ລາວ-ຫວຽດນາມສຶບຕໍ່ຮ່ວມມືກັນໃນຂົງເຂດວຽກງານ ໄອຊີທີ.

  ອີງຕາມການເຊື້ອເຊີນ ຂອງ ທ່ານ ປອ ທັນສະໄໝ ກົມມະສິດ ລັດຖະມົນຕີ ກະຊວງ ໄປສະນີ ໂທລະຄົມມະນາຄົມ ແລະ ການສື່ສານ (ປທສ) ແຫ່ງ ສປປລາວ, ໃນວັນທີ 12 ມີນາ 2019 ທ່ານ ຫງຽນ ແມງ ຮຸ່ງ ລັດຖະມົນຕີ ກະຊວງ ຂໍ້ມູນຂ່າວສານ ແລະ ການສື່ສານ (MIC) ແຫ່ງ ສສ ຫວຽດນາມ ພ້ອມດ້ວຍຄະນະ ໄດ້ເດີນທາງມາຢ້ຽມຢາມ ສປປ ລາວ ຢ່າງເປັນທາງການ. ໃນການຢ້ຽມຢາມຄັ້ງນີ້, ໄດ້ມີການພົບປະສອງຝ່າຍຢ່າງເປັນທາງການ ລະຫວ່າງສອງກະຊວງ ໂດຍລັດຖະບານ ແຫ່ງ ສປປ ລາວ ກໍ່ຄື ລັດຖະບານ ແຫ່ງ ສາທາລະນະລັດ ສັງຄົມນິຍົມ ຫວຽດນາມ ໄດ້ເຫັນໄດ້ເຖິງຄວາມໝາຍ ຄວາມສຳຄັນ ຂອງບົດບາດວຽກງານ ໂທລະຄົມມະນາຄົມ ແລະ ICT ເພື່ອປະກອບສ່ວນ ເຂົ້າໃນການພັດທະນາ ເສດຖະກິດ-ສັງຄົມ ພາຍໃນປະເທດ ແລະ ໃນລະດັບສາກົນ.

     ທ່ານ ປອ ທັນສະໄຫມ ກົມມະສິດ, ລັດຖະມົນຕີ ກະຊວງ ປທສ ໄດ້ຕີລາຄາສູງ ຕໍ່ການມາຢ້ຽມຢາມ ຂອງ ທ່ານ ຫງຽນ ແມງ ຮຸ່ງ ເຊິ່ງໃນຊຸມປີທີ່ຜ່ານມາ ກະຊວງ ປທສ ກໍ່ໄດ້ໄປຢ້ຽມຢາມ ແລະ ແລກປ່ຽນບົດຮຽນ ນຳ ສສ ຫວຽດນາມ ຫຼາຍຄັ້ງ. ການຮ່ວມມື ລະຫວ່າງ ສອງກະຊວງ ແມ່ນມີຢ່າງຕໍ່ເນື່ອງ ແລະ ຫຼາຍລະດັບ ເປັນຕົ້ນ: ການຮ່ວມມື ລະຫວ່າງ ສູນອິນເຕີເນັດແຫ່ງຊາດ (LANIC) ແລະ ສູນເຄືອຂ່າຍຂໍ່້ມູນຂ່າວສານ (VNNIC) ສສ.ຫວຽດນາມ ໃນວຽກງານ ການຄຸ້ມຄອງອິນເຕີເນັດສູງສຸດແຫ່ງຊາດ ການໃຫ້ທຶນການສຶກສາ. ນອກຈາກການຮ່ວມມື ສອງຝ່າຍແລ້ວ ທັງສອງກະຊວງ ກໍ່ໄດ້ ມີການຮ່ວມມືໃນຂົງວຽກງານ ໂທລະຄົມມະນາຄົມ ແລະ ICT ລະດັບອາຊຽນ ໃນນາມ ຕົວແທນຜູ້ຮັບຜິດຊອບຢ່າງເປັນທາງການຂອງຂະແໜງການໃນອາຊຽນ.

     ໃນການມາຢ້ຽມຢາມຄັ້ງນີ້, ທັງສອງຝ່າຍໄດ້ເຊັນບົດບັນທຶກຄວາມເຂົ້າໃຈ ລະຫວ່າງ ສູນບໍລິຫານລັດດ້ວຍເອເລັກໂຕຣນິກ (E-government) ແລະ VNPT Group, ລະຫວ່າງ ສູນລາວເຊີດ ແລະ ອົງການຄຸ້ມຄອງ ຄວາມປອດໄພຂໍ້ມູນຂ່າວສານ ກະຊວງ MIC  ສສ ຫວຽດນາມ ແລະ ລະຫວ່າງ ໄປສະນີ ຂອງສອງປະເທດ, ພ້ອມນັ້ນ ຍັງຂໍແລກປ່ຽນບົດຮຽນ ແລະ ຂໍການສະໜັບສະໜູນ ໃນການກະກຽມທີ່ລາວຈະເປັນເຈົ້າພາບ TELMIN19 ໃນເດືອນ ຕຸລາ 2019 ແລະ ເພື່ອຍົກລະດັບພະນັກງານ, ຝຶກອົບຮົມໄລຍະສັ້ນ ແລະ ໄລຍະຍາວ ດ້ານ ໂທລະຄົມມະນາຄົມ ແລະ ICT ໂດຍສະເພາະດ້ານການຄຸ້ມຄອງ ແລະ ພັດທະນາ ວຽກງານ ICT.

ສຳລັບ ສປປ ລາວ ການພັດທະນາ ວຽກງານ ໂທລະຄົມມະນາຄົມ ແລະ ICT ຍັງປະເຊີນກັບ ສິ່ງທ້າທາຍ ຫຼາຍດ້ານ ແລະ ມີຄວາມຈຳເປັນ ຕ້ອງມີການ ແລກປ່ຽນບົດຮຽນ ແລະ ປະສົບການກັບ ບັນດາປະເທດ   ທັງພາກພື້ນ ແລະ ສາກົນ ເພື່ອນຳມາດັດປັບ ໝູນໃຊ້ເຂົ້າໃນການ ພັດທະນາວຽກງານ ໂທລະຄົມມະນາຄົມ ແລະ ICT ໃຫ້ມີປະສິດທິຜົນ ແນ່ໃສ່ປະກອບສ່ວນເຂົ້າໃນການພັດທະນາ ເສດຖະກິດ-ສັງຄົມ ຂອງ ສປປ ລາວ ຫຼາຍຂຶ້ນກວ່າເກົ່າ, ທັງສ້າງເງື່ອນໄຂ ໃຫ້ ສປປ ລາວ ສາມາດເຊື່ອມໂຍງກັບພາກພື້ນ ແລະ ສາກົນ

     ໃນໂອກາດທີ່ທ່ານ ລັດຖະມົນກະຊວງຖະແຫລງຂ່າວ ແລະ ການສ່ືສານ ຂອງ ສສ ຫວຽດນາມ ມາຢ້ຽມຢາມລາວໃນຄັ້ງນີ້ ທ່ານ ລັດຖະມົນຕີ ແລະ ຄະນະ ຍັງໄດ້ເຂົ້າຢ້ຽມຂຳນັບ ທ່ານ ສົມດີ ດວງດີ ຮອງນາຍົກລັດຖະມົນຕີ ແຫ່ງ ສປປ ລາວ

ແຫຼ່ງ: ກະ​ຊວງ​ເຕັກ​ໂນ​ໂລ​ຊີ ແລະ ການ​ສື່​ສານ/13/03/2019