ໄອທີລາວ
ຮອງລັດຖະມົນຕີກະຊວງ ປທສ ເຂົ້າຮ່ວມກອງປະຊຸມ ລັດຖະມົນຕີດິຈິຕອນ
Jun
ໃນວັນທີ 15 ມີນາ 2019 ຜ່ານມານີ້, ທ່ານ ບຸນສະເຫຼີມໄຊ ເຄນນາວົງ, ຮອງລັດຖະມົນຕີ ກະຊວງ ໄປສະນີ, ໂທລະຄົມມະນາ ຄົມ ແລະ ການສື່ສານ (ປທສ) ພ້ອມດ້ວຍຄະນະ ໄດ້ເດີນທາງເຂົ້າຮ່ວມກອງປະຊຸມ ລັດຖະມົນຕີດິຈິຕອນ, ພາຍໄຕ້ຄໍາຂັວນ “ASEAN Roadmap toward Industry 4.0”, ທີ່ນະຄອນພະນົມເປັນ, ປະເທດກຳປູເຈຍ ມີບັນດາຄະນະຜູ້ແທນ ຈາກບັນດາປະເທດສະມາຊິກອາຊຽນເຂົ້າຮ່ວມຢ່າງພ້ອມພຽງ.
ການຈັດກອງປະຊຸມໃນຄັ້ງນີ້, ເພື່ອປຶກສາຫາລື ແລະ ແລກປ່ຽນທັດສະນະ ຕໍ່ກັບການກະກຽມຫັນສູ່ອຸດສາຫະກຳ 4.0, ຊື່ງໃນປັດຈຸບັນ ແຕ່ລະປະເທດໃນທົ່ວໂລກ ກໍ່ຄືບັນດາພາກພື້ນ ກໍ່ກໍາລັງກະກຽມທີ່ຈະຫັນໄປສູ່ເສດຖະກິດ ແລະ ສັງຄົມດິຈິຕອນ ໄປຄຽງຄູ່ກັບການ ປ່ຽນແປງຂອງອຸດສາຫະກໍາ 4.0 ໂດຍສະເພາະ ການນໍາໃຊ້ ເຕັກໂນໂລຊີການສື່ສານ ແລະ ອິນເຕີເນັດເຂົ້າໃນຂະບວນການຜະລິດ, ການບໍລິການ ລວມໄປເຖິງການ ນຳສະເຫນີຮູບແບບທຸລະກິດໃຫມ່, ເຮັດໃຫ້ເກີດຄວາມຍືດຫຍຸນໃນການຜະລິດ, ສ້າງມູນຄ່າເພິ່ມຕໍ່ອຸດສະຫະກໍາ ແລະ ເຮັດໃຫ້ຜົນຜະລິດທີ່ມີຄຸນນະພາບສູງ. ດັ່ງນັ້ນ, ການຫັນປ່ຽນ ສູ່ຍຸກດິຈິຕອນ 4.0 ແລະ ວິທີການ ໃນການຫັນປ່ຽນຂອງແຕ່ລະປະເທດຈຶ່ງມີຄວາມແຕກຕ່າງກັນ, ເນື່ອງຈາກຄວາມແຕກຕ່າງຂອງການເຕີບໂຕດ້ານເສດຖະກິດ, ສະພາບແວດລ້ອມ ແລະ ເງື່ອນໄຂຕ່າງໆ. ທ່າມກາງຄວາມແຕກຕ່າງເຫຼົ່ານີ້, ກອງປະຊຸມດັ່ງກ່າວ ຈະເປັນເວທີທີດີ ແລະ ເປັນໂອກາດ ໃນການແລກປ່ຽນປະສົບການ, ການຮ່ວມມືກັນລະຫວ່າງອາຊຽນ ເພື່ອແລກປ່ຽນ ບົດຮຽນ, ສີ່ງທ້າທາຍ ແລະ ວິທີທາງໃນການກ້າວສູ່ຍຸກ 4.0.
ໃນໂອກາດນີ້, ທ່ານຮອງລັດຖະມົນຕີ ກະຊວງ ປທສ ໄດ້ໃຫ້ກຽດເປັນນັກວິທະຍາກອນ (Panelist) ໃນກອງປະຊຸມ ແລະ ໄດ້ລາຍງານຕໍ່ກອງປະຊຸມວ່າ ກະຊວງ ປທສ ກໍ່ຄື ສປປ ລາວເຫັນໄດ້ເຖິງປັດໃຈທີ່ສໍາຄັນ ໃນການຫັນເປັນຍຸກ 4.0 ເປັນຕົ້ນ ການກໍານົດຍຸດສາດທີ່ຊັດເຈນ (ມີຈຸດປະສົງ ແລະ ແຜນການໃນການພັດທະນາ), ການຕອບສະໜອງຄວາມຕ້ອງການຂອງສັງຄົມ (ການບໍລິການ), ຮັບປະກັນຄວາມພ້ອມດ້ານຊັບພະຍາກອນມະນຸດ (ການສ້າງທັກສະ ແລະ ຂີດຄວາມສາມາດ) ແລະ ສຸມໃສ່ການຮ່ວມມືແບບລວງຂວາງ (ການເຂົ້າເຖິງການບໍລິການຕ່າງໆຢ່າງທົ່ວເຖິງທຸກຂະແໜງການ. ຊຶ່ງປັດຈຸບັນ ກະຊວງ ປທສ ໃນນາມຜູ້ຄຸ້ມຄອງມະຫາພາກ ກໍ່ໄດ້ລີເລີ່ມໃນການຫັນປ່ຽນ ແລະ ຮ່າງແຜນໃນການຫັນເປັນທັນສະໄໝ (Digital Transformation Master Plan) ໂດຍສະເພາະ, ການກໍານົດຫົວຂໍ້, ບູລິມະສິດ ແລະ ອົງປະກອບຕ່າງໆ ເພື່ອກຽມໃນການຫັນເປັນຍຸກດັ່ງກ່າວ.
ໂດຍ ກົມແຜນການ ແລະ ການຮ່ວມມຶ./ກະຊວງເຕັກໂນໂລຊີ ແລະ ການສື່ສານ/19/03/2019