ສະຫຼຸບວຽກງານ ປະຈໍາປີ 2022 ແລະ ວາງທິດທາງແຜນການ ປະຈໍາປີ 2023 ຂອງຄະນະກໍາມະການຄຸ້ມຄອງອິນເຕີເນັດ ແຫ່ງຊາດ

ໃນຕອນເຊົ້າຂອງວັນທີ 22 ມີນາ 2023 ທີ່ຫ້ອງປະຊຸມໃຫຍ່ຊັ້ນ 01 ກະຊວງປ້ອງກັບຄວາມສະຫງົບ, ຄະນະກໍາມະການຄຸ້ມຄອງອິນເຕີເນັດ ແຫ່ງຊາດ (ຄຄອຊ) ໄດ້ຈັດກອງປະຊຸມສະຫຼຸບວຽກງານ ປະຈໍາປີ 2022 ແລະ ວາງທິດທາງແຜນການ ປະຈໍາປີ 2023 ຂຶ້ນ ພາຍໃຕ້ການເປັນປະທານຂອງ ທ່ານ ພົອ. ວິໄລ ຫຼ້າຄໍາຟອງ, ກໍາມະການກົມການເມືອງສູນກາງພັກ, ຮອງນາຍົກລັດຖະມົນຕີ, ລັດຖະມົນຕີ ກະຊວງປ້ອງກັນຄວາມສະຫງົບ, ປະທານຄະນະກໍາມະການຄຸ້ມຄອງອິນເຕີເນັດ ແຫ່ງຊາດ, ມີທ່ານ ບັນດິດ ສຈ. ບໍ່ວຽງຄຳ ວົງດາລາ, ລັດຖະມົນຕີ ກະຊວງເຕັກໂນໂລຊີ ແລະ ການສື່ສານ, ຮອງປະທານ-ຜູ້ປະຈໍາການ, ພ້ອມດ້ວຍບັນດາທ່ານຮອງລັດຖະມົນຕີ, ຫົວຫນ້າກົມ, ອົງການ ແລະ ທຽບ/ເທົ່າ ຈາກບັນດາກະຊວງທີ່ກ່ຽວຂ້ອງພາຍໃນຄະນະ ຄຄອຊ ພ້ອມດ້ວຍການເຂົ້າຮ່ວມຜ່ານລະບົບກອງປະຊຸມທາງໄກຂອງບັນດາທ່ານຮອງເຈົ້າແຂວງ, ຫົວຫນ້າ-ຮອງຫົວຫນ້າ ຫ້ອງວ່າການປົກຄອງແຂວງ, ຄະນະກໍາມະການຄຸ້ມຄອງອິນເຕີເນັດ ຂັ້ນແຂວງ ໃນທົ່ວປະເທດ.

        ໃນກອງປະຊຸມ ທ່ານ ມີນາໄຊ ພິລາວົງ, ຫົວໜ້າສູນອິນເຕີເນັດແຫ່ງຊາດ, ກະຊວງເຕັກໂນໂລຊີ ແລະ ການສື່ສານ, ທັງເປັນຫົວໜ້າກອງເລຂາ ຄຄອຊ ໄດ້ຜ່ານຂໍ້ຕົກລົງວ່າດ້ວຍການແຕ່ງຕັ້ງຄະນະກໍາມະການຄຸ້ມຄອງອິນເຕີເນັດ ແຫ່ງຊາດ ສະບັບເລກທີ 19/ນຍ ລົງວັນທີ 30 ມັງກອນ 2023, ພ້ອມທັງລາຍງານກ່ຽວກັບການຈັດຕັ້ງວຽກງານ ຄຄອຊ ໃນໄລຍະປີ 2022 ທີ່ຜ່ານມາ ແລະ ທິດທາງແຜນການໃນປີ 2023, ຊຶ່ງທ່ານໄດ້ຍົກໃຫ້ເຫັນການເອົາໃຈໃສ່ຈັດຕັ້ງປະຕິບັດວຽກງານຕາມພາລະບົດບາດ, ສິດ ແລະ ໜ້າທີ່ ແນໃສ່ຈັດຕັ້ງຜັນຂະຫຍາຍແນວທາງນະໂຍບາຍຂອງພັກ ແລະ ລັດຖະບານ ໃນການຄຸ້ມຄອງ ແລະ ຊຸກຍູ້ສົ່ງເສີມກ່ຽວກັບວຽກງານອິນເຕີເນັດ, ເຕັກໂນໂລຊີການສື່ສານຂໍ້ມູນຂ່າວສານ, ຄວາມປອດໄພທາງໄຊເບີ, ການຫັນເປັນດິຈິຕອນ, ການສ້າງລັດຖະບານດິຈິຕອນ, ການພັດທະນາເສດຖະກິດດິຈິຕອນ ແລະ ອຸດສາຫະກໍາ 4.0 ແລະ ທີ່ສໍາຄັນແມ່ນຊີ້ນໍາທຸກຂະແໜງການທີ່ກ່ຽວຂ້ອງໃນ ຄຄອຊ ຜັນຂະຫຍາຍວຽກງານໃຫ້ຕິດພັນກັບ 2 ວາລະແຫ່ງຊາດ ຄືການແກ້ໄຂບັນຫາຢາເສບຕິດ ແລະ ການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ.

ພ້ອມນັ້ນ, ບັນດາທ່ານໃນ ຄຄອຊ ຍັງໄດ້ມີການປະກອບຄໍາເຫັນຢ່າງກົງໄປກົງມາ ເພື່ອຮ່ວມກັນຕີລາຄາ ແລະ ຖອດຖອນບົດຮຽນ ຈາກການຈັດຕັ້ງປະຕິບັດວຽກງານໃນໄລຍະຜ່ານມາ ແລະ ຮ່ວມກັນວາງທິດທາງແຜນການໃນຕໍ່ຫນ້າ ເພື່ອເຮັດໃຫ້ວຽກງານການຄຸ້ມຄອງອິນເຕີເນັດພາຍໃນປະເທດ ມີປະສິດທິພາບ ແລະ ປະສິດທິຜົນດີຂຶ້ນກວ່າເກົ່າ.

         ໃນຕອນທ້າຍ, ທ່ານ ພົອ. ວິໄລ ຫຼ້າຄໍາຟອງ ຍັງໄດ້ມີຄໍາເຫັນຊີ້ນໍາຕໍ່ກັບທິດທາງແຜນການ ແລະ ຂໍ້ສະເໜີຕ່າງໆ ໃນການຈັດຕັ້ງປະຕິບັດບັນດາວຽກງານໃນຕໍ່ໜ້າ ໂດຍໄດ້ຕີລາຄາສູງຕໍ່ການຄົ້ນຄວ້າ, ການກໍານົດບັນດາເປົ້າໝາຍທີ່ມີຄວາມສໍາຄັນ ແລະ ຈໍາເປັນ ທີ່ຈະຕ້ອງຄຸ້ມຄອງ ແລະ ພັດທະນາ ຊຶງແມ່ນວຽກງານຂອງທຸກພາກສ່ວນທີ່ຈະຕ້ອງໄດ້ສົມທົບກັນຢ່າງແໜ້ນແຟ້ນ ແລະ ກົມກຽວ ເພື່ອເຮັດໃຫ້ອິນເຕີເນັດ ແລະ ເຕັກໂນໂລຊີ ດິຈິຕອນ ສາມາດປະກອບສ່ວນໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ທັງຕິດພັນກັບ 2 ວາລະ ແຫ່ງຊາດ ຄືການແກ້ໄຂບັນຫາຢາເສບຕິດ ແລະ ການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ. ຊຶ່ງທ່ານໄດ້ເນັ້ນໜັກໃຫ້ສືບຕໍ່ຈັດຕັ້ງປະຕິບັດຕາມແຜນທີ່ໄດ້ກໍານົດໄວ້ ເປັນຕົ້ນແມ່ນ ສືບຕໍ່ດ້ານການເມືອງແນວຄິດຢ່າງໜັກແໜ້ນ, ການປັບປຸງການຈັດຕັ້ງ, ການແບ່ງຄວາມຮັບຜິດຊອບ, ການປັບປຸງຂັ້ນຕອນ ແລະ ຂອດການປະສານງານຂອງບັນດາກະຊວງ, ອົງການພັກ, ທັງຢູ່ສູນກາງ ແລະ ຢູ່ທ້ອງຖິ່ນ, ຊຸກຍູ້ໃຫ້ມີການສ້າງ ແລະ ປັບປຸງຄະນະກໍາມະການຄຸ້ມຄອງອິນເຕີເນັດ ຂັ້ນແຂວງ ແລະ ເລັ່ງຝຶກອົບຮົມສ້າງຄວາມເຂັ້ມແຂວງໃນທົ່ວປະເທດ, ດ້ານວຽກງານສ້າງ ແລະ ປັບປຸງນິຕິກໍາ, ວຽກງານການພັດທະນາ ແລະ ປັບປຸງໂຄງລ່າງພື້ນຖານໂທລະຄົມມະນາຄົມ ແລະ ອິນເຕີເນັດ ໃຫ້ຄອບຄຸມທົ່ວປະເທດ, ຍົກລະດັບຄຸນນະພາບ ແລະ ການບໍລິການດ້ານໂທລະຄົມມະນາຄົມ, ອິນເຕີເນັດ ແລະ ເຕັກນິກໂນໂລຊີດິຈິຕອນ, ວຽກງານຂຶ້ນທະບຽນເລກໝາຍໂທລະສັບ, ການຂຶ້ນທະບຽນການນໍາເຂົ້າໂທລະສັບ ແລະ ເຄື່ອງມືການສື່ສານ, ເອົາໃຈໃສ່ວຽກງານການຄຸ້ມຄອງ, ຕິດຕາມ ແລະ ກວດກາປະກົດການ ຫຍໍ້ທໍ້, ຫາງສຽງ, ຂາວປອມ, ການຕົວະຍົວະຫຼອກລວງ ຜ່ານສື່ສັງຄົມອອນລາຍ, ວຽກງານຄວາມປອດໄພໄຊເບີ ເພື່ອ ຕິດຕາມກວດກາ ແລະ ປ້ອງການ ການໂຈມຕີຕໍ່ບັນດາໂຄງລ່າງພື້ນຖານຂໍ້ມູນຂ່າວສານທີ່ສໍາຄັນ, ວຽກງານປ້ອງກັນ ແລະ ແກ້ໄຂ ອາຊະຍາກໍາ ໂດຍນໍາໃຊ້ລະບົບໂທລະຄົມມະນາຄົມ, ອິນເຕີເນັດ ແລະ ເຕັກໂນໂລຊີດິຈິຕອນ. ພ້ອມນັ້ນ, ເອົາໃຈໃສ່ໃນການເຜີຍແຜ່ ແລະ ການປູກຈິດສໍານຶກໃຫ້ສັງຄົມ ກ່ຽວກັບການນໍາໃຊ້ອິນເຕີເນັດ ແລະ ສື່ສັງຄົມອອນລາຍ ໃຫ້ປອດໄພ ແລະ ເກີດຜົນປະໂຫຍດ ແລະ ກະກຽມຄວາມພ້ອມຮັບມືກັບບັນດາເຕັກໂນໂລຊີດິຈິຕອນໃໝ່ໆ ທີ່ຈະເກີດຂຶ້ນ ເປັນຕົ້ນ ປັນຍາປະດິດ (AI), ອິນເຕີເນັດຜ່ານດາວທຽມ, ການຫັນເປັນດິຈິຕອນ ເພື່ອສ້າງໃຫ້ ສປປ ລາວ ໃຫ້ກາຍເປັນ ລັດຖະບານດິຈິຕອນ, ເສດຖະກິດດິຈິຕອນ ແລະ ສັງຄົມດິຈິຕອນ ແລະ ພ້ອມດຽວກັນ ກໍຈະຕ້ອງເອົາໃຈໃສ່ການຮ່ວມມືແລກປ່ຽນບົດຮຽນກັບ ປະເທດຄູ່ຮ່ວມມືຍຸດທະສາດ, ບັນດາປະເທດໃນພາກພື້ນ ແລະ ອົງການສາກົນຕ່າງໆ ໃນ ວຽກງານການພັດທະນາ ແລະ ການຄຸ້ມຄອງ ອິນເຕີເນັດ.

ຂ່າວ: ສູນອິນເຕີເນັດ ແຫ່ງຊາດ