ລາວ -ຫວຽດນາມ ສືບຕໍ່ຮ່ວມມືກັນໃນຂງເຂດເຕັກໂນໂລຊີສື່ສານຂໍ້ມູນຂ່າວສານ

ອີງຕາມການເຊື້ອເຊີນ ຂອງ ທ່ານ ປອ ທັນສະໄໝ ກົມມະສິດ ລັດຖະມົນຕີ ກະຊວງ ໄປສະນີ ໂທລະຄົມມະນາຄົມ ແລະ ການສື່ສານ (ປທສ) ແຫ່ງ ສປປລາວ, ໃນວັນທີ 1 ພະຈິກ 2017 ທ່ານ ປອ ເຈື່ອງ ມິງ ຕວນ ລັດຖະມົນຕີ ກະຊວງ ຂໍ້ມູນຂ່າວສານ ແລະ ການສື່ສານ (MIC) ແຫ່ງ ສສ ຫວຽດນາມ ພ້ອມດ້ວຍຄະນະ ໄດ້ເດີນທາງມາຢ້ຽມຢາມ ສປປ ລາວ ຢ່າງເປັນທາງການ. ໃນການຢ້ຽມຢາມຄັ້ງນີ້, ໄດ້ມີການພົບປະສອງຝ່າຍຢ່າງເປັນທາງການ ລະຫວ່າງສອງກະຊວງ ແລະ ໄດ້ຮ່ວມລົງນາມ ໃນບົດບັນທຶກຄວາມເຂົ້າໃຈ ວ່າດ້ວຍການຮ່ວມມື ໃນຂົງເຂດໂທລະຄົມມະນາຄົມ ແລະ ເຕັກໂນໂລຊີການສື່ສານຂໍ້ມູນຂ່າວສານ (ICT) ເພື່ອເປັນບ່ອນອີງໃນການຮ່ວມມືໃນຕໍ່ໜ້າ. ໂດຍລັດຖະບານ ແຫ່ງ ສປປ ລາວ ກໍ່ຄື ລັດຖະບານ ແຫ່ງ ສາທາລະນະລັດ ສັງຄົມນິຍົມ ຫວຽດນາມ ໄດ້ເຫັນໄດ້ເຖິງຄວາມໝາຍ ຄວາມສຳຄັນ ຂອງບົດບາດວຽກງານ ໂທລະຄົມມະນາຄົມ ແລະ ICT ເພື່ອປະກອບສ່ວນ ເຂົ້າໃນການພັດທະນາ ເສດຖະກິດ-ສັງຄົມ ພາຍໃນປະເທດ ແລະ ໃນລະດັບສາກົນ.

ທ່ານ ທັນສະໄຫມ ກົມມະສິດ, ລັດຖະມົນຕີ ກະຊວງ ປທສ ໄດ້ຕີລາຄາສູງ ຕໍ່ການມາຢ້ຽມຢາມ ຂອງທ່ານ ປອ ເຈື່ອງ ມິງ ຕວນ. ເຊິ່ງໃນຊຸມປີທີ່ຜ່ານມາ ກະຊວງ ປທສ ກໍ່ໄດ້ໄປຢ້ຽມຢາມ ແລະ ແລກປ່ຽນບົດຮຽນ ນຳ ສສ ຫວຽດນາມ ຫຼາຍຄັ້ງ. ການຮ່ວມມື ລະຫວ່າງ ສອງກະຊວງ ແມ່ນມີຢ່າງຕໍ່ເນື່ອງ ແລະ ຫຼາຍລະດັບ ເປັນຕົ້ນ: ການຮ່ວມມື ລະຫວ່າງ ສູນອິນເຕີເນັດແຫ່ງຊາດ (LANIC) ແລະ ສູນເຄືອຂ່າຍຂໍ່້ມູນຂ່າວສານ (VNNIC) ສສ.ຫວຽດນາມ ໃນວຽກງານ ການຄຸ້ມຄອງລະຫັດຊື່ອິນເຕີເນັດສູງສຸດແຫ່ງຊາດ (ccTLD .LA), ການໃຫ້ທຶນການຊ່ວຍເຫລືອລ້າ (ODA) ໃນການຈັດຊື້ອຸປະກອນ ແລະ ພາຫະນະ ເຂົ້າສູນຄຸ້ມຄອງຄື້ນຄວາມຖີ່ແຫ່ງຊາດ, ການໃຫ້ທຶນການສຶກສາ ລະດັບ ປະລິນຍາຕີ ແລະ ປະລິນຍາໂທ ທີ່ ສະຖາບັນ ເຕັກໂນໂລຊີ ໄປສະນີ ແລະ ໂທລະຄົມມະນາຄົມ (PTIT) ທີ່ ສສ.ຫວຽດນາມ ນັບແຕ່ ປີ 2012 ເປັນຕົ້ນມາ. ນອກຈາກນັ້ນ ທັງສອງຝ່າຍຍັງໄດ້ເປັນປະທານຮ່ວມໃນກອງປະຊຸມການຮ່ວມມືສອງຝ່າຍຄັ້ງທຳອິດຂອງທັງສອງກະຊວງ ( 1^st Joint Implementation Plan) ທີ່ຈະໄດ້ຈັດຕັ້ງປະຕິບັດໃນປີ 2018. ເປັນຕົ້ນ ການຮ່ວມມືສ້າງລະບົບຕິດຕາມເຝົ້າລະວັງເຫດສຸກເສີນທາງຄອມພິວເຕີ (Threat Monitoring System) ລະຫວ່າງສູນ LAOCERT ແລະ ສູນ VNCERT, ການຝຶກອົບຮົມໄລຍະສັ້ນ ແລະ ໄລຍະຍາວ ດ້ານ ໂທລະຄົມມະນາຄົມ ແລະ ICT, ແລກປ່ຽນບົດຮຽນທາງດ້ານວິຊາການ, ດ້ານການຄຸ້ມຄອງ ແລະ ພັດທະນາ ວຽກງານ ICT. ທັງໝົດນີ້ ຈະກາຍເປັນ ບາດກ້າວໜຶ່ງ ທີ່ເປັນພື້ນຖານ ໃຫ້ແກ່ການຮ່ວມມືທາງດ້ານການຄຸ້ມຄອງ ວຽກງານ ໂທລະຄົມມະນາຄົມ ແລະ ICT ລະຫວ່າງ ສອງປະເທດ ເພື່ອຮອງຮັບໃຫ້ແກ່ການ ເຊື່ອມໂຍງກັບ ບັນດາປະເທດອາຊຽນ ທັງເປັນການຕອບສະໜອງ ໃຫ້ແກ່ການຈັດຕັ້ງ ປະຕິບັດ ແລະ ບັນລຸເຖິງເປົ້າໝາຍຍຸດທະສາດ ການພັດທະນາ ທາງດ້ານໂທລະຄົມມະນາຄົມ ແລະ ໄອຊີທີ ໃນຂົງເຂດອາຊຽນ.

ໃນການມາຢ້ຽມຢາມຄັ້ງນີ້, ທັງສອງຝ່າຍໄດ້ເຊັນບົດບັນທຶກຄວາມເຂົ້າໃຈ ລະຫວ່າງ ສະຖາບັນເຕັກໂນລໂຊີຂໍ້ມູນຂ່າວສານ ແຫ່ງ ສປປ ລາວ ແລະ ສະຖາບັນ ເຕັກໂນໂລຊີ ໄປສະນີ ແລະ ໂທລະຄົມມະນາຄົມ (PTIT),  ເພື່ອຮ່ວມມືສ້າງ ແລະ ພັດທະນາໂຄງລ່າງພື້ນດ້ານຫລັກສູດ ແລະ ບຸກຄະລາກອນຂອງສອງສະຖາບັນ. ພ້ອມນັ້ນ, ທ່ານ ປອ ເຈື່ອງ ມິງ ຕວນ ພ້ອມດ້ວຍຄະນະ ກໍ່ໄດ້ໄປຢ້ຽມຢາມ ສູນອິນເຕີເນັດແຫ່ງຊາດ (LANIC) ແລະ ສູນຄຸ້ມຄອງຄືນຄວາມຖີ່ ແຫ່ງຊາດ.

      ສຳລັບ ສປປ ລາວ ການພັດທະນາ ວຽກງານ ໂທລະຄົມມະນາຄົມ ແລະ ICT ຍັງປະເຊີນກັບ ສິ່ງທ້າທາຍ ຫຼາຍດ້ານ ແລະ ມີຄວາມຈຳເປັນ ຕ້ອງມີການ ແລກປ່ຽນບົດຮຽນ ແລະ ປະສົບການກັບ ບັນດາປະເທດ   ທັງພາກພື້ນ ແລະ ສາກົນ ເພື່ອນຳມາດັດປັບ ໝູນໃຊ້ເຂົ້າໃນການ ພັດທະນາວຽກງານ ໂທລະຄົມມະນາຄົມ ແລະ ICT ໃຫ້ມີປະສິດທິຜົນ ແນ່ໃສ່ປະກອບສ່ວນເຂົ້າໃນການພັດທະນາ ເສດຖະກິດ-ສັງຄົມ ຂອງ ສປປ ລາວ ຫຼາຍຂຶ້ນກວ່າເກົ່າ, ທັງສ້າງເງື່ອນໄຂ ໃຫ້ ສປປ ລາວ ສາມາດເຊື່ອມໂຍງ ກັບພາກພື້ນ ແລະ ສາກົນ.

       ຂ່າວ: ຄອນສະຫວັນ ແກ້ວໂສພາ./ກະ​ຊວງ​ເຕັກ​ໂນ​ໂລ​ຊີ ແລະ ການ​ສື​ສານ/09/11/2017