ໂຄສະນາ-ປາຖະກະຖາ ວັນສ້າງຕັ້ງກອມມູນິດຈີນ ຄົບຮອບ 100 ປີ

ໃນຕອນເຊົ້າຂອງວັນທີ 28 ກໍລະກົດ 2021 ນີ້, ທີ່ກະຊວງເຕັກໂນໂລຊີ ແລະ ການສື່ສານ (ກຕສ) ໄດ້ຈັດກອງປະຊຸມໂຄສະນາ-ປາຖະກະຖາ ວັນສ້າງຕັ້ງກອມມູນິດຈີນ ຄົບຮອບ 100 ປີ ( 01/07/1921-01/07/2021 ) ຂຶ້ນ. ໃຫ້ກຽດໂຄສະນາ-ປາຖະກະຖາເລົ່າມູນເຊື້ອໂດຍ ສະຫາຍ ທອງສະຫວັນ ພົມວິຫານ, ກໍາມະການສູນກາງພັກ, ເລຂາຄະນະພັກ, ຫົວໜ້າຄະນະພົວພັນຕ່າງປະເທດສູນກາງພັກ, ໂດຍການເຂົ້າຮ່ວມຂອງ ສະຫາຍ ບຸນສະເຫຼີມໄຊ ເຄນນາວົງ ຄະນະປະຈຳພັກ, ຮອງລັດຖະມົນຕີກະຊວງ ຕສ ແລະ ທ່ານ ປອ ສັນຕິສຸກ ສິມມາລາວົງ ຮອງລັດຖະມົນຕີກະຊວງ ຕສ ພ້ອມດ້ວຍບັນດາສະຫາຍຄະນະພັກກະຊວງ, ຄະນະພັກຮາກຖານ, ຄະນະໜ່ວຍພັກ, ສະມາຊິກພັກ ແລະ ພະນັກງານຫຼັກແຫຼ່ງ ອ້ອມຂ້າງກະຊວງ ເຂົ້າຮ່ວມ.

ສະຫາຍ ທອງສະຫວັນ ພົມວິຫານ ໄດ້ຍົກໃຫ້ເຫັນເຖີງມູນເຊື້ອ ແລະ ວິລະກໍາອັນສະຫງ່າອົງອາດ ຂອງພັກກອມມູນິດຈີນ ໃນການຊີ້ນໍາ-ນໍາພາປະຊາຊົນຈີນບູລະນະສ້າງສາລະບອບສັງຄົມນິຍົມທີ່ມີສີສັນອັນພິເສດຂອງຈີນ, ຍຶດໝັ້ນອຸດົມການສັງຄົມນິຍົມ, ຖືຜົນປະໂຫຍດຂອງປະຊາຊົນເປັນໃຈກາງ, ມີແນວຄິດປະດິດສ້າງໃໝ່ທາງດ້ານທິດສະດີ ແລະ ພຶດຕິກໍາຕົວຈິງ ທີ່ສອດຄ່ອງກັບຍຸກສະໄໝ ອັນເປັນການໄຂສັງກາດໃໝ່ ແຫ່ງການພັດທະນາຂອງ ສປ ຈີນ ຕາມເສັ້ນທາງສັງຄົມນິຍົມ ທີ່ສາມາດສໍາເລັດພາລະກິດອັນຍິ່ງໃຫຍ່ຂອງພັກ, ຂອງຊາດ ແລະ ສາມາດປະກາດຄວາມເປັນເອກະລາດ ແລະ  ສະຖາປະນາເປັນປະເທດສາທາລະນະລັດປະຊາຊົນຈີນ ໃນວັນທີ 01 ຕຸລາ 1949 ໄດ້ຢ່າງສະຫງ່າຜ່າເຜີຍ ພາຍໃຕ້ການຊີ້ນໍານໍາພາ ຂອງພັກກອມມູນິດຈີນ. ໃນຕະຫຼອດໄລຍະ 100 ປີທີ່ຜ່ານມາພັກກອມມູນິດຈີນ ໄດ້ຍົກສູງຄວາມຮັບຜິດຊອບທາງດ້ານການເມືອງຕໍ່ພາລະກິດປະຫວັດສາດຂອງຈີນ, ດໍາເນີນການປະຕິຮູບ ແລະ ເປີດປະຕູສູ່ພາຍນອກ. ປະຈຸບັນນີ້ ຍ້ອນມີການຊີ້ນໍາ-ນໍາພາອັນເຂັ້ມແຂງ ຂອງສູນກາງພັກກອມມູນິດຈີນ ທີ່ມີສະຫາຍເລຂາທິການໃຫຍ່ ສີຈິ້ນຜິງ ເປັນແກນນໍາໃນການສ້າງສາພັດທະນາປະເທດຊາດຂອງຈີນ ແລະ ໄດ້ສືບຕໍ່ມີຜົນສໍາເລັດໃຫຍ່ຫຼວງ, ຮອບດ້ານ ເປັນຕົ້ນເຊັ່ນ: ສໍາເລັດເປົ້າໝາຍສູ້ຊົນ 100 ປີທໍາອິດ ໃນການສ້າງໃຫ້ປະຊາຊົນທີ່ອີ່ມໜໍາສໍາລານ ແລະ ສັງຄົມມີຄວາມກ້າວໜ້າຢ່າງຮອບດ້ານ. ຊຶ່ງບັນດາໄຊຊະນະອັນໃຫຍ່ຫຼວງ ແລະ ຜົນສໍາເລັດອັນມະຫັດສະຈັນ ທີ່ປະຊາຊົນຈີນອ້າຍນ້ອງ ສາມາດຍາດມາໄດ້ຮອດປັດຈຸບັນນີ້ ແລະ ເພື່ອເປັນການພິສູດໃຫ້ເຫັນຢ່າງເດັ່ນຊັດເຖິງຄວາມປີຊາສາມາດ, ສະຫຼາດສ່ອງໃສ, ເດັດດ່ຽວໜຽວແໜ້ນ, ສະແດງໃຫ້ເຫັນເຖິງພະລັງແຮງແຫ່ງມະຫາສາມັກຄີຂອງປວງຊົນຊາວຈີນ ໃນການສ້າງ ສປ ຈີນ ເປັນປະເທດສັງຄົມນິຍົມທີ່ທັນສະໄໝຮອບດ້ານ ແລະ ບັນລຸຄວາມມຸ່ງໝັ້ນໃນການຟື້ນຟູຄວາມຮຸ່ງເຮືອງຂອງຊາດຈີນ .

ແຫຼ່ງ:ກະ​ຊວງ​ເຕັກ​ໂນ​ໂລ​ຊີ ແລະ ການ​ສື​່​ສານ/29/07/2021