ສປປ ລາວ ແລະ ຣາຊະອານາຈັກໄທ ເຫັນດີຮ່ວມມືດ້ານວຽກງານເສດຖະກິດດິຈິຕ໋ອນ

ໃນລະຫວ່າງວັນທີ 01-02 ມິຖຸນາ 2022 ຄະນະຜູ້ແທນຂັ້ນສູງ ຂອງ ສປປ ລາວ ຊຶ່ງນໍາໂດຍ ພະນະທ່ານ ພັນຄໍາ ວິພາວັນ, ນາຍົກລັດຖະມົນຕີ ແຫ່ງ ສປປ ລາວ ເນື່ອງໃນໂອກາດເດີນທາງຢ້ຽມຢາມ ຣາຊະອານາຈັກໄທ ຢ່າງເປັນທາງການ ໂດຍຕອບສະໜອງຕາມຄໍາເຊີນຂອງ ທ່ານ ພົນເອກ ປຣະຢຸດ ຈັນໂອຊາ, ນາຍົກລັດຖະມົນຕີ ແຫ່ງຣາຊະອານາຈັນໄທ, ເພື່ອຮັດແໜ້ນສາຍພົວພັນມິດຕະພາບ ແລະ ການຮ່ວມມື ຖານບ້ານໃກ້ເຮືອນຄຽງທີ່ດີ ທີ່ມີມາແຕ່ດົນນານ ລະຫວ່າງສອງປະເທດ ລາວ-ໄທ. ຄະນະຜູ້ແທນ ກະຊວງເຕັກໂນໂລຊີ ແລະ ການສື່ສານ (ກຕສ), ຊຶ່ງນຳໂດຍ ທ່ານ ບັນດິດ ສຈ. ບໍ່ວຽງຄຳ ວົງດາລາ, ລັດຖະມົນຕີ ກະຊວງເຕັກໂນໂລຊີ ແລະ ການສື່ສານ ກໍໄດ້ເປັນກຽດຮ່ວມຕິດຕາມຄະນະຜູ້ແທນຂັ້ນສູງຂອງ ສປປ ລາວ ດັ່ງກ່າວ.

        ພະນະທ່ານ ຄໍາພັນ ວິພາວັນ, ນາຍົກລັດຖະມົນຕີ ແຫ່ງ ສປປ ລາວ ໄດ້ຮັບກຽດຕ້ອນຮັບຢ່າງອົບອຸ່ນ ຈາກ ທ່ານ ພົນເອກ ປຣະຢຸດ ຈັນໂອຊາ, ນາຍົກລັດຖະມົນຕີ ແຫ່ງຣາຊະອານາຈັກໄທ ພ້ອມດ້ວຍພັນລະຍາ ແລະ ຄະນະ. ໃນກອງປະຊຸມພົບປະຢ່າງເປັນທາງການ ສອງຝ່າຍໄດ້ປຶກສາຫາລືແລກປ່ຽນຄໍາເຫັນ ແລະ ໄດ້ເຫັນດີເປັນເອກະພາບໃນຫຼາຍດ້ານທີ່ສໍາຄັນ. ໃນນັ້ນ ວຽກງານທີ່ຕິດພັນກັບ ກະຊວງເຕັກໂນໂລຊີ ແລະ ການສື່ສານ ແມ່ນ ຝ່າຍຣາຊະອານາຈັກໄທ ເຫັນດີໃນການຮັດແໜ້ນການຮ່ວມມືດ້ານເສດຖະກິດດິຈິຕ໋ອນ ຊຶ່ງເຫັນວ່າມີຄວາມສໍາຄັນສໍາລັບການພັດທະນາເສດຖະກິດຍຸກໃໝ່ ແລະ ພ້ອມສະໜັບສະໜູນ ຝ່າຍລາວ ໃນການພັດທະນາທັກສະ ແລະ ຂີດຄວາມສາມາດຂອງບຸກຄະລາກອນໃນດ້ານດິຈິຕ໋ອນ. ນອກຈາກນີ້, ທ່ານ ລັດຖະມົນຕີ ກະຊວງເຕັກໂນໂລຊີ ແລະ ການສື່ສານ ພ້ອມດ້ວຍຄະນະ ກໍໄດ້ເຂົ້າຮ່ວມພິທີເປີດກອງປະຊຸມພົບປະນັກທຸລະກິດລາວ-ໄທ (Business Talk and Networking) ຊຶ່ງກອງປະຊຸມໄດ້ປຶກສາຫາລື ແລະ ແລກປ່ຽນຄຳຄິດເຫັນ, ວາງທິດທາງແຜນການໃນຕໍ່ໜ້າ ເພື່ອສະໜັບສະໜູນ ແລະ ຊຸກຍູ້ດ້ານການຄ້າ, ການລົງທຶນ, ຊຸກຍູ້ບັນດານັກທຸລະກິດ, ນັກລົງທຶນ ແລະ ນັກທ່ອງທ່ຽວ ໃຫ້ມີການໄປມາຫາສູ່ ແລະ ພົວພັນຮ່ວມມືກັນຫຼາຍຂຶ້ນ ເພື່ອນຳເອົາຜົນປະໂຫຍດອັນແທ້ຈິງມາສູ່ປະຊາຊົນສອງຊາດ ລາວ ແລະ ໄທ.

          ໂອກາດດຽວກັນ, ຄະນະຜູ້ແທນ ກະຊວງເຕັກໂນໂລຊີ ແລະ ການສື່ສານ ແຫ່ງ ສປປ ລາວ ແລະ ກະຊວງ
ດິຈິຕ໋ອນ ເພື່ອເສດຖະກິດ ແລະ ສັງຄົມ ແຫ່ງ ຣາຊະອານາຈັກໄທ ຍັງໄດ້ຮ່ວມປະຊຸມປຶກສາຫາລືແນວທາງການຮ່ວມມືເພື່ອນໍາໄປສູ່ການລົງນາມບົດບັນທຶກຄວາມເຂົ້າໃຈສະບັບໃໝ່ ລະຫວ່າງ ສອງກະຊວງ ເພື່ອຜັນຂະຫຍາຍເນື້ອໃນກອງປະຊຸມພົບປະລະຫວ່າງສອງລັດຖະບານ ລາວ ແລະ ໄທ ໃຫ້ປະກົດຜົນເປັນຈິງ. ຊຶ່ງຕາງໜ້າ ກະຊວງເຕັກໂນໂລຊີ ແລະ ການສື່ສານ ໂດຍ ທ່ານ ພູຂົງ ຈິດຮູບໂລກ, ຫົວໜ້າ ຫ້ອງການ ກະຊວງເຕັກໂນໂລຊີ ແລະ ການສື່ສານ ແລະ ຕາງໜ້າ  ກະຊວງດິຈິຕ໋ອນ ເພື່ອເສດຖະກິດ ແລະ ສັງຄົມ ໂດຍ ທ່ານ ນາງ ປາລິນ ຫົງບຸດ, ຜູ້ອໍານວຍການຫ້ອງການຮ່ວມມືສອງຝ່າຍ.

ແຫຼ່ງ: ກະ​ຊວງ​ເຕັກ​ໂນ​ໂລ​ຊີ ແລະ ການ​ສື່​ສານ/09/06/2022