ກອງປະຊຸມເວທີ ການຖ່າຍທອດເຕັກໂນໂລຊີ ແລະ ການຮ່ວມມື ດ້ານນະວັດຕະກໍາອາຊຽນ-ຈີນ ຄັ້ງທີ 10

ໃນວັນທີ 15 ກັນຍາ 2022 ຜ່ານມານີ້, ກະຊວງເຕັກໂນໂລຊີ ແລະ ການສື່ສານ (ກຕສ) ໄດ້ເຂົ້າຮ່ວມພິທີເປີດ ແລະ ກ່າວຄຳປາໃສ ຕໍ່ກອງປະຊຸມເວທີ ການຖ່າຍທອດເຕັກໂນໂລຊີ ແລະ ການຮ່ວມມື ດ້ານນະວັດຕະກໍາອາຊຽນ-ຈີນ ຄັ້ງທີ 10 ໃນປີ 2022 ພາຍໃຕ້ຫົວຂໍ້: “ການຮ່ວມມື ວ່າດ້ວຍວິທະຍາສາດ ແລະ ເຕັກໂນໂລຊີ ຮ່ວມກັນ ເພື່ອຄວາມສົມບູນພູນສຸກ” ໂດຍສຸມໃສ່ “ເຕັກໂນໂລຊີດິຈິຕ໋ອນ + ສຸຂະພາບ” ດ້ວຍຮູບແບບການບັນທຶກວິດີໂອສັ້ນສາຍໃນຮູບແບບອອນລາຍ ຊຶ່ງພິທີດັ່ງກ່າວແມ່ນຈັດຂຶ້ນທີ່ແຂວງ ກວງຊີ, ສປ ຈີນ. ເປັນກຽດກ່າວຄຳປາໃສໃນຄັ້ງນີ້ໂດຍທ່ານ ປອ. ສັນຕິສຸກ ສິມມາລາວົງ, ຮອງລັດຖະມົນຕີ ກຕສ, ມີລັດຖະມົນຕີ ກະຊວງວິທະຍາສາດ ແລະ ເຕັກໂນໂລຊີ ຂອງບັນດາປະເທດສະມາຊິກອາຊຽນເຂົ້າຮ່ວມ.

          ໃນພິທີດັ່ງກ່າວ ທ່ານ ປອ. ສັນຕິສຸກ ສິມມາລາວົງ ໄດ້ສະແດງຄວາມຍິນດີ ແລະ ຊົມເຊີຍຕໍ່ ທ່ານ ປອ. Wang Zhigang, ລັດຖະມົນຕີກະຊວງວິທະຍາສາດ ແລະ ເຕັກໂນໂລຊີ ແຫ່ງ ສປ ຈີນ. ພ້ອມທັງຕາງໜ້າໃຫ້ແກ່ ສປປ ລາວ, ເວົ້າສະເພາະ ກໍຄືກະຊວງເຕັກໂນໂລຊີ ແລະ ການສື່ສານ ກ່າວສະແດງຄວາມຂໍສະແດງຄວາມຂອບໃຈຢ່າງຈິງໃຈ ມາຍັງ ສປ ຈີນ ທີ່ໄດ້ຊ່ວຍເຫຼືອ ສປປ ລາວ ເພື່ອຮັບມືກັບການແຜ່ລະບາດຂອງໂຄວິດ-19 ດ້ວຍການສະໜອງວັກຊີນ ແລະ ການຖ່າຍທອດເຕັກໂນໂລຊີທາງການແພດ. ພ້ອມນັ້ນ, ທ່ານຍັງໄດ້ກ່າວສະແດງຄວາມຊົມເຊີຍການເປີດໂຄງການລົດໄຟລາວ-ຈີນ  ຊຶ່ງເປັນສັນຍາລັກຂອງການຮ່ວມມືດ້ານເຕັກໂນໂລຊີທີ່ຍິ່ງໃຫຍ່ ລະຫວ່າງ ລາວ ແລະ ຈີນ.

          ສຳລັບການຮ່ວມມືດ້ານເຕັກໂນໂລຊີ ແລະ ນະວັດຕະກຳ ແມ່ນການປ່ຽນແປງວິຖີຊີວິດຂອງປະຊາຊົນໃນຫຼາຍມິຕິ ແລະ ກາຍເປັນຍຸດທະສາດອັນສໍາຄັນສໍາລັບການພັດທະນາເສດຖະກິດ-ສັງຄົມ. ໃນນີ້, ສປປ ລາວ ໄດ້ສືບຕໍ່ຮັດແໜ້ນການຮ່ວມມືກັບ ສປ ຈີນ ເພື່ອຊຸກຍູ້ການຟື້ນຟູທາງດ້ານເສດຖະກິດ ດ້ວຍການນໍາເອົາຈຸດດີທາງດ້ານວິທະຍາສາດ, ເຕັກໂນໂລຊີ ແລະ ນະວັດຕະກໍາ ເພື່ອແກ້ໄຂສິ່ງທ້າທາຍ ແລະ ການຈັດຕັ້ງປະຕິບັດການ ເປັນຄູ່ຮ່ວມມືຍຸດທະສາດຮອບດ້ານອາຊຽນ-ຈີນ ຢ່າງມີປະສິດທິພາບ. ພ້ອມທັງ ມີຄວາມເຊື່ອໝັ້ນວ່າ ການຖ່າຍທອດເຕັກໂນໂລຊີຈະປະກອບສ່ວນເຂົ້າໃນການພົວພັນອັນດີລະຫວ່າງ ອາຊຽນ ແລະ ຈີນ, ເຊັ່ນດຽວກັບການຮ່ວມມືສອງຝ່າຍ ລາວ ແລະ ຈີນ. ດັ່ງທີ່ພວກເຮົາຮ່ວມກັນຄຸ້ມຄອງ ການຖ່າຍທອດເຕັກໂນໂລຊີ ໃນໂລກດິຈິຕ໋ອນ ແລະ ອິນເຕີເນັດ. ຊຶ່ງເຫັນຄວາມສໍາຄັນຂອງການພັດທະນາເຕັກໂນໂລຊີດິຈິຕ໋ອນ ສໍາລັບການຫັນເປັນດິຈິຕ໋ອນ ລັດຖະບານ ແຫ່ງ ສປປ ລາວ ກໍໄດ້ປະກາດວິໄສທັດ ການພັດທະນາເສດຖະກິດດິຈິຕ໋ອນ ແຫ່ງຊາດ ໄລຍະ 20 ປີ  (2021-2040), ຍຸດທະສາດການພັດທະນາເສດຖະກິດດິຈິຕ໋ອນ ແຫ່ງຊາດ ໄລຍະ 10 ປີ (2021-2030) ແລະ ແຜນພັດທະນາເສດຖະກິດດິຈິຕ໋ອນ ແຫ່ງຊາດ 5 ປີ (2021-2025) ເພື່ອໃຫ້ສອດຄ່ອງກັບເເຜນແມ່ບົດ ດິຈິຕ໋ອນ ອາຊຽນ 2025 ແລະ ພາຍໃຕ້ກະຊວງເຕັກໂນໂລຊີ ແລະ ການສື່ສານ ໄດ້ສ້າງຕັ້ງສູນສົ່ງເສີມ ແລະ ຖ່າຍທອດເຕັກໂນໂລຊີ (TPTC) ຈະສືບຕໍ່ຮ່ວມມືກັບຝ່າຍຈີນ ເພື່ອສ້າງຕັ້ງສູນຖ່າຍທອດເຕັກໂນໂລຊີ ລາວ-ຈີນ ຄືນໃໝ່.

          ພ້ອມດຽວກັນນີ້, ກະຊວງເຕັກໂນໂລຊີ ແລະ ການສື່ສານ ໃນນາມຕາງໜ້າ ໃຫ້ແກ່ ສປປ ລາວ ຍັງໄດ້ເຊີນບັນດາປະເທດສະມາຊິກອາຊຽນ, ສປ ຈີນ ແລະ ປະເທດຄູ່ຮ່ວມມືເພື່ອເຂົ້າຮ່ວມງານ “ສັບປະດາແຫ່ງດິຈິຕ໋ອນ” ພາຍໃຕ້ຫົວຂໍ້: “ການຮ່ວມມື ໃນທົ່ວການຫັນປ່ຽນເປັນດິຈິຕ໋ອນຂອງລາວ” ຊຶ່ງເປັນງານແຫ່ງຊາດທີ່ຈະຈັດຂຶ້ນໃນເດືອນ ທັນວາ ປີ 2022. ຈຸດປະສົງເພື່ອ ສົ່ງເສີມຂອບວຽກນະວັດຕະກໍາ, ການຖ່າຍທອດເຕັກໂນໂລຊີ, ພື້ນຖານໂຄງລ່າງ ICT ແລະ ການຫັນປ່ຽນເປັນດິຈິຕ໋ອນ ເຂົ້າໃນການພັດທະນາເສດຖະກິດ-ສັງຄົມ. ຈະເປັນເວທີ ແລະ ໂອກາດທີ່ອາຊຽນ ແລະ ສປ ຈີນ ຈະປະກອບສ່ວນສໍາລັບການຄົ້ນຄວ້າ ຮ່ວມມືເພື່ອການລົງທຶນໃນການຖ່າຍທອດເຕັກໂນໂລຊີ ໃນທົ່ວພາກລັດ, ເອກະຊົນ, ນັກວິຊາການ, ຜູ້ປະກອບການທຸລະກິດ ທັງພາຍໃນ ແລະ ສາກົນ. 

          ຂ່າວໂດຍ: ສູນສົ່ງເສີມ ແລະ ຖ່າຍທອດເຕັກໂນໂລຊີ/ກະ​ຊວງ​ເຕັກ​ໂນ​ໂລ​ຊີ ແລະ ການ​ສື່​ສານ