ພິທີເຊັນບົດບັນທຶກຄວາມເຂົ້າໃຈ ເພື່ອສຶກສາຄວາມເປັນໄປໄດ້ກ່ຽວກັບລະບົບຄຸ້ມຄອງໂທລະສັບມືຖື ໃນເຄືອຂ່າຍ ໂທລະຄົມມະນາຄົມ ຂອງ ສປປ ລາວ

ກະຊວງເຕັກໂນໂລຊີ ແລະ ການສື່ສານ (ກຕສ) ແລະ ບໍລິສັດ ອິນໂມບາຍ (InMobile)  ໄດ້ຮ່ວມລົງນາມບົດບັນທຶກຄວາມເຂົ້າໃຈ ເພື່ອສຶກສາຄວາມເປັນໄປໄດ້ກ່ຽວກັບ ການຄຸ້ມຄອງໂທລະສັບມືຖື ເຄືອຂ່າຍໂທລະຄົມມະນາຄົມ ຂອງ ສປປ ລາວ ຂຶ້ນໃນຕອນແລງຂອງວັນທີ 15 ກຸມພາ 2023 ນີ້, ທີ່ໂຮງແຮມດອນຈັນພາເລດ, ນະຄອນຫຼວງວຽງຈັນ.

ໃນພິທີດັ່ງກ່າວ, ທ່ານ ໄຊລືຊາ ອິນສີຊຽງໃໝ່ ຫົວໜ້າກົມຄື້ນຄວາມຖີ່ວິທະຍຸສື່ສານ ໄດ້ກ່າວວ່າ: ບໍລິສັດ ອິນໂມບາຍ (InMobile) ເປັນບໍລິສັດຈາກປະເທດ ເລບານອນ (Lebanon) ຊຶ່ງເປັນບໍລິສັດທີ່ມີຄວາມຮູ້, ຄວາມຊຳນານ ແລະ ປະສົບການກ່ຽວກັບການຄຸ້ມຄອງໂທລະສັບເຄື່ອນທີ່ ແລະ ປັດຈຸບັນກໍໄດ້ໃຫ້ບໍລິການໃນຫຼາຍປະເທດ. ບໍລິສັດ Inmobiles ໄດ້ສະເໜີໂຄງການຄຸ້ມຄອງໂທລະສັບມືຖື ໃນເຄືອຂ່າຍໂທລະຄົມມະນາຄົມໃນປະເທດລາວ ຊຶ່ງເປັນການຄວບຄຸມໂທລະສັບມືຖືເຂົ້າກັບເຄືອຂ່າຍ 2G, 3G, 4G ແລະ 5G ຂອງ ບັນດາຜູ້ໃຫ້ບໍລິການດ້ານໂທລະຄົມມະນາຄົມ  ຜ່ານລະບົບ Mobile Identity Registration System (MIRS) ໂດຍການຄຸ້ມຄອງເລກລະຫັດປະຈຳເຄື່ອງຂອງໂທລະສັບມືຖື International Mobile Equipment Identity (IMEI). ຊຶ່ງຈຸດປະສົງຂອງໂຄງການຄຸ້ມຄອງໂທລະສັບມືຖືໃນເຄືອຂ່າຍ ໂທລະຄົມມະນາຄົມ ຂອງ ສປປ ລາວ ມີຄື:​ (1) ໂທລະສັບມືຖືຕ້ອງໄດ້ຜ່ານການກວດກາ ແລະ ຢັ້ງຢືນມາດຕະຖານເຕັກນິກແລ້ວ; (2) ອຸປະກອນດັ່ງກ່າວໄດ້ ຜ່ານຂະບວນການນຳເຂົ້າ ແລະ ເສຍພາສີຢ່າງຖືກຕ້ອງຕາມກົດໝາຍ; (3) ປ້ອງກັນອຸປະກອນທີ່ນຳໃຊ້ບໍ່ຖືກຕ້ອງຕາມລະບຽບການ (ເຊັ່ນ: Sim boxes) ແລະ ອຸປະກອນທີ່ຖືກລັກມານໍາໃຊ້ ແລະ (4) ລັດຖະບານຈະມີລາຍຮັບເພີ່ມຂຶ້ນຈາກການເສຍພາສີຢ່າງຄົບຖ້ວນຕາມການນຳເຂົ້າອຸປະກອນຕົວຈິງ.

ການເຊັນບົດບັນທຶກຄວາມເຂົ້າໃຈເພື່ອສຶກສາຄວາມເປັນໄປໄດ້ (Feasibility study) ກ່ຽວກັບ ໂຄງການດັ່ງກ່າວນີ້ ຈະເປັນບາດກ້າວອັນສຳຄັນໃນການຄຸ້ມຄອງອຸປະກອນໂທລະສັບມືຖື ແລະ ເປັນອີກວຽກງານໜຶ່ງ ເພື່ອສົ່ງເສີມການຫັນເປັນເສດຖະກິດດິຈິຕອນ ຕາມແຜນພັດທະນາເສດຖະກິດດິຈິຕອນ ແຫ່ງຊາດ ໄລຍະ 05 ປີ (2021-2025), ແຜນພັດທະນາເຕັກໂນໂລຊີ ແລະ ການສື່ສານ 5 ປີ ຄັ້ງທີ 3 (2021 – 2025) ຂອງກະຊວງເຕັກໂນໂລຊີ ແລະ ການສື່ສານ ໃຫ້ບັນລຸຕາມຄາດໝາຍທີ່ວາງໄວ້. ຊຶ່ງລົງນາມໃນບົດບັນທຶກຄວາມເຂົ້າໃຈໃນຄັ້ງນີ້ ຕາງໜ້າຝ່າຍ ກຕສ ລົງນາມໂດຍ ທ່ານ ໄຊລືຊາ ອິນສີຊຽງໃໝ່ ຫົວໜ້າກົມຄື້ນຄວາມຖີ່ວິທະຍຸສື່ສານ, ທ່ານ ພວງປະເສີດ ແກ້ວສຸວັນ ຮອງຫົວໜ້າອົງການດັດສົມໂທລະຄົມມະນາຄົມ, ທ່ານ ພອນສະຫວັດ ຄົງສະຫວັດ ຮອງຫົວໜ້າສູນອິນເຕີເນັດແຫ່ງຊາດ ແລະ ຕາງໜ້າຈາກຝ່າຍ ບໍລິສັດ InMobile ລົງນາມໂດຍ ທ່ານ ຈິດຕິພົງ ບັນຈົງພານິດ, ທ່ານ ກວາງ ຮວາ ຕູ້, ທ່ານ ອານຸສັກ ທຳມະວົງ. ໂດຍໃຫ້ກຽດເຂົ້າຮ່ວມເປັນສັກຂີພິຍານຂອງ ທ່ານ ບັນດິດ ສຈ. ບໍ່ວຽງຄໍາ ວົງດາລາ ກຳມະການສູນກາງພັກ, ເລຂາຄະນະພັກກະຊວງ, ລັດຖະມົນຕີ ກຕສ, ມີບັນດາຮອງລັດຖະມົນຕີ, ບັນດາຄະນະກົມ/ທຽບເທົ່າ,  ພະນັກງານອ້ອມຂ້າງ ກຕສ ແລະ ຕາງໜ້າຈາກບໍລິສັດ InMobile.

ແຫຼ່ງ: ກະ​ຊວງ​ເຕັກ​ໂນ​ໂລ​ຊີ ແລະ ການ​ສື່​ສານ/17/02/2023