ້ ຍັງຈະໄດ້ມີກອງປະຊຸມສຳມະນາ ເປີດກວ້າງການຮ່ວມມື ແລະ ກຳນົດແຜນພັດທະນາລະບົບນິເວດນະວັດຕະກຳ ແລະ ຜູ້ປະກອບການທຸລະກິດ Startup ແລະ ເວທີສົນທະນາ ການເຊື່ອມໂຍງດ້ານເຕັກໂນໂລຊີ ແລະ ຜູ້ປະກອບການທຸລະກິດ Startup. ຊຶ່ງງານດັ່ງກ່າວແມ່ນຈະໄດ້ຈັດຂຶ້ນເປັນເວລາສອງວັນໃນລະຫວ່າງວັນທີ 4-5 ເມສາ 2023 ນີ້.

ແຫຼ່ງ: ກະ​ຊວງ​ເຕັກ​ໂນ​ໂລ​ຊີ ແລະ ການ​ສື່​ສານ/05/04/2023