ກອງປະຊຸມສໍາມະນາ ການສ້າງຄວາມອາດສາມາດໃນການບໍລິຫານລັດດິຈິຕອນ (Workshop on Whole-of-Government Approach and GovStack)

ໃນລະຫວ່າງວັນທີ 17–18 ພຶດສະພາ 2023 ຜ່ານມາ, ສູນບໍລິຫານລັດດິຈິຕອນ, ກະຊວງເຕັກໂນໂລຊີ  ແລະ ການສື່ສານ (ກຕສ) ຮ່ວມກັບ ສະຫະພາບໂທລະຄົມມະນາຄົມສາກົນ (ITU) ໄດ້ຈັດກອງປະຊຸມສໍາມະນາການສ້າງຄວາມອາດສາມາດໃນການບໍລິຫານລັດດິຈິຕອນ (Workshop on Whole-of-Government Approach and GovStack) ຂຶ້ນທີ່ ໂຮງແຮມ ຄຣາວພລາຊາ, ນະຄອນຫຼວງວຽງຈັນ. ໂດຍການເປັນປະທານຂອງ ທ່ານ ແກ້ວວິສຸກ ໂສລະພົມ ຮອງລັດຖະມົນຕີ, ກະຊວງເຕັກໂນໂລຊີ ແລະ ການສື່ສານ, ຊຶ່ງມີ ທ່ານ ແມັດທິວ ເດວິດ ຈອນສັນ-ໄອແດນ ນັກເສດຖະສາດອາວຸໂສ,  ຜູ້ປະສານງານ ອົງການສະຫະປະຊາຊາດ ປະຈໍາ ສປປ ລາວ (UNRCO), ທ່ານ ອາຊິດ ນາຣາຢານ ຜູ້ປະສານງານໂຄງການ ຈາກສະຫະພາບໂທລະຄົມມະນາຄົມສາກົນ (ITU), ທ່ານ ນິວ ຣອຍ ໂຊດູຣີ ພະນັກງານລັດດິຈິຕອນ ຈາກສະຫະພາບໂທລະຄົມມະນາຄົມສາກົນ, ພ້ອມນັ້ນ ກໍມີຜູ້ເຂົ້າຮ່ວມຈາກ 16 ກະຊວງ, 15 ກົມ ພາຍໃນກະຊວງເຕັກໂນໂລຊີ ແລະ ການສື່ສານ, ຄະນະຮັບຜິດຊອບຈາກສູນບໍລິຫານລັດດິຈິຕອນ, ຊ່ຽວຊານຈາກ ITU, ຈາກອົງການສະຫະປະຊາຊາດເພື່ອການພັດທະນາ (UNDP), ຈາກອົງການສະຫະປະຊາຊາດເພື່ອການບໍລິການໂຄງການ (UNOPS)  ເຂົ້າຮ່ວມລວມທັງໝົດ ຈໍານວນ 50 ກວ່າທ່ານ.

ກອງປະຊຸມຄັ້ງນີ້ ເປັນໜຶ່ງໃນແຜນກິດຈະກໍາການຮ່ວມມື ລະຫວ່າງ ກະຊວງເຕັກໂນໂລຊີ ແລະ ການສື່ສານ ກັບ ສະຫະພາບໂທລະຄົມມະນາຄົມສາກົນ (ITU) ຊຶ່ງມີຈຸດປະສົງຂອງກອງປະຊຸມໃນຄັ້ງນີ້ ແມ່ນເພື່ອ ເສີມສ້າງຄວາມອາດສາມາດດ້ານວິຊາການໃນການອອກແບບ ການພັດທະນາການບໍລິການພາກລັດ, ການພັດທະນາຊອບແວຣ໌ຕ່າງໆ, ການເພີ່ມປະສິດທິພາບໃນວຽກງານການບໍລິຫານລັດດິຈິຕອນ ເພື່ອຫຼຸດຜ່ອນຄວາມຊໍ້າຊ້ອນຂອງລະບົບ (ການລົງທຶນ ແລະ ຊັບພະຍາກອນ), ປັງປຸງຄວາມຖືກຕ້ອງ, ຄວາມປອດໄພ ແລະ ສຶກສາວິທີການຈາກຫຼາຍຕົວຢ່າງຂອງສາກົນໃນວຽກງານພັດທະນາລັດດິຈິຕອນ.

ໃນໂອກາດກ່າວເປີດກອງປະຊຸມສໍາມະນາ, ທ່ານ ແກ້ວວິສຸກ ໂສລະພົມ ຮອງລັດຖະມົນຕີ ກະຊວງເຕັກໂນໂລຊີ ແລະ ການສື່ສານ ໄດ້ຍົກໃຫ້ເຫັນຄວາມໝາຍ ແລະ ຄວາມສຳຄັນ ຂອງການຫັນເປັນທັນສະໄໝ ລວມເຖິງ 3 ເສົາຄໍ້າຂອງການຫັນເປັນດິຈິຕອນຂອງລັດຖະບານ, ເສດຖະກິດ ແລະ ສັງຄົມ ໂດຍໃຫ້ເບິ່ງພາບລວມ ຂອງການພັດທະນາລັດຖະບານ ການມີສ່ວນຮ່ວມ ແລະ ການເຮັດວຽກຮ່ວມກັນຂອງບັນດາຂະແໜງການ. ທ່ານຍັງ ໄດ້ກ່າວໃຫ້ເຫັນພາບລວມຂອງວຽກງານການພັດທະນາດິຈິຕອນ ສປປ ລາວ ລວມທັງ ຍຸດທະສາດ, ນະໂຍບາຍ, ຄວາມຈໍາເປັນໃນການສ້າງແຜນແມ່ບົດ ແລະ ກໍານົດ ສະຖາປັດຕະຍະກຳ (Enterprise Architecture) ແລະ ກໍານນົດບັນດາການບໍລິການບູລິມະສິດຂອງ ສປປ ລາວ.

ກອງປະຊຸມຄັ້ງນີ້, ທ່ານ ນາງ ວັນນະພາ ພົມມະທັນສີ ຮອງສູນບໍລິຫານລັດດິຈິຕອນ, ກະຊວງເຕັກໂນໂລຊີ ແລະ ການສື່ສານ ໄດ້ນຳສະເໜີກ່ຽວກັບ ນະໂຍບາຍຂອງລັດຖະບານດິຈິຕອນ, ພາລະບົດບາດຂອງ ສູນບໍລິຫານລັດດິຈິຕອນ, ແຜນຍຸດທະສາດ ເສດຖະກິດດິຈິຕອນ, ສະພາບການພັດທະນາ ທາງດ້ານນິຕິກໍາ, ການຊົມໃຊ້,​ ຜະລິດຕະພັນ ການບໍລິການ ແລະ ການປະຕິບັດດ້ານດິຈິຕອນ, ພ້ອມທັງນຳສະເໜີກ່ຽວກັບສິ່ງທ້າທາຍ ແລະ ກາລະໂອກາດຂອງ ສປປ ລາວ ໃນການຫັນເປັນທັນສະໄໝ ແລະ ແຜນການຫັນການບໍລິການເປັນດິຈິຕອນໃນຕໍ່ໜ້າ. ນອກຈາກນັ້ນ, ມີຊ່ຽວຊານ ຈາກອົງການ ITU, ຊ່ຽວຊານຈາກປະເທດ ເອັສໂຕເນຍ, ອິນເດຍ ແລະ ກາຊັກຖານ ທີ່ມີຄວາມກ້າວໜ້າ ແລະເປັນຕົວແບບ ໃນການພັດທະນາລັດຖະບານດິຈິຕອນ ກໍໄດ້ນຳສະເໜີ ແລະ ແລກປ່ຽນບົດຮຽນ ໃນການຈັດຕັ້ງປະຕິບັດຮູບແບບ Whole-government approach. ລວມເຖິງການອອກແບບ ແລະ ພັດທະນາຊອບແວຣ໌ຕ່າງໆ, ການເພີ່ມປະສິດທິພາບໃນວຽກງານການບໍລິການລັດ ໂດຍການຫຼຸດຜ່ອນຄວາມຊ້ຳຊ້ອນຂອງລະບົບ, ປັບປຸງຄວາມຖືກຕ້ອງ, ຄວາມປອດໄພ. ໃນກອງປະຊຸມ ຍັງໄດ້ມີການແບ່ງກຸ່ມເພື່ອເຮັດກິດຈະກໍາໃນການທົດລອງສ້າງລະບົບ ແລະ platform ການບໍລິການຂຶ້ນ  ເພື່ອລະດົມແນວຄວາມຄິດ ໃນການພັດທະນາວຽກງານດັ່ງກ່າວ ໂດຍນຳໃຊ້ວິທີການ ຂອງ Govstack.

ກອງປະຊຸມສໍາມະນາໃນຄັ້ງນີ້, ນອກຈາກຈະເປັນການສ້າງຄວາມອາດສາມາດໃຫ້ບຸກຄະລາກອນພາກລັດແລ້ວ ຍັງເປັນໂອກາດໃນການແລກປ່ຽນບົດຮຽນ ລະຫວ່າງ ສປປ ລາວ ແລະ ສະຫະພາບໂທລະຄົມມະນາຄົມສາກົນ ພ້ອມນັ້ນກໍເປັນການສະເຫຼີມສະຫຼອງ ວັນໂທລະຄົມມະນາຄົມ ແລະ ສັງຄົມຂໍ້ມູນຂ້າວສານ ສາກົນ ຄົບຮອບ 158 ປີ, ຊຶ່ງປີນີ້ທາງ ITU ໄດ້ກໍານົດຄໍາຂວັນ “ເອົາໃຈໃສ່ ຊຸກຍູ້ ແລະ ສ້າງຄວາມເຂັ້ມແຂງວຽກງານ ເຕັກໂນໂລຊີ ຂໍ້ມູນຂ່າວສານ ແລະ ການສື່ສານ ໃຫ້ປະເທດ ທີ່ດ້ອຍພັດທະນາ”.

ຂຽນຂ່າວໂດຍ: ສູນບໍລິຫານລັດດິຈິຕອນ/

ພາບ: ພຸດດາວອນ