ຍົກລະດັບວຽກງານໂຄສະນາອົບຮົມໃຫ້ແກ່ 07 ແຂວງພາກເໜືອ ປະຈໍາປີ 2023

ຄະນະໂຄສະນາອົບຮົມສູນກາງພັກ ໄດ້ເປີດຝຶກອົບຮົມວຽກງານໂຄສະນາອົບຮົມໃຫ້ແກ່ 07 ແຂວງພາກເໜືອ ປະຈໍາປີ 2023 ຂຶ້ນໃນຕອນເຊົ້າຂອງວັນທີ 19 ມິຖຸນາ 2023 ຜ່ານມານີ້, ທີ່ສະໂມສອນໃຫຍ່ ແຂວງ ອຸດົມໄຊ, ໂດຍໃຫ້ກຽດເຂົ້າຮ່ວມເປັນຄະນະປະທານຂອງ ສະຫາຍ ບັນດິດ ສຈ. ບໍ່ວຽງຄໍາ ວົງດາລາ ກໍາມະການສູນກາງພັກ, ເລຂາຄະນະພັກ, ລັດຖະມົນຕີ ກະຊວງເຕັກໂນໂລຊີ ແລະ ການສື່ສານ, ສະຫາຍ ລາວປາວຊົ່ງ ນະວົງໄຊ ກໍາມະການສູນກາງພັກ, ຮອງຫົວໜ້າຄະນະໂຄສະນາອົບຮົມສູນກາງພັກ ແລະ ສະຫາຍ ຄໍາພຽງ ຢາຈົງວາ ຮອງເລຂາພັກແຂວງ ອຸດົມໄຊ, ມີຕາງໜ້າການນໍາຂັ້ນສູນກາງ, ການນໍາຂັ້ນແຂວງ, ຕາງໜ້າຄະນະໂຄສະນາອົບຮົມ 7 ແຂວງພາກເໜືອ ຄື: ແຂວງ ບໍ່ແກ້ວ, ຜົ້ງສາລີ, ຫຼວງນໍ້າທາ, ຫົວພັນ, ໄຊຍະບູລີ, ຫຼວງພະບາງ ແລະ ອຸດົມໄຊ ເຂົ້າຮ່ວມຈາໍນວນທັງໝົດ 100 ກວ່າສະຫາຍ.

ຈຸດປະສົງຂອງການຈັດຝຶກອົບຮົມໃນຄັ້ງນີ້ ແມ່ນເພື່ອປັບປຸງທັດສະນະ ແລະ ຍົກລະດັບຄວາມຮູ້-ເຂົ້າໃຈ ໃຫ້ແກ່ຜູ້ເຂົ້າຮ່ວມກໍາໄດ້ກ່ຽວກັບວຽກງານການເມືອງ-ແນວຄິດ, ວຽກງານໂຄສະນາອົບຮົມຂອງພັກໃນໄລຍະໃໝ່, ສິລະປະໃນການປາກເວົ້າ (ວາທະສິນ) ແລະ ການໂຄສະນາ-ປາຖະກະຖາ, ວຽກງານເລຂານຸການ-ການນໍາ, ວຽກງານໂຄສະນາ, ການຂຽນ ແລະ ບັນລະຍາຍເອກະສານອົບຮົມ, ວຽກງານຄົ້ນຄວ້າ-ສັງລວມ, ວຽກງານຫາງສຽງສັງຄົມ ແລະ ວິທີເກັບກໍາການນໍາໃຊ້ຫາງສຽງສັງຄົມເຂົ້າໃນວຽກງານໂຄສະນາອົບຮົມ, ການນໍາໃຊ້ເຕັກໂນໂລຊີເຂົ້າໃນການເຮັດວຽກງານໂຄສະນາອົບຮົມ ແນໃສ່ເຮັດໃຫ້ຜູ້ເຂົ້າຮ່ວມຝຶກອົບຮົມສາມານໍາໄປປັບປຸງ ແລະ ຍົກສູງຄຸນນະພາບຂອງວຽກງານໂຄສະນາອົບຮົມໃຫ້ດີຂຶ້ນກວ່າເກົ່າ ເພື່ອຕອບສະໜອງໜ້າທີ່ການເມືອງທີ່ນັບມື້ນັບສູງຂຶ້ນ.

ໃນວາລະຂອງການຝຶກອົບຮົມຄັ້ງນີ້, ບັນດາຜູ້ເຂົ້າຮ່ວມຈະໄດ້ເປັນກຽດຮັບຟັງການຂຶ້ນບັນລະຍາຍ ຂອງ ສະຫາຍ ສົມສະຫວາດ ເລັ່ງສະຫວັດ ອະດີດກໍາມະການກົມການເມືອງສູນກາງພັກ, ອະດີດຮອງນາຍົກລັດຖະມົນຕີ ຊຶ່ງນໍາສະເໜີໃນຫົວຂໍ້ “ສິລະປະການເວົ້າ (ວາທະສິນ) ແລະ ການໂຄສະນາ-ປາຖະກະຖາ”, ຮັບຟັງການນໍາສະເໜີໃນຫົວຂໍ້ “ການນໍາໃຊ້ເຕັກໂນໂລຊີທັນສະໄໝເຂົ້າໃນວຽກງານໂຄສະນາອົບຮົມສູນກາງພັກ” ຊຶ່ງນໍາສະເໜີໂດຍ ສະຫາຍ ບັນດິດ ສຈ. ບໍ່ວຽງຄໍາ ວົງດາລາ ກໍາມະການສູນກາງພັກ, ເລຂາຄະນະພັກ, ລັດຖະມົນຕີ ກະຊວງເຕັກໂນໂລຊີ ແລະ ການສື່ສານ ແລະ ຫົວຂໍ້ “ວຽກງານໂຄສະນາອົບຮົມຂອງພັກໃນໄລຍະໃໝ່” ນໍາສະເໜີໂດຍ ສະຫາຍ ລາວປາວຊົ່ງ ນະວົງໄຊ ຮອງຫົວໜ້າຄະນະໂຄສະນາອົບຮົມສູນກາງພັກ. ນອກນັ້ນ, ຍັງຈະໄດ້ຮັບຟັງບັນດາອາຈານຂຶ້ນບັນລະຍາຍ, ສົນທະນາແລກປ່ຽນຄໍາເຫັນ ລະຫວ່າງ ອາຈານກັບນັກຝຶກອົບຮົມ ແລະ ລະຫວ່າງ ນັກຝຶກອົບຮົມດ້ວຍກັນ, ເຮັດທົດລອງປາຖະກະຖາໃນຫົວຂໍ້ຈໍານວນໜຶ່ງ, ຝຶກຂຽນບົດຂ່າວສານ ແລະ ໄປທັດສະນະສຶກສາ. ຊຶ່ງການຝຶກອົບຮົມໃນຄັ້ງນີ້ ຈະໄດ້ດໍາເນີນໄປເປັນເວລາ 05 ວັນ ຈຶ່ງຈະສິ້ນສຸດ.

ຂຽນບົດຂ່າວ ແລະ ຖ່າຍພາບ:
ພຸດດາວອນ ພາສຸວັນ ແລະ ຈັນທະຈັກ ຫຼວງລາດ /19/06/2023