ກອງປະຊຸມລັດຖະມົນຕີອາຊຽນ ດ້ານຄວາມປອດໄພທາງໄຊເບີ

 ໃນວັນທີ 2 ຕຸລາ 2019, ທ່ານ ບຸນສະເຫຼີມໄຊ ເຄນນາວົງ, ຮອງລັດຖະມົນຕີ ກະຊວງ ໄປສະນີ, ໂທລະຄົມມະນາຄົມ ແລະ ການສື່ສານ (ປທສ) ໄດ້ນໍາພາຄະນະທີ່ຕາງໜ້າຈາກ ສູນອິນເຕີເນັດ ແຫ່ງຊາດ ແລະ ສູນສະກັດກັ້ນ ແລະ ແກ້ໄຂເຫດສຸກເສີນທາງຄອມພິວເຕີ ເຂົ້າຮ່ວມກອງປະຊຸມລັດຖະມົນຕີອາຊຽນ ດ້ານຄວາມປອດໄພທາງໄຊເບີ 2019 (4^th ASEAN Ministerial Conference on Cyber security), ຊຶ່ງຈັດຂຶ້ນຢູ່ ປະເທດ ສິງກະໂປ ພາຍໃຕ້ການເປັນປະທານຂອງ ທ່ານ  S. Iswaran, ລັດຖະມົນຕີວ່າການກະຊວງການສື່ສານ ແລະ ຂໍ້ມູນຂ່າວສານ, ແລະ ລັດຖະ ມົນຕີຮັບຜິດຊອບ ຄວາມປອດໄພທາງໄຊເບີຂອງສິງກະໂປ, ໂດຍມີລັດຖະມົນຕີ ແລະ ຄະນະວິຊາການ ດ້ານຄວາມປອດໄພທາງໄຊເບີ ທີ່ກ່ຽວຂ້ອງ ຂອງບັນດາປະເທດສະມາຊິກອາຊຽນເຂົ້າຮ່ວມ.

      ຈຸດປະສົງຂອງກອງປະຊຸມດັ່ງກ່າວ ແມ່ນເພື່ອເສີມສ້າງການຮ່ວມມືໃນກອບຂອງອາຊຽນ ດ້ານວຽກງານການປ້ອງກັນຄວາມປອດໄພທາງໄຊເບີ ຊຶ່ງໄດ້ມີການປຶກສາຫາລືກ່ຽວກັບສິ່ງທີ່ສາມາດຈັດຕັ້ງປະຕິບັດຮ່ວມກັນໄດ້ ເພື່ອກ້າວໄປເຖິງການສ້າງຂີດຄວາມສາມາດ ແລະ ສ້າງຄວາມເຂັ້ມແຂງດ້ານການປ້ອງກັນໄພທາງໄຊເບີໃນເຂດພາກພື້ນ ແລະ ໃນອາຊຽນ. ກອງປະຊຸມໃນຄັ້ງນີ້ ຍັງໄດ້ປຶກສາຫາລືວຽກງານທີ່ສໍາຄັນເຊັ່ນ: ຄວາມພະຍາຍາມໃນການປະສານງານດ້ານຄວາມປອດໄພທາງໄຊເບີໃນອາຊຽນ, ການຈັດຕັ້ງປະຕິບັນດາມາດຖານພຶດຕິກຳຂອງລັດແບບສະໝັກໃຈ ແລະ ບໍ່ມີຂໍ້ຜູກມັດ (implementation of norms in cyberpace), ການສ້າງຂີດຄວາມສາມາດການວາງຍຸດທະສາດ ແລະ ແຜນນະໂຍບາຍປ້ອງກັນໄພທາງໄຊເບີ ເພື່ອໃຫ້ສາມາດເຊື່ອມໂຍງ ແລະ ຮັບມືກັບໄພຄຸກຄາມຕ່າງໆ ທີ່ອາດຈະເກີດຂຶ້ນໃນຕໍ່ໜ້າ ໂດຍສະເພາະແມ່ນແນ່ໃສ່ປົກປ້ອງພື້ນຖານໂຄງລ່າງຂໍ້ມູນຂ່າວສານ ດ້ານ ICT ໃຫ້ມີຄວາມປອດໄພ.

     ລັດຖະບານ ສປປ ລາວ ແມ່ນມີເຈດຈໍານົງທີ່ຈະພັດທະນາປະເທດ ແລະ ປັບປຸງມາດຕະຖານການນໍາໃຊ້ຂໍ້ມູນຂ່າວສານໃຫ້ມີຄວາມມປອດໄພ ແລະ ເກີດປະໂຫຍດສູງສຸດ ໃນການສ້າງມາດຖານ ການເຊື່ອມໂຍງຂໍ້ມູນຂ່າວສານ ລວມໄປເຖີງການສ້າງນະໂຍບາຍດ້ານຄວາມປອດໄພ ເພື່ອສ້າງຂີດຄວາມສາມາດບຸກຄະລາກອນໃນການຮັບມືກັບໄພຄຸກຄາມທາງໄຊເບີ. ໃນກອງປະຊຸມໃນຄັ້ງນີ້ ຍັງໄດ້ຮັບຟັງການນໍາສະເໜີຈາກຄູ່ຮ່ວມມືຂອງອາຊຽນ ເປັນຕົ້ນແມ່ນ: ການສ້າງນະໂຍບາຍ, ກົດໝາຍສາກົນ, ແຜນຍຸດທະສາດ, ການສ້າງກົນໄກການຮັບມືກັບໄພຄຸກຄາມທາງໄຊເບີ, ການສ້າງບຸກຄະລາກອນ, ການຮ່ວມມືສາກົນ ໂດຍສະເພາະແມ່ນລະຫວ່າງປະເທດທີ່ພັດທະນາແລ້ວ ແລະ ປະເທດທີ່ກໍາລັງພັດທະນາເພື່ອສ້າງຂີດຄວາມສາມາດໃນການຄຸ້ມຄອງ ແລະ ການປ້ອງກັນຄວາມປອດໄພທາງໄຊເບີ ໃນລະດັບມາດຕະຖານສາກົນ, ນອກຈາກນີ້ ກອງປະຊຸມຍັງໄດ້ຮັບຟັງການລາຍງານຄວາມຄືບໜ້າໃນການສ້າງສູນຝຶກອົບຮົມຄວາມປອດໄພດ້ານໄຊເບີອາຊຽນ-ຍີ່ປຸ່ນ (AJCCBC) ທີ່ຕິດພັນກັບຜົນການຝຶກອົບຮົມ ແລະ ແຜນການໃນຕໍ່ໜ້າ; ການສຶກສາຄວາມເປັນໄປໄດ້ໃນການສ້າງສູນ ASEAN-CERT; ແລະ ກອງປະຊຸມຍັງໄດ້ຮັບຮອງເອົາການຈະສ້າງຕັ້ງຄະນະກໍາມະການປະສານງານດ້ານຄວາມປອດໄພໄຊເບີຂອງອາຊຽນ ໂດຍຈະໃຫ້ມີຕົວແທນຈາກໜວ່ຍງານທີ່ກ່ຽວຂອ້ງເຂົ້າຮວ່ມ ຊຶ່ງການຮັບຮອງເອົາການຈັດຕັ້ງດັ່ງກ່າວທີ່ປະຊຸມເຫັນດີຈະນໍາສະເໜີຕໍ່ກອງປະຊຸມລັດຖະມົນຕີໂທລະຄົມມະນາຄົມອາຊຽນເພື່ອພິຈາລະນາໃນຄັ້ງຕໍ່ໄປ.

          ສຳລັບ ສປປ ລາວ ໂດຍສະເພາະ ກະຊວງ ໄປສະນີ ໂທລະຄົມມະນາຄົມ ແລະ ການສື່ສານ, ໄດ້ມອບໜາຍໃຫ້ ສູນລາວເຊີດ ດຳເນີນການຄົ້ນຄ້ວາຮ່າງນະໂຍບາຍດ້ານຄວາມປອດໄພທາງ ໄຊເບີ, ຊຶ່ງຈະລົງເລິກ ທາງດ້ານການສົ່ງເສີມການສ້າງບຸກຄະລາກອນ, ການສ້າງຂີດຄວາມສາມາດຂອງອົງກອນ ແລະ ບັນດາຂະແໜງການຕ່າງໆ ທາງ ພາກລັດ ແລະ ເອກະຊົນ ມີຄວາມຮັບຮູ້ ແລະ ເຫັນເຖິງຄວາມສຳຄັນຕໍ່ວຽກງານປ້ອງກັນພື້ນຖານໂຄງລ່າງຂໍ້ມູນຂ່າວສານທີ່ສຳຄັນ (CIIP) ຂອງປະເທດ ເພື່ອບັນລຸເປົ້າ   ໝາຍການພັດທະນາເສດຖະກິດສັງຄົມຂອງຊາດໃຫ້ມີຄວາມເຂັ້ມແຂງ. ປະຕິບັດໄດ້ແຜນການຮັບປະກັນຄວາມປອດໄພເຄືອຂ່າຍຄອມພີວເຕີ ແລະ ການປົກປອ້ງຂໍ້ມູນຂ່າວສານໃຫ້ມີຄວາມປອດໄພຕາມແຜນແມ່ບົດ ການພັດທະນາວຽກງານດ້ານ ໄອຊີທີ ຂອງອາຊຽນແຕ່ນີ້ຮອດປີ 2020.

ແຫຼ່ງ: ກະ​ຊວງ ເຕັກ​ໂນ​ໂລ​ຊີ ແລະ ການ​ສື່​ສານ/04/10/2019